Read Biblija - Pe Baltitko Romani čib (Romanes) 2019 Baltic Romani Bible Mihiejo 1 Bible Online

Mihiejo 1 - Biblija - Pe Baltitko Romani čib (Romanes) 2019 Baltic Romani Bible bible

Mihiejo 1

¹Ake, sys lav Ráskire-Devléskiro, savó javdiá Mihiejoske Morasfiejostyr dre dolé dyvesá, kiéli sys trin králja Judejákire: Iofámo, Aházo i Jezekíia. Davá lav Devél sykadiá léske dre suné, so javéla Samarijasa i Jerusalimosa.

²‘Šunén, saré manušýtka nácyi (narody), phuv i saró, so isyn pe láte! Mek te javél Raj Devél syr jakhítko (svidietieljo) proti tuménde, o Raj Devél Léskire sventoné Khangirjátyr.

³Dykhén! Ake, Raj Devél vydžála Léskire štetóstyr; Jov džála telé, i Jov javéla te štavel (te terdjol) pir vučé štéty pe phuv.

⁴Bérgi javéna te bilaven tel Léste, i doly javéna te pharadjon, sýrby mom angíl jag, sýrby paniá, so čhuvenape krutymatyr (vučipnástyr).

⁵Saró davá pal Jakovóskiro čoripén, i pal gréhi, so kerdiá kher Izrailjoskiro. Savó isyn čoripén Jakovóskiro? Ci davá na pal Samárija? Save dalé isyn vučé štéty dre Judéia? Ci davá saró isyn na Jerusalimóstyr?

⁶“Paldavá Me keráva Samarijatyr gruda ruinendyr pe félda, — štéto, sob (kaj) te počhuven vinagrado: Me vyčhurdava lákire bará pe dólo, i Me otčhakirava lákire fundamienty.

⁷Saré lákire vyčhindlé muiá javéna phagirdé pe koterá (kuski), i saré lákire dáry, syr biladžakuné džuvliakire, javéna xačkirdé jagása. Me xasiakiráva saré lákire ídoly, pal-dová so joj (Samárija) kerdiá len pal dáry, so denape biladžakuné džuvliáke, i kadalé dáry risjona vaš dáry javire biladžakuné džuvliáke.”

⁸Paldavá me, Mihiejo, javáva te obrovav i te tuginav jasvénca, me džáva obriskirdo i nango; Me javáva i te vyinav syr šakaly, i te tuginav rovibnasa syr strausy.

⁹Pal-dová so Samarijakire fránsy (rany) isyn nasastiakiribnytka, pal-dová so jone doginé ke Judéia; jone doginé ke pórta miré manušéngiri, ke Jerusalimo.

¹⁰Na phenén davá dre Giefo, na rovén zoralés odój, ne učhakiren pes prahosa dro forico Ofra.

¹¹Džán te dživén pe javír štéto, kon dživéla ke Šafiro, nange ke ladž; na našela, kon dživéla ke Caano (Caanano), Ecel' (Bet-Ecel') tuginela zoralés; davá roviben na mekéla tumen te terdjol dre léste.[1]

¹²Kon dživéla ke Marofa (Marat), zanasvalyne pal lačhipén, ne bibáht javdiá telé Rástyr-Devléstyr ke pórta Jerusalimóskiri.

¹³Kon dživéla ke Lahiso, de andré ĥenšten dro vurdén maribnýtko; pal-dová so čoripén Izrailjoskiro lathné dre túte.

¹⁴Paldavá tu javésa te des počastúnki (dáry) ke Moriešef-Gief: ne kherá dro Ahzivo javéna xohanés te prityrden kral'jén Izrailjostyr.

¹⁵Ne Me janáva mištypén-prilyibnaskires (nasliednikos) ke tu, manušnije Moriešoskiri; i baripén Izrailjoskiro piridžala ke Odolamo.

¹⁶Ker péske plieška [zle péstyr balá-r.s.] i občhin péskire balá, kiéli iló tyró javéla te dukhal pal drogoné čhavénde tyrende. Barjakir péskiri plieška sýrby órlo (kído), pal-dová so jone džána dro pliéno tútyr.