Read Biblija - Pe Baltitko Romani čib (Romanes) 2019 Baltic Romani Bible Mihiejo 7 Bible Online

Mihiejo 7 - Biblija - Pe Baltitko Romani čib (Romanes) 2019 Baltic Romani Bible bible

Mihiejo 7

¹Bida mánde! Pal-dová so me, som sýrby manúš, kon kedela lynaitka múri, sýrby kodolé, kon podkedela vinagrado (drakh), nane nijékh grozno (vetka múri) te xav, nane nijékh spialo murina, so miro di kaméla.

²E patiaibnytka manušá lačhé ilésa xasiné pe phuv, i nane čačuné manušén maškír muršende. Jone saré podrakhena te pročhuven rat, kažno (sváko) manúš čorjolape pal péskire pšaléste feliasa (sietkasa).

³Léngire vastá riskirdé te kerén bibáht (fuipén): o thagári phučela počastunko (dáro), o sendári (najengiro) rodéla myto (vziatka), i baré raja vyphenena léngiri bibahtaly myslia pe godý, so jone kaména; i jone adiáke khetané piririskirena čačipén.

⁴Naj fededýr manúš léndyr isyn sýrby kanralo xrústo, a naj čačunedyr manúš isyn vostredyr (čolaledyr) tynostyr phusadytkone xrustendyr; javdiá dyvés Tyré-rakhibnar'jengiro, so Tu javésa te sendines, akaná javéla léngiro konfuzo (búnto).

⁵Na patia maléske, na dopatia dromeskire maléske (drugoske), rakh lavá tyré-moskire kodoliatyr, saví isyn pašty pašýl tyró kolýn.

⁶Pal-dová so o čhavó ladžakirela dadés (na déla patýv dadéske), e čhaj ĥazdélape pe lákire date, e bori pe sasiate, manušéskire vérgi isyn manušá léskire kheréstyr.

⁷Ne me kokoró javáva te dykháv pe Raste-Devléste, me javáva te užakirav Devlés, Savó rakhéla man; Miro Devél šunéla man.

⁸Na rádynpe zoralés mándyr, mirí vergica! Kóli perava me, me usajékh ĥazdavape. Kóli me som beštó dro kalypén, ne Raj Devél déla dud (svéto) mánge.

⁹Me vyrikirava xoliakiri zor Ráskire-Devléskiri, pal-dová so me kerdjom gréhi proti Léste, angíl dová, syr Jov obsendiakirela miro réndo i keréla pir čačipén mánge. Jov vylydžala man pe dud, i me dykháva Léskiro čačipén.

¹⁰Tén'ci i mirí vergica javéla te dykhél davá, i ladž čhakirela la, saví phendiá mánge: “Kaj isyn Raj Devél tyró Devél?” Miré jakhá javéna te dykhén la, akaná zaštakirena ĥerénca la, syr bláta pe vulícy (gásy).

¹¹Dro dová dyvés, kiéli tyré vánty, Jerusalimo, nevéstyr javéna te kerén, dro dová-sámo dyvés statúto pal Izrailjo bu'gledyr otčhuvela miéža Izrailjoskiri.

¹²Dro dová-sámo dyvés, jone javéna plienóstyr ke tu, manušále Izrailjoskire, Asirijatyr i Jegiptóskire for'jéndyr; Jegiptóstyr až ke reka (len') Jevfrato, morjostyr (derjavestyr) ke mórjo (derjáv), bergátyr ke bérga.

¹³Ne doiá phuv javéla čhučí (pusto) pal bang kodolegiri, kon dživéla pe láte, i pal dová čoripén, so jone kerdé.

¹⁴(Dévla!) Čarav destesa Tyré manušén, kon isyn dro ĥurto Tyré-mištypnaskiro, savé dživéna kokoré péske dro veš, maškír Karmilo: mek jone te čaravenpe pe Vasáno i pe Galaádo, syr sys dre ĥaratuné dyvesá.

¹⁵Syr sys dre dyvesá, kiéli jone vydžánas Jegiptóskire phuvjátyr, sykáv lénge Tyré dívna réndy.

¹⁶E nácyi javéna te dykhén, i jone javéna te ladžan saré léngire zoralypnastyr, jone čhuvéna vast pe muj péske; léngire kaná javéna kašuke.

¹⁷Jone javéna te čaren (te lizinen) práho syr saplyn; jone javéna te resen javrí léngire garadé šteténdyr syr kirme, so isyn pe phuv. Jone javéna te darén Rástyr-Devléstyr, amaré Devléstyr. Lénde javéla trašaibén angíl Túte, Dévla.”

¹⁸Kon isyn Kadasavó, Dévla, syr Tu san? Kon otmekéla čoripén i promekela čoré réndy manušénge Léskire mekné mištypnástyr, savé jačnépe? Tu na javésa ŭsády (sak) te rikires xolý, pal-dová so Tu radynesape te sykaves láska.

¹⁹Tyró iló nevéstyr peréla pal aménde, i Tu štakiresa (zlesa) amaró čoripén, i Tu čhurdesa saré amaré gréhi dro xoripén morjoskiro (derjavéskiro).

²⁰Tu sykavesa čačipén Jakovóske, i láska Avraamóske (Abramoske), pal so Tu sovlahadian amaré dadénge dre dyvesá ĥaratuné.