Read Biblija - Pe Baltitko Romani čib (Romanes) 2019 Baltic Romani Bible Mihiejo 2 Bible Online

Mihiejo 2 - Biblija - Pe Baltitko Romani čib (Romanes) 2019 Baltic Romani Bible bible

Mihiejo 2

¹Bida pe odolénde, savé priduminena čoripén i savé vyduminena bibáht pe péskire čhuibena! Pe zlóko, kiéli dyvesjola, jone keréna dová, pal-dová so saró davá isyn dro léngiro vast.

²Jone isyn ĥalka (skempa) ke féldy, i jone léna len zorjása. Jone isyn ĥalka ke kherá, i jone otkedena len manušéndyr. I jone pritasavéna (obkedena) manušés i léskiro kher, i manušés kokores, i léskiro meknó mištypén.

³Paldavá adiáke rakiréla Raj Devél: “Ake, Me priduminava kadasavi bibáht proti kadaja sém'ia (irí), so tumé na moginéna (na saštynena) te durjakiren (te zlen) dalé bibahtiatyr tumaré menia; i tumé na javéna te zadenpe, (te psirén mamúi); pal-dová so davá časo isyn bibahtaló.

⁴Dro dová dyvés manušá javéna te rakirén pritča pal tuménde, i jone javéna te rakirén zoralés kirke jasvénca, i te phenén: ‘Ame xasijam sarésa, o Devél parudia amarí dólia [otdyjá javirénge-r.s.]: syr te risjol amarí dólia? Jov roskerdiá amaré féldy maškír amaré vergénde.’”

⁵Paldavá tuménde na javéla nijékh manúš, sob (kaj) te čhurdel žriébijo i te obmierinel šelesa tumaré miéžy pe skedyibén angíl Raste-Devléste.

⁶“Na angilphenen, proróki, — tumé rakiréna kodolénge, savé angilphenena, na angilphenen lénge, sob (kaj) ladžaipén te na jačélpe [te na lathel tumen-r.s.].

⁷Tumé, savé kharenape kher Jakovóskiro: ‘Ci Ráskire-Devléskiro Dúho tyknyja? Ci saró davá čoripén léstyr? Ci na keréna lačhipén Léskire lavá kodoléske, savó dživéla devlytkes [kon keréla čačunés-r.s.]?”

⁸“Na'gara tumé, kon sánas Miré manušá, ĥazdynépe syr vérgi proti Mánde — tumé zlena zorjása upratuno uribén i telatuny ídia manušéndyr, savé džána pašýl bidarakires, savé risjona maribnastyr.

⁹Tumé tradéna javrí džuvlién Miré manušengiren léngire jekhore kherendyr, savé isyn lénge pir iló, tumé otkedena léngire čhavorendyr bahtalypén Miro.

¹⁰Uštén i džán adathýr; pal-dová so adáj tumé na otkhinjona. Kadavá štéto isyn magirdó, i xasiakiréla tumen, i davá xasiakiriben javéla ke kónco (ke jagóro).

¹¹Kóli te javél balvalitko manúš, i te phenél xohaibén kadasavé lavénca: ‘Me javáva te angilphenav pal mol (vino) i pal zoraló pibén (sikiera), až i jov javélas kuč proróko vaš kodolé manušénge.

¹²Ne Me, čačes, kedava khetané sarén tumen, o Jakovo, Me čačipnása skedáva jačkirdé manušén Izrailjoskiren; Me čhuváva khetané (khetaniakirava) len syr bakrén dre Vosora (Bocra) sýrby stada maškír léngire čar'itka féldy: jone javéna zoralés te den gódla, pal-dová so len adákicy but manušá isyn.”

¹³Angíl lénde xalado phagiréla vánty (sciany): i jone phagirena dová, so sys pe drom lénde, i jone dodžana ke pórta i džána péske duredýr. Léngiro králi javéla te džal angíl lénde, i Raj Devél javéla angíl lénde.