Read Biblija - Pe Baltitko Romani čib (Romanes) 2019 Baltic Romani Bible Sofonija 1 Bible Online

Sofonija 1 - Biblija - Pe Baltitko Romani čib (Romanes) 2019 Baltic Romani Bible bible

Sofonija 1

¹Ake, isyn lav, savó javdiá Sofonijaske, čhavéske Xusijaskireske [unukoske Godolijaskireske, praŭnukoske Jezekijaskireske] dre dyvesá Iosijaskire, Amonoskire čhavéskire, kon sys králi pe Judéia.

²“Me xasiakiráva saró, so isyn pe sarí phuv”, — rakiréla Raj Devél,

³“Me xasiakiráva manušén i murdalén (žyvotnonen), Me xasiakiráva bolybnytkone čiriklen, mačhen dro mórjo (derjáv), Me xasiakiráva bará, savénge fuj manušá mangénape”. Me xasiakiráva manušén, so nijékh na jačélape pe phuv”, — rakiréla Raj Devél.

⁴“Me pharés sendiakirava Miré vastésa Judéia, i saré manušén, savé dživéna ke Jerusalimo, i Me xasiakiráva saró, so jaciápe Vaalostyr pe davá štéto. Me xasiakiráva lavá rašángire khetané Najudytkoné-mangipnaskirenca idolénge;

⁵i kodolén, kon keréla patýv kodolénge, savé isyn dro bolybnytko svéto, pe kheréskire fiéli (makuški), i kodolén, savé keréna patýv Mánge, Ráske-Devléske i sovlahana Miré lavésa, i savé adiáke-pac' sovlahana Molohosa;

⁶i kadasaven, savé risiné krig droméstyr pal Raste-Devléste, i javirén, savé na rodéna Ras-Devlés, na phučena Rástyr-Devléstyr te lydžál Les”.

⁷Jav štyl angíl Raste Devléste, pal-dová so Ráskire-Devléskire Dyvés isyn pašýl, pal-dová so Raj Devél isyn skedynó te janel svénto dyibén, Jov posvencyndia Léskire manušén, savén Jov zamangdia.

⁸I javéla adiáke dro dová dyvés, kiéli janéna svénto dyibén: Me, Raj Devél, javáva pharés te sendiakirav thagar'jen (kniaz'jen) i kralískire čhavén i sarén, savé uridepe dre čúža ídia.

⁹Dro dová sámo dyvés Me pharés sendiakirava odolén, savé piriuhtena pir kherítko progo, savé pherdiakirena léngire-raskire kherá nahratymasa (nasilijosa) i xohaibnasa.

¹⁰I javéla dro dová dyvés adiáke, — rakiráva Me, Raj Devél, — so javéla godlyma pašýl mačhitko pórta, i javéna gara (dlúges) te rovén zoralés pašýl javír pórty, i so javéla baró grukato phagiribnastyr pe bérgicy”.

¹¹Rovén zoralés, manušále telatuné foróstyr (Mahtešostyr), pal-dová so kúpcy (tylgárja) xasjona, i saré, kon timisiakirela rupésa, xasjona.

¹²I javéla adiáke dro dová dyvés, so Me pirirodava Jerusalimo momolytkonenca (svietil'nikenca), i Me pharés sendiakirava manušén, savé kaštalyne pe léngiro jačaibén moliátyr (vinostyr), savé phenéna péske: ‘O Raj Devél na keréla lačhipén, i Jov na keréla bibáht’.

¹³Paldavá rosčorena léngiro barvalypén, i léngire kherendyr jačélape golotýnia; jone javéna te čhuvén kherá, ne jone na javéna te dživén dre lénde: jone javéna te počhuven vinagradýtka xrústy dre phuv, ne jone na javéna te p'jen mol (vino).

¹⁴Baró Dyvés Ráskire-Devléskire drieván sýges javéla, jov syg javéla i jov pričhuvela zor sýges te javél. Šundlo isyn kirki zan dro dová Dyvés Ráskire-Devléskiro: odój zoraló murš javéla te del gódla.

¹⁵Davá Dyvés javéla syr baré-xolynakiro dyvés; pharó i trašano dyvés; dyvés, kiéli pe phuv jačéna ruíny i golotýnia: dyvés kaló i cjomno, davá dyvés javéla občhudo oblokénca i ĥenstone ciamlypnasa;

¹⁶dro dová dyvés javéna te phurdén dro rógo (truba) i javéla maribnýtko godlyma proti fórja zoralé vantenca i proti vučé vučardia (bašni).

¹⁷I Me janáva bari dar pe manušénde, i jone javéna te psirén syr kororé manušá; jone kerdé grého proti Raste-Devléste, léngiro rat javéla rosčhudo syr práho, i léngiri loč (plot') javéla te kirnjol syr gnejo”.

¹⁸Ni léngiro rup, ni suvnakáj naštý (na zmoginena) te zrakhen len dro dová dyvés baré Ráskire-Devléskire xolynatyr. Léskire-zevlynypnaskiri jag xála sarésa sarí phuv, pal-dová so Jov janéla sýges kónco (jagóro) pe sarénde, kon dživéla pe phuv.