Read Biblija - Pe Baltitko Romani čib (Romanes) 2019 Baltic Romani Bible Naumo 1 Bible Online

Naumo 1 - Biblija - Pe Baltitko Romani čib (Romanes) 2019 Baltic Romani Bible bible

Naumo 1

¹Angilphenybén proti Ninievija. Lylvarí pal Naumoskiro dykhibén, savó sys Jelkosostyr[1].

²O Raj-Devél isyn zevlynypnaskiro Devél, i Jov otdéla pale sendosa. Raj Devél otdéla pale sendosa, i Jov isyn drieván darano dre xolý. Raj Devél otdéla pale sendosa Léskire namalenge, i Jov na potanginela Leskirire vergén [prigaravela Léskiri bari xolyn pe Léskire vergénde-ju.o.].

³Raj Devél nasyges xoliasóla (ĥará / dlúges užakiréla) i Léste isyn baró zoralypén. I Jov na kovliakirela iló angíl bibahtalende: syr o Raj Devél psiréla, tedy ĥazdénape riskiribnaskiri balvál i štormo, i óbloki syr práho vurniana tel Léskire ĥerá.

⁴Jov štyliakirela mórjo (derjáv) i šut'kirela les, i Jov pirišut'kirela saré réki (leniá): Vasáno i Karmilo zašutjona i luludí (cvéto) pe Liváno našavela mastín (cviato).

⁵Bérgi izdrana angíl Léste, i bérgicy biladjona; phuv kuninelape angíl Léskiro javiben [muj-r.s.]; svéto, i saró, so dživéla pe svéto.

⁶Kon déla ráda te terdjol štylés, kiéli Raj Devél zoralés xoliasóla? Kon déla ráda te vyrikirel mižehipen Léskire xoliátyr? Léskiro xoliakiribén vyčhuvelape syr jag, i skaly (bérgi) pharadjona pe koterá angíl Léste.

⁷O Raj Devél isyn lačhó, i sýrby kher te garadjol, syr isyn pharó manušéske: Jov džinéla kodolén, savé dopatiana Léske.

⁸Ne baré-tasadypnaskire panienca, savé isyn syr potopo, Jov janéla xasibén ke kónco (ke jagóro) dalé štetoske Ninievijake, i kalypén učhakiréla Léskire vergén.

⁹So tumé priduminena proti Raste-Devléste? Jov xasiakiréla tumen sarésa, pharipén na javéla javír mólo.

¹⁰Na dykhí pe dová, so tumé spentyndlepe khetané syr phusadytka xrústy, i spinepe syr matymarja, tumé javéna te xačon syr phuseskiri cieciva (šuko phus).

¹¹Tútyr vygijá odová manúš, savó priduminela bibáht (xolý) proti Raste-Devléste, jov javéla sovietniko (junkáro), savó déla godý te kerél fuipén.

¹²Adiáke rakiréla Raj-Deviel Judejake: “Na dykhí pe dová, so jone, Asirijákire xaladé, isyn bidaripnaskire i isyn but len, saroiekh, len čingirena pe koterá, i jone xasjona. Syr Me pritasavavas tut, to butýr Me na javáva te keráv davá túke.

¹³Akaná Me phagirava ĥámo tyré meniatyr, so jone čhudé pe túte, i Me pharavava (roskušava) tyré sastyrá pe pašá.”

¹⁴O Raj Devél dyjá priphenybén pal túte, Asuro: “Butýr na javéla ródo tyré lavésa; Me xasiakiráva vyčhindlé muiá kheréstyr, kaj isyn tyré devloré, i tyré vyčhudé muiá. Me ĥanavava túke maĥila (kula), pal-dová so tu san bedo?’

¹⁵Ake, dykhén kodoleskire piré (stópy) pe bérga, savó phenéla bahtalý zvies' (zan), savó rakiréla zoralés pal ramánjo (miro)! “O Judeije! Ker svenkitka skaminda, vypherdiakiren péskire sovlahá, pal-dová so butýr nijékh fuj manúš na prodžála pir túte: jov isyn sarésa xasiakirdo.”