Read Biblija - Pe Baltitko Romani čib (Romanes) 2019 Baltic Romani Bible Agiejo 1 Bible Online

Agiejo 1 - Biblija - Pe Baltitko Romani čib (Romanes) 2019 Baltic Romani Bible bible

Agiejo 1

¹Pe javír berš, syr lyjá te rainel Králi Darijo, dro šóvto čhon, pérvo dyvés čhonéskiro, sys lav Ráskiro-Devléskire prorokoske Agiejoske vaš Zorovavieljoske, čhavéske Salafiiloskireske [Šaltiloskireske-ju.o.], kon sys šeraló raj pe Judéia, i vaš Ješuaske [Isusóske-r.s.], čhavéske Iosedekoskireske, kon sys pérvo rašái, phení:

²“Adiáke rakiréla jangoléngiro-bolybnáskiro Raj Devél, phení: ‘Kadalé manušá rakiréna: iščo (inké) na javdiá časo te čhuvél Kher (Khangirí) Ráskire-Devléskiro.’”

³Tén'ci sys lav Ráskire-Devléskiro prorokoske Agiejoske, i phendiá:

⁴“Ci isyn časo tuménge te dživén dre obsyde kherá, a Kheréske (Khangirjake) te pasjol dre ruíny?

⁵Paldavá akaná adiáke rakiréla jangoléngire-bolybnáskiro, Raj-Devél: “Risjon ilésa pe dalé réndy (diély)!

⁶Tumé but čhuvéna dre phuv, ne nábut léna tumé: tumé xána, ne tumé na san čale; tumé p'jena, ne tumé na vyp'jena čalés, tumé ur'jenape, ne tuménge isyn na tato; i kon keréla butý te zakerel, zakerela, sob (kaj) te čhuvél dro mijengiro (košel'ko) ljohenca (dyrkenca)”

⁷Adiáke rakiréla jangoléngire-bolybnáskiro, Raj Devél: “Risjon ilésa pe dalé réndy!”

⁸Džán upré pe bérga i janén veš, i čhuvén Khangirí, i Miré ileske javéla lačhó, i tumé keréna patýv Mánge”, — rakiréla Raj Devél.

⁹“Tumé užakiréna but, ne čačipnása daléstyr javéla nábut, i kiéli tumé janéna davá kheré, Me rosphurdava krig. Sóske? — rakiréla jangoléngire-bolybnáskiro, Raj Devél: ‘Vaš dová, so Miro kher isyn dre ruíny, ne kažno (sváko) tuméndyr prastala ke péskiro kher.

¹⁰Paldavá bolybén, so isyn uprál tuménde, zarikirdia pahlyn (rosa), i phuv zarikirdiape te del barjakirdé (plódy).

¹¹Pal-dová so Me vykhardjom šut'kiriben pe phuv, i pe bérgi, pe giv i pe neví mol (vino), i pe maslinitko dzet (jeliejo), pe saró, so phuv bijanéla, pe manušénde, i pe kheritkoné murdalénde, i pe sarí butý tumaré vastengiri.”

¹²Tén'ci o Zorovavieljo, čhavó Salafiiljoskiro (Šaltiloskiro), i Ješua, čhavó Iosedekoskiro (Jehozadakoskiro), pérvo rašái, i saré manušá, kon jaciápe, kandyné Ráskire-Devléskiri zan, léngire Devléskiri, i prorokoskire Agiejoskire lavá, pir dová, so o Raj Devél, léngiro Devél bičhadiá les, i manušá trašandyne angíl Raste-Devléste.

¹³Tén'ci o Agiejo, Ráskire-Devléskiro viestia-janybnaskiro (viestniko), phendiá daja zvies' Rástyr-Devléstyr manušénge, phení: “Me som tuménca”, — rakiréla Raj Devél.”

¹⁴I džangadia o Raj Devél dúho (fáno) Zorovavieljoskiro, čhavéskire Salafiiljoskiro, kon sys šeraló raj pe Judéia, i dúho (fáno) Ješuaskiro, čhavéskire Iosiedekoskiro (Jehozadakoskiro), kon sys pérvo rašáj i saré-manušéngiro dúho (fáno), kon jaciápe, i jone javné i kerdé butý pe jangoléngire-bolybnáskiro, Ráskire-Devléskiro Kher (Khangirí), léngire Devléskiro,

¹⁵davá sys pe beš te štárto dyvés, dro šóvto čhon, pe javír berš, kiéli raindia o Králi Darijo.