Read Biblija - Pe Baltitko Romani čib (Romanes) 2019 Baltic Romani Bible Zahárija 13 Bible Online

Zahárija 13 - Biblija - Pe Baltitko Romani čib (Romanes) 2019 Baltic Romani Bible bible

Zahárija 13

¹Dro dová dyvés psiravelape (otkerelape) ĥanyngori vaš Davidóskiro kher i Jerusalimóskire manušénge, sob (kaj) te vymoren (te xalaven krig) léndyr grého i kažno melalypen.

²I javéla dro dová dyvés’, — rakiréla Raj Devél, jangoléngire-bolybnáskiro, — ‘Me čhináva krig idolengire lavá dalé phuvjátyr, i pal lénde nikón butýr na léla te ripirel. Me adiáke keráva, so kokoré xohané prorokén i nažužo dúho Me tradava krig phuvjátyr.

³I javéla adiáke: syr kon léla te angíl phenél pal dová, so javéla, to dad i daj léskire, so jandlé les, pe svéto, phenéna léske: ‘Túke naštý te dživés, pal-do so tu xohaibén rakiresas Ráskire-Devléskire lavéstyr.’ I muliakirena les dad léskiro i daj léskiri, savé bijandle les, syr jov léla te angilphenel’.

⁴I javéla dro dová dyvés, so zaladžanape kadasavé proróki, kažno péskire dykhibnastyr, syr jov léla te angilphenel, i jone na léna te ur'jen pe léste balytka goné, sob (kaj) te xohaven.

⁵Ne jov phenéla: Me na som proróko, Me som gavitko manúš, pal-dová so sys vari-kon te kerél mándyr dynarís miré čhavoritkone beršéndyr.

⁶Léske phenéna: “Sóske isyn túte kárby (rubcy) pe vastá?” I jov otphenéla: “Vaš dová, so marenas man dro kher, kaj sys miré drúgi (malá).”

⁷O, Kurtália! Ĥazdepe pe pastyrjoste Mireste i pe semencate Mirjate, rakiréla jangoléngire-bolybnáskiro Raj Devél. Zamar pastyrjos, i rosprastanape bakré! I Me protyrdava vast Miro ke tykné.

⁸I javéla adiáke pe sarí phuv, — rakirél Raj-Devél, — ‘Duj trita pe láte javéna xasiakirdé, vymerna, a tríto paš jačélape pe láte.

⁹I lydžáva Me do tríto paš dre jag, biliakirava les, syr biliakirena rup, i vyžužakirava les, syr žužakirena suvnakái: jone léna te kharén lav Miro. I Me vyšunava len i otphenava: ‘Davá isyn Miré manušá,’ ne jone phenéna: ‘Raj Devél isyn Devél miro!’”