Read Biblija - Pe Baltitko Romani čib (Romanes) 2019 Baltic Romani Bible Zahárija 1 Bible Online

Zahárija 1 - Biblija - Pe Baltitko Romani čib (Romanes) 2019 Baltic Romani Bible bible

Zahárija 1

¹Pe ohtóto (bidujéngiro déšto) čhon, pe javír berš Darijoskiro, sys lav Ráskire-Devléskiro ke Zahárija, Varahiiaskiro[1] čhavó, Idoskire-čhavéskiro, kon sys proróko; pheny:

²“Xoliasyja drieván Raj Devél pe dadende tumarende baré xolynasa,

³ne tu phen lénge: ‘Adiáke rakiréla Raj Devél jangoléngire-bolybnáskiro: risjon ke Me’, — rakiréla Raj Devél jangoléngire-bolybnáskiro Devél’, i Me risjováva ke tumé’, — rakiréla Raj Devél, jangoléngire-bolybnáskiro.

⁴Na javén adasavé, syr dadá tumaré, ke savé phenenas lav angledýr phurané proróki, rakirí: ‘Adiáke rakiréla Raj Devél, jangoléngire-bolybnáskiro: Riskirén tumé kakaná tumaré fujé dromendyr i tumaré fujé butiendyr; ne jone na kandyné i na šundlé Man’, — rakiréla Raj Devél.

⁵‘Dadá tumaré-kaj jone isyn? Ne i proróki, ci léna jone te dživén bi koncoskiro?

⁶Ne lavá Miré i statúty Miré, savé Me priphendjom Miré pishar'jénge prorokenge, ci na doginé jone ke dadá tumaré? Ne jone risjonas i rakirénas: ‘So zadumindia jangoléngiro-bolybnáskiro Raj Devél te kerél aménge pal amaré dromá i amaré butiá, adiáke Jov i kerdiá aménge’.”

⁷Pe biš te štárto dyvés dro dešujekhto čhon — davá isyn čhon Ševat — pe javír berš Darijoskiro, sys lav Ráskire-Devléskiro ke Zahárija, Varahiiaskiro čhavó, Idoskire-čhavéskiro, prorokoske:

⁸“Dykhcjom (dyjom) suné me ratý: ake, murš uklisto pe lolé greste isyn terdó maškír mirty[2], savé isyn nábut paledyr, ne pal léste grajo lolé, syva i parné.

⁹Tén'ci phendjom me: “Kon isyn jone, Rajo miro?” I phendiá mánge Jangólo, savó rakirdiá mánca: “Me sykaváva túke, kon jone isyn.”

¹⁰I otphenélas murš, savó sys terdó maškír mirty, i phendiá: “Davá isyn kodolé, savén Raj Devél bičhadiá te obdykhen phuv.”

¹¹I jone otphenenas Ráskire-Devléskire Jangoloske, savó sys terdó maškír mirty, i phendlé: “Obdykhciám ame phuv, i, ake, sarí phuv isyn pherdý manušénca i ramánjono (spokójno).”

¹²I otphenélas Jangólo Ráskire-Devléskiro i phendiá: “Rajo Dévla, jangoléngire-bolybnáskiro! Kiéli kovljola Tyró iló ke Jerusalimo i ke fórja Judáskire, pe savé Tu xoliasosa uže eftadešá berš?”

¹³Tén'ci, otpheny Jangoloske, savó rakirdiá mánca, vyphendia Raj Devél lavá bahtalé, lavá ilýtka.

¹⁴I phendiá mánge Jangólo, savó rakirdiá mánca: “Uštý i phen: ‘Adiáke rakiréla jangoléngiro-bolybnáskiro Raj Devél: ‘Rosholiasyjom Me pe Jerusalimo i pe Sióno baré xoliása;

¹⁵i baré xolynasa xoliamó som Me pe manušénde, savé sys džidé isyn dro spokojnyma: pal-dová so syr Me sómas nábut xoliamó, jone kerdé butýr.

¹⁶Vaš-dová adiáke rakiréla Raj Devél: “Me risjováva ke Jerusalimo kovlé ilésa; dre léste javéla ĥazdynó Kher Miro (Khangirí Mirí)”, — rakiréla, jangoléngiro-bolybnáskiro Raj Devél, i šelo, savésa obmierinelape pes phuv, protyrdelape pir Jerusalimo.

¹⁷Iščo uštý i phen: ‘Adiáke rakiréla, jangoléngiro-bolybnáskiro Raj Devél: ‘Nevéstyr (nevés) pherdiakirenape fórja Miré lačhipnása i obrisjola kovlé ilésa Raj Devél ke Sióno, i nevéstyr (nevés) Jov vykedéla Jerusalimo.”

¹⁸I ĥazdyjom me jakhá miré i dykhcjom: ake, štar šyngá.

¹⁹I phendjom me Jangoloske, savó rakirdiá mánca: “So isyn davá? I jov otphendiá mánge: “Davá isyn šyngá (rógi), savé rosčhurdyne Judas, Izrailjo i Jerusalimo.”

²⁰Paldavá sykadiá mánge Devél štaren butiarnen (spiecen dre vastytka butiá).

²¹I phendjom me: “So léna jone te kerén?” Jov phendiá mánge adiáke: ‘Adalé šyngá, savé rosčhurdyne Judas adiáke, so nikón naštý (na moginéla): te ĥazdel šeró péskiro; ne adalé javné te darjakiren len, te zmaren telé šyngá manušéngire, savé ĥazdyné šyng péskiro pe Judaskiri phuv, sob (kaj) te rosčhuven la’.”