Read Biblija - Pe Baltitko Romani čib (Romanes) 2019 Baltic Romani Bible Avakumo 1 Bible Online

Avakumo 1 - Biblija - Pe Baltitko Romani čib (Romanes) 2019 Baltic Romani Bible bible

Avakumo 1

¹Anglatunó dykhibén, savó proróko Avakumo dykhciá.

²Kicý, me javáva te kharav Tut, Rajo Dévla, i Tu na šunesa, kicý me javáva te godlav Túke pal “nahratyma!” Ne Tu na désa vast te rakhés amen.

³Sóske Tu désa mánge te dykháv čoripén, i kerésa adiáke, sob (kaj) me te dykháv mén'ki? Pal-davá so čorja i nahrata réndy isyn angíl miré jakhá, manušá košenape i čingardenape.

⁴Pir dová Zakóno jaciá bizorjákiro (našadia zor), i nane čačunó séndo. Fuj manúš pirizorjakirela čačuné manušés, a séndo riskirena, syr kaména.

⁵“Dykhén maškír narody, i pridykhenpe, i ake — tumé keréna baré jakhá!”, — rakiréla Raj Devél. Pal-dová so Me keráva dasavo réndo dre tumaré dyvesá, dro savó tumé na javéna te patián, na dykhí pe dová, so tuménge rosphenena.

⁶Pal-dová so Me, ake, ĥazdáva Xaldiejen, kirki i sýgno nacyja, saví kharélape (dviginelape) pir phuvjákiro buĥlypén, sob (kaj) te zauhtylen džiibnáskire štéty, savé isyn na léngire.

⁷Jone isyn darakune i trašane manušá: pharó séndo keréla léngiri zor, léndyr kokorendyr vydžála séndo.

⁸Léngire grajo isyn sygedýr lieopardendyr i jone isyn xoliamedyr bel'velitkone ruvendyr. Léngire uklistengire xaladé tradéna baripnasa; léngire graja javéna duripnastyr; jone prastána sýrby vurniala órlo (kído), savó sygedýr javéla te xal doresybén.

⁹Jone saré javéna te odlen nahrates, mina pe léngire muiá riskirdy pe vastóko, jone skedéna pliennonen sýrby práho.

¹⁰Jone sykavéna bipatyv ke králja, jone sanape xoliames thagar'jendyr, jone prosana kažno tvárdyma (diz), pal-dová so jone čhuvéna valy phuvjátyr i zauhtylena len.

¹¹Tén'ci léngiro dúho (fáno) parudjola i jone džána syr balvál, i jone keréna čoripén: léngiro zor jačélape vaš lénge syr léngiro devloro.

¹²Ci na san Tu viekendyr i pe saré viéki, O, Rajo Dévla, miro Dévla, miro Jekh Svénto, — ame na merasa. Tu, Rajo Dévla! Tu vykedyjan len, Xaldiejen, vaš pharó séndo pe aménde. E, Skála! Tu dyján zor lénge te pirisykliakiren amen.

¹³Tyré jakhá isyn drieván svénta, sob (kaj) te dykhén pe daja bibáht, i lénge naštý te dykhén fuipén. Sóske Tu dykhésa kodolén, savé keréna zlydnitkes, i Tu na rakirésa nisó, syr bibahtaló manúš xasiakiréla odolés, savó isyn čačunedyr léstyr?

¹⁴Sóske Tu kerésa adiáke, so manušá jačénape syr morjoskire (derjavéskire) mačhé, syr capnia, pe savénde nane barydyró?

¹⁵Jone, Xaldiei, starena manušén vendkasa, jone uhtylena len dre léngiri khudý (siet'), i jone skedéna len dro léngiro nievodo, paldavá jone drieván radynénape, i jone isyn viesiéla (lošalé).

¹⁶Paldavá jone janéna svénta dyibená léngire khudiake i jone xačkirena dróga smóly léngire nievodoske; pal-dová so khudiatyr léngiri dólia (paš) isyn barvaly, i pe léngiro skamínd isyn but xabena.

¹⁷Ci javéna jone iščo (inké) te čhučakiren péskiri khudý, i duredýr te marén (te muliakirén) manušýtka nácyi bi tangipnaskires?