Read Biblija - Pe Baltitko Romani čib (Romanes) 2019 Baltic Romani Bible Zahárija 14 Bible Online

Zahárija 14 - Biblija - Pe Baltitko Romani čib (Romanes) 2019 Baltic Romani Bible bible

Zahárija 14

¹Ake, javéla dyvés Ráskire-Devléskiro, i roskerena mištypén, čordo tútyr, maškír túte.

²I Me skedáva sarén manušén pe maribén proti Jerusalimo, i léna fóro i občorna kherá i kerna ladž džuvlienge, paš-fóro džála dro pliéno; ne javír manušá, savé jačénape, na xasjona foróstyr.

³Tén'ci javéla Raj Devél i xoliasóla pe Najudýtka nácyi, syr xoliásyja pe lénde dro maribnaskiro dyvés.

⁴I terdjona ĥerá Léskire dro dová dyvés pe Olivítko (Jelieonoskiri) bérga, so angíl Jerusalimo ke/žýko vastóko; i rospharjola pe paš bérga Olivítko vastokóstyr ke/žýko zapado (ke pal-pania) drieván baré feldasa, i paš bérga otdžala ke paš-ratítko rig, a javír paš-ke paš-dyvesýtko (južno) rig pe drieván baró dólo.

⁵I tumé našéna dre félda maškír bérgi Miré; pal-dová so félda protyrdelape ke Asilo; i tumé prastána, syr našenas phuvjákire trinskiribnastyr dre dyvesá Ozijaskire, Judejákire kralískire; i javéla Raj Devél, Devél miro i saré svénta Lésa.

⁶I javéla dro dová dyvés: na javéla dud, kham, čhon i čergeniá durjona.

⁷Dová dyvés javéla jekh jekhoro, pal léste džinéla féni jekh Raj Devél: ni rat, ni dyvés, féni bel'velié javéla dud.

⁸I javéla dro dová dyvés: džidé paniá léna te thaden Jerusalimóstyr, paš léndyr ke vastočno mórjo (derjáv). I paš léndyr ke západno mórjo (derjáv): lynáskiro i ivantéskiro (zimakiro) javéla adiáke.

⁹I Raj Devél javéla králi pir sarí phuv; dro dová dyvés javéla féni (jekh) Raj Devél, i lav Léskiro-féni jekh.

¹⁰Sarí daja phuv javéla, syr rovno (vórto) félda, Gavaonostyr ke Rima, pe paš-dyvés Jerusalimóstyr, savó vučés léla te terdjol pe péskiro štéto i léna te dživén dre léste manušá Biendžminoskire Portatyr ke štéto, kaj isyn pérvo pórta (vrata), ke Vengloskiri pórta, i Xananieiloskire vučardiatyr ke kralitka priesy.

¹¹E manušá léna te dživén dre léste, i na javéla butýr lavitko prokošybén, ne Jerusalimo javéla te terdjol bidarakiro.

¹²I, ake, savé javéna xasibnýtka fránsy, savénca xasiakiréla Raj Devél saré manušén, so marenaspe Jerusalimosa: kažnonéste vyšutjona masá léskire, syr jov iščo (inké) javéla terdó pe péskire ĥerá, i jakhá léskire biljona dre péskire jamicy, i čib léskiri vyšutjola dro muj léste.

¹³I javéla dro dová dyvés: javéla maškír lénde bari panika Rástyr-Devléstyr adiáke, so javéla te uhtylel pal javireskiro vast, i ĥazdélape vast léskiro pe vast léskire semencakiro.

¹⁴Ne i kokoró Juda léla te marélpe Jerusalimosa, i skedynó javéla mištypén sarengiro pašylatune Najudytkoné-nacyiengiro: suvnakái, rup i ídi but butendyr.

¹⁵Javéla dasavo kokoró xasiakiriben grengiro i lošakengiro, xasjona i vierbliudy, i osly (miegárja), i saré murdalá kherítka (skoto), savé javéna pašýl léngire budy dro lod (stáno).

¹⁶Paló dová saré javír Najudytkoné nacyiéndyr, savé javénas te marélpe Jerusalimosa, léna berš beršestyr te javén te kerén šerésa angíl Kralíste Raste-Devléste jangoléngire-bolybnaskireste, i te kerén budengiro (kuščengiro) Svénko.

¹⁷I javéla: so kóli vari-savó kherítko ródo (pliemjo) pe daja phuv na džála dro Jerusalimo te bandiakirel péskiro šeró angíl Kralíste, Raste-Devléste, jangoléngire-bolybnaskireste, tedy na javéna lénde bryšynda.

¹⁸I kóli Jegiptóskiro kherítko ródo (pliemjo) na ĥazdélape do drom i na javéla, tedy i lénde na javéla bryšýnd, i uhtýlla (dósi) len xas', savjása xasiakirla Raj Devél manušén, savé na javéna te kerén šatrengiro Svénko.

¹⁹Ake, so javéla pal Jegiptóskiro grého i pal grého saré manušéngiro, savé na javéna te svenkinen budengiro Svénko — pharó sendiakiriben!

²⁰Dro dolé dyvesá i po grengiro ĥámo kudunienca javéla čhindló: “Sventyma Ráske-Devléske”, i kakavja (kotly) dro Kher Ráskire Devléskiro javéna syr čaré (čašy) angíl altárjo.

²¹I saré pirja (kakavja) dro Jerusalimo i dre Judéia javéna syr sventyma Ráskire-Devléskiri. I saré, kon javéla te janel svénto dyibén, léna len i keravena dre lénde. I na javéla butýr ni jekh Xananiejo dro Kher Ráskire-Devléskiro , jangoléngiro-bolybnáskiro dro dová dyvés.