Read Biblija - Pe Baltitko Romani čib (Romanes) 2019 Baltic Romani Bible Mihiejo 5 Bible Online

Mihiejo 5 - Biblija - Pe Baltitko Romani čib (Romanes) 2019 Baltic Romani Bible bible

Mihiejo 5

¹Akaná skéde khetané xaladén, e čhaj xaladengiri, pal-dová so amen občhude trusciál vérgi, i jone pekavena Izrailjoskire sendaris khijasa (trostiasa) pir čham (ščoka).

²“Ne tu, Vifliejémo-Jefrafe! Na dykhí pe dová, so tu syr fóro san tyknó maškír tysjoncy štéty pe Judaskiri phuv, tútyr javéla Mánge Odová, Savéske trej te javél Baré Rása pe Izrailjo; Saveskiro ródo džála ĥaratuné anglypnástyr, viečnone dyveséndyr.”

³Paldavá Raj Devél jačkiréla Izrailjo ke/žýko dasavo časo, kiéli joi, savjake trej te bijanél, bijanéla, tedy kodolé Léskire pšale, kon jaciápe, risjona pale ke Izrailjoskire čhavé.

⁴I Jov terdjola i Jov javéla te čaravel Léskire-bakrengiri stada Ráskire-Devléskire zoralypnasa, laveskire rajkanypnasa Rástyr-Devléstyr, Léskire Devléstyr. I jone jačénape te dživén bi darákiro, pal-dová so Jov javéla Baró pe jagóry (pe kraí) phuvjákire.

⁵I kadavá Manúš janéla ramánjo (miro). Kiéli o Asirijákire xaladé javéna pe daja phuv, i kiéli jone léna te štaven pir amaré felatiniá, tén'či ame čhuvasa angíl lénde eftá čhupnar'jen (pastyr'jen), i ohtó thagar'jen (kniaz'jen) manušengiren.

⁶I jone javéna te xulainen pe Asirijakiri phuv kurtalása i phuv Niemvrodoskiri pašýl sámo léngiri pórta; i Jov, Miesija, zrakhéla amen Asuroskire (Asirijákire) xaladendyr, kiéli jone javéna pe amarí phuv, i kiéli jone léna te štaven amaré miéžy.

⁷I otiačiben Jakovóskire manušéndyr javéla maškír but manušýtka nácyi sýrby pahlyn (rosa) Rástyr-Devléstyr, sýrby sporko bryšýnd pe čar, savé na javéna te užakiren manušéngire (Adamoskire) čhavén, savénca na javéla te xulainél manúš.

⁸I otiačiben Jakovóskire manušéndyr javéla maškír Najudýtka nácyi, dro maškirál buté-kherítka ródy (pliémi) sýrby ščer (liévo) maškír vešytkone murdalénde (zvieriende), sýrby ternó ščer maškír bakrengiro ĥurto; savó, kóli zadžála, to javéla te štakirel ĥerénca pe xasibén, te roskušel pe koterá, i nikón na zrakhéla léstyr.

⁹Tyró vast javéla ĥazdynó pe tyré vergénde, i saré tyré vérgi xasjona.

¹⁰“I javéla adiáke dro dová dyvés”, — rakiréla Raj Devél, — “so Me xasiakiráva Tyré gren tyrén maškiralypnastyr, i Me rozmarava pe koterá tyré maribnýtka vurdená.

¹¹I Me xasiakiráva fórja pe tumarí phuv, i Me ravava ke ruíny saré tyré zoralé vánty (forty) (ukrieplienii).

¹²Me xasiakiráva čovahanypen tyré vastéstyr, i tuménde na javéna butýr džinybnaskire/drabakiribnaskire pir čergeniá.

¹³Me adiáke-pac' xasiakiráva tyré vyčhindlé muiá (istukany), i tyré vyčhudé obrazy tyré maškiralypnastyr: tu butýr na javésa te bandiakires šeró telé angíl dolé priedmiety, so tyré vastá kerdé.

¹⁴Me vyriskirava tyré kaštune muiá tyré vešorestyr, i Me rozmarava pe ruíny tyré fórja.

¹⁵I Me vypherdiakirava te otdav fuipén pale xoliása i xoliakiribnasa pe Najudýtka nácyi, savé na šundlé Man.’