Read Biblija - Pe Baltitko Romani čib (Romanes) 2019 Baltic Romani Bible Zahárija 2 Bible Online

Zahárija 2 - Biblija - Pe Baltitko Romani čib (Romanes) 2019 Baltic Romani Bible bible

Zahárija 2

¹I nevéstyr (nevés) ĥazdyjom me jakhá miré i dykhcjom: ake, murš, dre saveskiro vast sys šelo, savésa mierinelape phuv.

²Me phucjom: ‘Karik tu džása?” I jov phendiá mánge: “Te obmierinav Jerusalimo, sob (kaj) te dykháv, savó isyn léskiro buĥlypén i savó isyn léskiro dlengipén.”

³I ake, Jangólo, savó rakirdiá mánca, vydžála ne javír Jangólo džála mamúj léste.

⁴I phendiá jov adaleske: “Džá sygedýr, phen adalé terneske: ‘Jerusalimo bičhavéla péskire manušén pe phuvjá pašýl fóro, pal-dová so drieván but isyn dre léste manušén i but kheritkoné murdalén (skoto).

⁵I Me javáva’, — rakiréla Raj Devél, syr jekh jagitko vánta (sciana) trusciál léste, i barjola sláva Mirí dre léste andrál.”

⁶“Ei! Ei! Našén paš-ratitkoné (sieviernone) rigátyr, — rakiréla Devél: ‘pal-dová so pir štar balvalia bolybnýtka Me rosčhudjom tumen”, — rakiréla Raj Devél.

⁷Naš krig, Sióne, savó san ke Vavilonoskiri čhaj.

⁸Pal-dová so adiáke rakiréla, jangoléngire-bolybnáskiro Raj-Devél: ‘Vaš sláva Jov bičhadiá man ke Najudýtka nácyi, savé občorenas tumen; pal-dová so savó čilavéla tumen, dočilavelpe ke lial'ka (zračko) dre jakh Léskiri.

⁹Ake, Me trinskirava Miré vastésa pe lénde, i jone perna tel ĥerá péskire pishar'jengire, i tén'či tumé dodžinenape, so jangoléngire-bolybnáskiro, Raj Devél, bičhadiá Man.

¹⁰Jav bahtalý i rádynpe, Sionóskiri čhajo! Pal-dová so, ake, Me javáva i lavá te dživáv dre túte andrál’, — rakiréla Raj Devél.

¹¹— I priprastana ke Raj Devél butdžine manušá dre dová dyvés i jone javéna Léskire manušá; i Jov léla te dživél dre tuménde andrál, i tumé dodžinepe, jangoléngire-bolybnáskiro Raj Devél bičhadiá Man ke tu.

¹²Tén'ci Raj Devél léla dro xulaiben Judas, sýrby Péskiri miéra dro mištypén pe svénto phuv, i nevéstyr (nevés) vykedéla Jerusalimo.

¹³‘Mek štyl te javél každo loč (plot') angíl muj Devléskiro! Pal-dová so Jov ĥazdélape Péskire sventoné štetóstyr!”