Read Biblija - Pe Baltitko Romani čib (Romanes) 2019 Baltic Romani Bible Zahárija 4 Bible Online

Zahárija 4 - Biblija - Pe Baltitko Romani čib (Romanes) 2019 Baltic Romani Bible bible

Zahárija 4

¹I risijá dová Jangólo, savó rakirdiá mánca, i džangadia man, syr džangavena manušés soibnastyr leskirestyr.

²I phendiá jov mánge: “So tu dykhésa?” I otphenavas me: dykháva momolýtko (svietíl'niko) saró suvnakástyr i tahtajoro (čašečka) vaš maslinitko dzet uprál léste, i eftá momolengire (lampady) pe léste, i pe eftá trubkicy ke momolengire, savé isyn uprál léste;

³I duj maslinki pe léste, jekh pe čačí rig tahtajorestyr, javír pe zérvo (liévo) rig léskiri.

⁴I otphenavas me i phendjom Jangoloske, savó rakirdiá mánca: “So davá isyn, Rajo miro?”

⁵Tén'ci Jangólo, savó rakirdiá mánca, otphenélas i phendiá mánge: “Ci tu na džinésa, so davá isyn?” I phendjom me: “Na džinóm, Rajo miro.”

⁶Tedy otphenélas jov i phendiá mánge: “Adiáke: davá isyn lav Ráskire-Devléskiro ke Zorovavieljo, savó rakiréla: ‘Na muršypnasa i na zorjása, ne Duhósa Miresa’”, — rakiréla jangoléngire-bolybnáskiro, Raj Devél.

⁷“Kon san tu, bari bérga angíl Zorovavieljoste! Tu san plosko phuv (loščýna), i vylydžala jov venglytko bar, i saré zadena gódla: ‘Bahtalypén, bahtalypén pe léste!”

⁸I sys ke me lav Ráskire-Devléskiro, pheny:

⁹“Zorovavieljoskire vastá kerdé fundámiento dalé Kheréske (Khangirjake); léskire vastá i končinena les, tedy tu dodžinesape, so jangoléngire-bolybnáskiro, Raj Devél, bičhadiá Man ke tumé.

¹⁰Pal-dová so, kon moginéla te duminel; so dyvés davá isyn na drieván važno, kiéli dasavé radymása dykhéna pe urovnjo dre vastá Zorovavieljoskire, odolé eftá (bitrinéngiro deš), davá isyn jakhá Ráskire-Devléskire, savé obuhtylena dykhibnasa sarí phuv?’”

¹¹Tedy otphenavas me i phendjom léske: “So sykavéna dolé duj maslinki pe čačí rig šandaloskiri i pe zérvo rig léskiri?”

¹²Javír mólo lyjom me te rakiráv i phendjom léske: “So sykavéna duj maslinitka randiá (vétki), savé pirdál duj suvnakuné trubkicy čhuvéna péstyr suvnakái?”.

¹³I phendiá jov mánge: “Ci tu na džinésa, so davá isyn? Me otphenavas: “Me na džinóm, Rajo miro.”

¹⁴I phendiá jov: “Davá isyn dujdžiné manušá, savén makhne maslinitkone dzetesa, i savé isyn otphenybnaskire angíl saré-phuvjákire Raste-Devléste.”