Read Biblija - Pe Baltitko Romani čib (Romanes) 2019 Baltic Romani Bible Mihiejo 3 Bible Online

Mihiejo 3 - Biblija - Pe Baltitko Romani čib (Romanes) 2019 Baltic Romani Bible bible

Mihiejo 3

¹I phendjom me, (Mihiejo): “Šunén akaná tumé, šeralé Jakovóskire, i tumé, thagárja Izrailjoskire kheréstyr: ci da na tuménge trej te džinén čačipén?

²Ne tumé san manušá, kon bidykhela lačhipén te kerél, ne tuménge isyn pir iló bibáht (čoripén): tumé, savé lučkirena cýpa manušéndyr, i léngiri loč (džidé masá) léngire kokalendyr;

³savé xána loč (džidé masá) miré manušéndyr, savé lučkirena cýpa léndyr, i phagirena léngire kokalý, i čingirena len pe koterá syr mas vaš pirí, syr loč (džidé masá) vaš kakávi (kotlo).”

⁴Tén'ci jone javéna te prikharen zoralés Ras-Devlés, ne Jov na otphenéla lénge [na javéla te šunél len-r.s.], i Jov garavela péskiro muj léndyr pe dová časo, pal dová, so jone kerdé bibahtalé réndy.

⁵Paldavá adiáke rakiréla Raj Devél pal prorokénde, savé kerdé adiáke: “So miré manušá dynepe dukhá; savé dandyrenape i déna gódla: ‘Ramánjo.’ Ne kon na déla ničý lénge dro muj, tedy jone džána maribnása proti léste:

⁶Paldavá javéla tuménge rat zamiést dykhibén, i javéla tuménge ciamlypén zamiést dová, sob (kaj) tumé te rosphenén suné; kham džála telé pe prorokénde, a dyvés jačéla ciamlo vaš lénge.”

⁷I magiki (prozorlivcy) javéna ladžakirdé, i drabakiribnaskire javéna obsandle (dylniakirde); jone čačipnása phandena péskire uštá; pal-dová so na javéla otphenybén Devléstyr.

⁸Ne mánde, Mihajoste, isyn pherdý zor, saví dyjá Raj Devél pir Svénto Dúho, čačipén i zoralypén, sob (kaj) mánge te priphenav (te sykavav) Jakovóske léskiro čoripén, i Izrailjoske léskiro grého.

⁹Akaná, šunén davá tumé, šeralale kheréstyr Jakovoskirestyr, i barydyrá theméskire kheréstyr Izrailjoskirestyr, savénge isyn džungaló (brydko) čačipén, i savé piririskirena patiaibnýtko otlydžaiben ke čačipén;

¹⁰savé ĥazdéna Sióno pe manušýtko rat i Jerusalimo pe načačipén:

¹¹léngire šeralé sendinena pal počastúnki (podarki), léngire rašaja sykliakiréna pal pleskiriben (pokinyben), i léngire proróki sykliakiréna pal lové, na dykhí pe dová, so jone rikirenape Ráske-Devléske i phenéna jone: “Ci nane Raj Devél maškír aménde? Na javéla bibáht (bída) aménge.”

¹²Pal tuménde paldavá Sióno javéla pharado syr félda, i Jerusalimóstyr jačélape bérgica ruíny, a bérga tel Kheréskiro fundámiento jačélape syr bérgica dro veš.