Read Biblija - Pe Baltitko Romani čib (Romanes) 2019 Baltic Romani Bible Avakumo 2 Bible Online

Avakumo 2 - Biblija - Pe Baltitko Romani čib (Romanes) 2019 Baltic Romani Bible bible

Avakumo 2

¹I me javáva te terdjovav pe stréga, i me javáva pe valo te dykháv, so Jov otphenéla mánge, sob (kaj) mánge te otphenav pe miro žalinyben pe Léste.

²Tén'ci otphendiá mánge Raj Devél i phendiá: “Začhin dykhibén i ker biciales (jasnes) davá pe tablicy, sob (kaj) kodová, kon javéla te ginel, saštý lokhes te ginel.

³Pal-dová so davá dykhibén sykavéla pe časo (cýro), savó iščo (inké) javéla, ne jov javéla te rakirél pal kónco (jagóro), i jov na javéla te xohavél. Na dykhí pe davá, so jov zarikirelape, užakir les. Pal-dová so jov javéla, sob (kaj) te na javél, jov na zarikirelape (na otparuvelape).

⁴Dykhén: phut'kirdo manúš kaméla namištypen i xasjola, ne čačunó manúš javéla te dživél pir léskiro patiaibén.”

⁵Phut'kirdo manúš keréla čoripén syr moliátyr (vinostyr), saví zdela les, i léske usá nane štylypen (spokojo). Pal-dová so léskiro tyrdypén barjola dre léste syr štéto dro liúno (ado), i jov isyn na čalo syr meribén, jov, Xaldiejo, kedela ke pe saré manušýtka ródy, i jov zatyrdela (zauhtylela) ke pe saré manušýtka ródycy.

⁶Ci na léna saré kadalé manušá (konés jov rosčordia) te rakirén pritča proti léste, i te vysan lavénca les, phení: “Bida pe léste, kon pribarjakirela ke pe dová, so nane léskiro — pe kicý duredýr davá javéla? Bida pe kadaleste, kon občhuvela pes symadienca (zalogenca)?”

⁷Ci na ĥazdénape jekhátyr (srázu) odolé, savé užakiréna te dandyren tut? Ci na džangadjona (na ĥazdénape) odolé, savé javéna te pritasaven tut adiáke, so tu jačesa vaš lénge sýrby léngiro doresybén?

⁸Pal-dová so tu občordian but narody (manušýtka nácyi), saré, kon jaciápe kadalé manušéndyr, javéna te občoren tut pal manušéngiro rat, i pal nahratyma pe phuv i dro fóro, pal saré manušénde, savé dživéna pe daja phuv.

⁹Bida pe léste, kon doreséla barvalypén bibahtalé rendéndyr péskire kheréske, sob (kaj) léske te kerél gniázda (kúfo) vučés, sob (kaj) jov saštynelas te zrakhelpe bibahtalé zorjátyr.

¹⁰Tu pridumindian ladž péskire kheréske, kiéli tu xasiakirdian but narody (manušýtka nácyi), i paldavá tu lyjan grého pe péskiro di.

¹¹Pal-dová so až bará javéna te den gódla zoralé zaniása vantatyr, i beranda (pieriekladiny) kaštéstyr javéna te otphenen:

¹²“Bida pe léste, kon čhuvéla fóro pe rat, i kon začhuvela tvárdyma/ fóro načapipnasa (čoripnasa)!”

¹³Ake, davá nane jangoléngire-bolybnáskire Rástyr-Devléstyr, so manušýtka nácyi keréna butý pharés vaš jag, so kherítka ródy (pliémi) khiniakirena pes ivjá (naprásnes)?

¹⁴Pal-dová so phuv javéla pherdý džinybnasa pal Ráskire-Devléskiri sláva, syr paniá učhakirena (pherdiakirena) mórjo (derjáv).

¹⁵Bida pe léste, kon déla te p'jel péskire susiedoske (kotariske/pašatuneske) i vyčhuvela péskiri xolý, sob (kaj) te matiakirel les, sob (kaj) jov sys saštý (mogindiá) te dykhél léskiro nangipén.

¹⁶Tu san pherdó ladžaipnasa, a na slavása. Akaná Tu adiáke-pac', pi! Mek te javél otčhakirdo tyró naobčhinyben! Tahtáj čačuné-vasteskiro Rástyr-Devléstyr risjola proti túte, i ladžaipén (ladžakuno čadyipen) peréla pe tyró baripén (sláva).

¹⁷Pal-dová so čoripén, so tu kerdián Livanoske, učhakiréla tut (peréla pe túte); murdalá (žyvotna), so tu trašadian len, javéna te trašaven tut, pal manušéngiro rat, pal čoripén, so kerdián phuvjake, foroske, i sarénge, kon dživéla dro fóro.

¹⁸Savó lačhipén isyn vyčhindlé móstyr, so vyčhinybnaskiro (riezčyko) kerdiá. Vyčhindlo muj na sykliakiréla nisoske, na dykhí pe dová, so léskire keribnaskiro manúš patiála dre léste, kiéli jov keréla muta (niema) ídoly?

¹⁹Bida pe léste, kon rakiréla pe kašt: “Džangadjov (uštý)!”, kašuke (mutone) bareske: “Uštý!” Ci javéla jov te sykliakirél? Ake, jov isyn piričhudo suvnakása i rupésa, ne nane džidó dúho (fáno) dre léste.

²⁰Ne Raj Devél isyn dro Léskiri svénto Khangirí. Mek sarí phuv te javél štyl angíl Léste [Léskiro muj-r.s.].”