Read Biblija - Pe Baltitko Romani čib (Romanes) 2019 Baltic Romani Bible Mihiejo 4 Bible Online

Mihiejo 4 - Biblija - Pe Baltitko Romani čib (Romanes) 2019 Baltic Romani Bible bible

Mihiejo 4

¹I javéla adiáke dre palatuné (posliednia) dyvesá, so bérga Devléskire Kheréstyr javéla čhudý pe bergengiro naj vučedýr štéto i joj iavéla vučedýr saré bergicendyr, i manušá javéna te džán ke joj syr réki (leniá).

²But nácyi javéna i phenéna: “Javén, i, ĥazdasape pe Ráskire-Devléskiri bérga, dro kher Jakovóskire-Devléskiro, sob (kaj) Jov te sykliakirél amen, syr te dživás pir Léskiro, i sob (kaj) ame te psiras pir Léskire špery (sciežki).’ Pal-dová so Sionóstyr vydžála Zakóno, i Jerusalimóstyr lav Ráskire-Devléskiro.”

³I javéla Jov te sendiakirél but manušýtka nácyi i sykavéla Jov bang zoralé-nacyiengiri, savé isyn dur, jone pirikerena kurtaly pe plugi (pharadia), i léngire čhurdybnytka bustiá (kop'i) pe sierpy (čhindlé); sob (kaj) nacyja te na ĥazdel kurtála proti javír nacyja, i sob (kaj) jone te na sykljon butýr te marénpe.

⁴Ne kažno (sváko) manúš javéla te bešél tel vinagradýtko xrústo i tel léskire-inžyritko kašt (drévo), i nikón na javéla te trašavel len, pal-dová so jangoléngire-bolybnáskiro Raj Devél dyjá lav pal davá.

⁵Saré manušá psiréna i mangénape lavésa léngire devlorendyr, ne ame javása te psiras, i mangaspe Ráskire-Devléskire lavésa, amaré Devleskiresa pe saré viéki.

⁶“Dro dová dyvés”, — rakiréla Raj Devél, — “Me kedava khetané kodolén, savé isyn langale, i Me skedáva kodolén, savén lydžiné dro pliéno, i kodolén, savén Me pritasadjom (jandjom bída).

⁷I Me keráva langalendyr Miro otiačiben, i Me keráva odoléndyr, savén tradyne dur, zoralý nacyja.’ I javéla Raj Devél te rainel pe bérga Sióno, adadyvesatune dyveséstyr i pe saré viéki.”

⁸I tu, vučardý, (bašnia) sob (kaj) te dykhén pal bakréngire stády, bérgica Sionoskire-čhakiri, ke tu javéla i risjola pale raipen, savó sys vagedyr (angledýr), kralipén Sionoskire-čhakiri.

⁹Akaná sóske tu désa gódla zoralés? Naúšto nane králi maškír tuménde? Ci so, xasijá tyró junkaro (godý-dyibnaskiro)? Pal-dová so dukhá uhtyldé tut sýrby džuvliá, savjake trej te bijanél.

¹⁰Jačpe dre dukhá, i krencynpe pharipnastyr, sýrby džuvlý, saví syg bijanéla, čhaj Sionóskiri, pal-dová so akaná túke trej te džas krig foróstyr, i tu jačesape te dživés pe félda, i tu dodžasa ke Vavilóno. Odój zrakhena tut, odój Raj Devél vyrakhela tut vastéstyr tyré-vergengirendyr.

¹¹Akaná but nácyi skedynépe proti túte, savé rakiréna: “Mek joj te javél magirdy, i mek amaré jakhá te dykhén pe Sióno.”

¹²Ne jone na džinéna, so duminéla Raj Devél, i jone na ĥaljona, kiéli Jov déla lačhí godý lénge, so Jov kedyja khetané len syr ĥarby (snopy) pe givaobkeribnaskiri šúrna.

¹³“‘Gazdepe i obker giv, o čhajo Sionóskiri, pal-dová so Me keráva túke sastruno šyng (rógo), i Me keráva túke xarkuné (miedítka) naja (kopyty), i tu rozmaresa pe koterá but manušýtka nácyi,’ i tu otdesa syr obsvencyndle léngiro doresybén Ráske-Devléske, so jone lyné javirendyr, i léngiro mištypén Baré Ráske pir sarí phuv.”