Read Biblija - Pe Baltitko Romani čib (Romanes) 2019 Baltic Romani Bible Zahárija 11 Bible Online

Zahárija 11 - Biblija - Pe Baltitko Romani čib (Romanes) 2019 Baltic Romani Bible bible

Zahárija 11

¹Otker (psirav), Liváno, pórta tyrí, sob (kaj) te pohal jag tyré kiedry.

²Rov, kipariso, pal-dová so pyjá kiedro, pal-dová so i baré kaštá podynepe; rovén, demby Vasanoskire, pal-dová so pyjá ĥensto veš.

³Zan čhupnar'jengiri (pastyr'jengiri) isyn šundly rovibnasa, pal-dová so čhučija léngiri vol'nyma; šunelpe xoliam zan terné-ščerengiri, pal-dová so xasijá Iordanoskiro šukaripén.

⁴Adiáke rakiréla Raj Devél, Devél miro: “čarav bakrén, savé džána tel čhuri,

⁵savén xulaja čhinena bi darákiro, a odolé, savé len bikindle, rakiréna: ‘Parikiriben Devléske; me barvalyjom!” I léngire čhupnárja (pastuhi) na tanginena pal lénde.

⁶Pal-dová so Me na lavá butýr te tanginav manušén dalé — phuvjakiren’, — rakiréla Raj Devél; — ake, Me otdáva manušén, kažnones dre vastá léskire semencake, i dre vastá léskire kralíske. Jone léna te xasiakirén phuv, ne Me na zrakháva len léngire vasténdyr’.”

⁷I Me čaradjom bakrén, savé džána tel čhuri, bakrén, čačes, čororen. Me lyjom Péske duj sastruné desté (žezly) i Me lyjom te kharav jekh ‘Šuk’, a javír — ‘Sastruné Penty, i čaradjom bakrén.

⁸I Me xasiakirdjom trinen čhupnar'jen dro jekh čhon; i odrisija di Miro léndyr, syr léngiro di odrisija Mándyr.

⁹Tien'ci Me phendjom: “Me na lavá te čarav tumen. Savó isyn te merél, mek te merél, i xasibnaskiro — mek te xasjol, a savé jačénape, mek te xan masá jekh javirestyr.

¹⁰I Me lyjom Miro sastruno destó — Šuk — i Me phagirdjom les pe paš, sob (kaj) te khosav krig zavieto, so sčhudjom Me saré manušénca.

¹¹I sys destó phagirdó dro do dyvés. I tén'či ĥalyné čororé maškír bakrende, savé užakirde Man, so davá sys lav Ráskire-Devléskiro.

¹²I Me phendjom lénge: “Kóli tumé kaména, den Mánge Miro pleskiriben; kóli nad — na den; i jone važyndle Mánge syr pleskiriben trijánda rupuvé lovore.

¹³I phendiá mánge Raj Devél: “Čhurde len dre pirí khangirjákiri, — kadasavi vučí timín, saví jone dyné pal Mánde! I lyjom Me trijánda rupuvore i čhurdyjom len dro Kher Ráskire-Devléskiro vaš manušéske, kon lipinel pirja glinatyr (glejatyr).

¹⁴I phagirdjom Me javír sastruno destó Miro — Sastruné Penty, sob (kaj) te rosphandav pšalypen maškír Judaste i Izrailjoste.

¹⁵I Raj Devél phendiá mánge: “Le iščo (inké) péske strumiento jekheskire dylyné čhupnar'jendyr.

¹⁶Pal-dová so, ake, Me jačavava pe daja phuv čhupnaris, savó na léla te pekelpe pal xas'kiribnaskirende, i jov na léla te rodél našaden, na léla te sastiakirel nasvalen, i sasten jov na léla te čaravel, ne jov javéla te xal mas thulengiro, i kopyty (naja) léngire roskušne pe koterá.

¹⁷Mek te javél bída pe džungalé pastyrjoste, savó jačkiréla péskire bakrén! Mek te čhinel čhuri vast léskiro i čačí jakh léskiri! Mek te šutjol sarésa léskiro vast, i mek léskiri čačí jakh sarésa te korjol.”