Read Biblija - Pe Baltitko Romani čib (Romanes) 2019 Baltic Romani Bible Avakumo 3 Bible Online

Avakumo 3 - Biblija - Pe Baltitko Romani čib (Romanes) 2019 Baltic Romani Bible bible

Avakumo 3

¹Pátieri (molítva) Avakumoskiri, prorokoskiri, te bagán tel balytko strumiento.

²Rajo Dévla! Me šundjom Tyrí zan i darandyjom. Rajo Dévla! Ker nevéstyr Tyré réndy dro amaré časy, ker adiáke, sob (kaj) te džinén tyré réndy maškirál amaré časy. Na dykhí pe dová, so Tu xoliasyjan pe aménde, sykáv Tyrí láska.

³O Devél javéla Fiemanostyr, o Svénto Devél bergátyr Faran. Léskiro baripén učhakirdiá bolybén, Léskire slavása pherdija phuv (i phuv isyn pherdý šaribnasa Léske).

⁴Léstyr ziainypen otmarela syr khamitko dud (svéto), Léskire vasténdyr lučy (lunki) ziainena jagása, [i dro dová, Léskiri zor isyn garady!-ju.o.]

⁵Angíl Léste [Léskiro muj-r.s.] progijá meribnytko fránso, a pal Léskire piré (stópy) sliady džála xačkirdy balvál.

⁶Jov terdijá, i phuv trinskirdiape, Jov podykhciá, i manušá izdrandyne i ĥaratuné bérgi pharadyne pe koterá, a viekitka bérgicy bandine. Léskire dromá isyn viečna.

⁷Me dykhcjom, syr šátry Efiopiitka (Kušanoskire)[1] pyné dro dúho (fáno), i syr budy pe Midijakiri phuv izdrandyne.

⁸O, Rajo Dévla! Ci Tu xoliasyjan pe réki (leniá), Ci sys Tyrí xolý proti réki (leniá), Ci sys Tyrí bari xolý proti mórjo (derjáv), so Tu tradesas uklisto (uklisté) pe tyré ĥrende, Tyré maribnýtka vurdená, savé zrakhena.

⁹Tyró lúko isyn otkerdo te den kar'je pir sovlahá, so Tu phendián Tyré rodycenge. Séla. Tu roskerdian phuv rekicenca.

¹⁰Bérgi dykhné davá i lyné Te izdran, sygna paningá dynepe te thaden potokosa. Xor paniá phendlé léngire zaniása, i ĥazdyné vučés léngire valny syr vastá.

¹¹Kham i čhon terdiné pe léngiro štéto pe bolybén, kiéli Tyré maribnýtka bustiá (striély) dynepe jagása, i lyné te ziainen Tyré čhurdybnytka bustiá (kop'i), so otmarena ziainybnasa.

¹²Tu gíian sýrby xaladybén pir phuv dre xolý, Tu štakirdian manušýtka ródy dre naradyma.

¹³Tu gíian angíl te zrakhes Tyré manušén, sob (kaj) te zrakhes Tyré Pomakhnes, Tu pekadian šerales kheréstyr, kaj isyn bibahtalé, Tu rosčhudian (rozuridian) les ke nangipén šerestyr ke ĥerá. Séla.

¹⁴Tu pharadian léske šeró léngire šeralen čhurdybnytkone bustienca, kiéli léskire xaladé ĥazdynépe syr riskiribnaskiri balvál te rosčhurden amen, jone radyndlepe sýrby pe svénko, so nakhavena (glytynena) čorahanés čororengire masá Izrailjostyr.

¹⁵Tu štadian (pročhudian drom) pir mórjo (derjáv) péskire grenca pirdál baré-paniengiro vučipén, so otmarelape pienasa.

¹⁶Kiéli me šundjom, miré masá lyné te izdran, miré uštá lyné te izdran lokhes dalé zaniatyr: kirnypen zagijá dre miré kokalý; i me jacjom te trinskiravpe pe péskiro štéto. Ne mánge trej te javav štyl dro dyvés darano, kiéli javéla vérgo pe miré manušénde péskire xaladenca.

¹⁷Kóli i inžyritko drévo (kašt), xači, na javéla te luludjol (te cvecinel), i na javéna múri pe vinagradýtka xrústy; kóli maslinitkone barjatyr na javéla ničý, i pe féldy na vybarjola nisó; kóli stády bakréngire xasjona javrí gražostyr (zagonostyr), i na javéna kherítka stády dre štaly,

¹⁸ne me usajékh drieván javáva te radynavpe Rástyr-Devléstyr, i me javáva te radynavpe Devléstyr, Savó zrakhéla man.

¹⁹Rástyr-Devléstyr lélape mirí zor, i Jov keréla miré ĥerendyr sýrby olienjoskire sygna ĥerá i Jov ĥazdéla man te psirav pir miré vučé bérgicy. (Xoróskire Dirižoróske pe balytka strumiénty).