Read Biblija - Pe Baltitko Romani čib (Romanes) 2019 Baltic Romani Bible Zahárija 10 Bible Online

Zahárija 10 - Biblija - Pe Baltitko Romani čib (Romanes) 2019 Baltic Romani Bible bible

Zahárija 10

¹Mangén Rástyr-Devléstyr bryšýnd, kiéli vesnakiro jov trej te javél; Devél zaziainela bliskavicasa i déla tuménge ĥensto bryšýnd, čar pe félda.

²Pal-dová so terafimy bašena čibása, a zumakiribnaskire (vieščuny) dykhéna xohanés i rosphenena suné xohané; jone kovliakirena ile čhučipnasa (pustotasa); vaš-dová jone psiréna syr bakré, savénge isyn pharó, pal-dová so nane čhupnaris (pastyrjos).

³Pe čhupnar'jende zahačíia xolyn Mirí, i buznen (kozlen) Me javáva te maráv; pal-dová so javéla jangoléngire-bolybnáskiro Raj Devél ke ĥurto Péskiro, Judáskiro kher, i čhuvéla len, syr thagaritkone gres péskires pe maribnýtko félda.

⁴Léstyr javéla venglytko bar, léstyr — kiloro vaš šátra, léstyr — lúko te marélpe, léstyr javéna theméskire barydyrá (pravitieli).

⁵I jone javéna zoralé muršá, savé javéna te štakiren vergén, kóli isyn maribén, syr mel pe gása, i marénpe, pal-dová so Raj Devél isyn lénca, i zadena jone bari ladž odolénge, savé isyn uklisté pe grénde.

⁶Me zoraliakirava kher Judáskiro i zrakháva kher Jozaskiro, i Me riskiráva len pale, pal-dová so kovlyja iló Miro pal lénde, i jone javéna, sýrby Me na mekavas len: pal-dová so Me Raj-Devél léngiro, i Me vyšunava len.

⁷Syr zoraló murš javéla Jefriémo; tedy javéla te zradynelape iló léngiro, syr moliátyr (vinostyr); i dykhéna davá čhavé léngire i jone javéna te radynénpe; rádyma javéla dro léngiro iló vaš Ráske-Devléske.

⁸Me dáva šolia, lénge i skedáva len, pal-dová so vyrakhcjom len; jone javéna adákicy butdžine, syr sys angledýr.

⁹I Me rosčhuvava te dživén len maškír manušénde, i dre duratuné phuvjá, jone léna te ripirén pal Mánde, i jone léna te dživén péskire čhavorenca (bijatenca), i risjona pale.

¹⁰Me adiáke-pac' riskiráva len pale Jegiptóskire phuvjátyr i Asirijatyr, skedáva len, i Me lydžáva len pe Galaadoskiri phuv i pe Liváno adiáke pe ĥará, syr na uhtýlla (nádosi) štéto vaš lénge.

¹¹I jone džána pir bari bída pir mórjo (derjáv) i Me xasiakiráva valny moritka adiáke, so terdjona saré xoripna rekakire (leniakire), tyknjola Asuroskiro phut'kiribén i otlena skipietro Jegiptóstyr.

¹²I Me zoraliakirava len dre Raste-Devléste, i jone léna te psirén dro lav Léskiro”, — rakiréla Raj Devél.