Read Biblija - Pe Baltitko Romani čib (Romanes) 2019 Baltic Romani Bible Naumo 2 Bible Online

Naumo 2 - Biblija - Pe Baltitko Romani čib (Romanes) 2019 Baltic Romani Bible bible

Naumo 2

¹Muliakiribnaskiro džála pe túte, Ninievije! Rakh foróskire zorjakirde vánty! Dykhén ciamkes paló drom, zorjakiren tumaré flangi! Skedén butedýr tumarí zor!

²Pal-davá so Raj Devél čhuvéla dro zor nevéstyr baripén Jakovóskiro, syr baripén Izrailjoskiro, pal-dová so vérgi jačkirdé čhučé štéty lénde, i jone xasiakirdé dre ruíny léngire vinagradýtka randiá.

³Ščyty Léskire zoralé-muršengire isyn lolé, Léskire bidaripnaskire muršá (xaladé) isyn dro jarko loló uribén, a maribnýtka vurdená javéna ziaindle sastyrenca dro dová dyvés, kiéli saré skedénape pe maribén, i čhurdybnytka bustiá (kop'i) kuninenape.

⁴Maribnýtka vurdená vurniana godlása pir gásy [foruný/plóšča-r.s.], jone špulena jekh jekhés i kharenape jekh angíl javiréste pe buĥle dromá: jone ziainena i otmarnape jagása, jone prastána sýges syr bliskavica.

⁵Léngiro barydyró kharéla ke pe léskire vykedyné muršén, jone obštavenape, gii pir drom; jone prastána sýges pe foróskire vánty, i jone jačné skedyné te otmarenpe.

⁶Pórta pe réki (leniá) otphandelape, i bari felatin/kolov (dvorco) rosphadjola.

⁷I isyn kadasavó uphenybén: čúža xaladé rosčhuvena králica i lydžána la dro pliéno. Lákire-štubakire pisharicy javéna te tuginen zoralés pal láte golumbicengire zanor'jenca, marindoj (pekavi) pes dro kolýn.

⁸Ninievija sys syr venderín (prudo) paniésa samone pervoné dyveséndyr, ne akaná, manušá našéna foróstyr. “Terdjon, terdjon!” — vari-savé godlena, ne nijékh (nikón) na risjola pale.

⁹‘Čoren rup! Čoren suvnakái! Nane miéra mištypnaske i barvalypnaske dro kažno vučy pirí!

¹⁰Látyr jaciá čhučó štéto i xasiakirdo štéto; iló biladjola i čangá izdrana; zoralý dukh isyn dro kažno pašvaro, i muiá sarénde kalyne.

¹¹Kaj isyn akaná xašča (logovo) ščerengiro, i terné-ščerengiro čaraibnytko štéto; pir savó psirdé ščer, ščerica, i ščeroro, i nikón na trašavelas len?

¹²Ščer (liévo) kuscia pe koterá, kicý trej mas vaš léskire ščerorende, i, tasadia vaš péskire ščericate. Jov pherdiakirdiá ĥiebará (pieščery) masesa dre dandá, i léskire xaščy (logovy) džidé masesa.

¹³“Ake, Me džáva proti túte, Ninievije!”, — rakiréla jangoléngire-bolybnáskiro Raj Devél. “Me xačkirava tyré maribnýtka vurdená dro thuv, i kurtála počingirela tyré terné ščeren; Me čhuváva kónco (jagóro) pe tyró doresybén pe phuv, i butýr na javéla šundly zan tyré-bičhaibnaskirendyr.”