Read Biblija - Pe Baltitko Romani čib (Romanes) 2019 Baltic Romani Bible Zahárija 5 Bible Online

Zahárija 5 - Biblija - Pe Baltitko Romani čib (Romanes) 2019 Baltic Romani Bible bible

Zahárija 5

¹I nevéstyr (nevés) gazdyjom me jakhá miré i dykcjom: ake, vurniala svítko (skrencly papira).

²I phendiá jov mánge: “So dykhésa tu?” Me otphenavas: “Me dykháva svítko, savó vurniala; dlengipén léskiro isyn biš kuniá (logci), buĥlypén léskiro isyn deš kuniá.”

³Jov phendiá mánge: “Davá isyn prokošybén (arman), savó jačéla pe rig saré phuvjákiri; pal-dová kažno (sváko), kon čorela, javéla xasiakirdo, syr isyn čhindló pe jekh rig, i kažno, kon déla xohany sovél, xasiakirdo javéla, syr isyn čhindló pe javír rig.”

⁴‘Me zalydžijom les’, — rakiréla jangoléngire-bolybnáskiro, Raj Devél, — i davá javéla dro čoreskiro kher i dro kher odoleskiro, kon déla xohany sovél Miré lavésa i jačéla dro kher léskiro i xasiakirla les, i kaštá léskire, i bará léskire.

⁵I vygijá Jangólo, savó rakirdiá mánca, i phendiá mánge: “Ĥazde iščo (inké) jakhá tyré i dykh, so da vydžála?”

⁶Kiéli že me phendjom: “So davá isyn? Jov otphenélas: “Davá vydžála efa (khudo), i phendiá: “Davá isyn patrín (óbrazo) léngiro pir sarí phuv.”

⁷I ake, kotér molovi (svinco) ĥazdyjápe, i odój isys bešty jekh džuvlý maškír efa.

⁸I phendiá jov: “Adaja džuvlý — kokoró bipatyvalypen”, i čhurdyjá la dre efa maškirál, ne pe otvierstijo (pe kula) lákiri čhurdyjá kotér molovanó (svincovo).

⁹I gazdyjom me jakhá miré, i zadykhcjom: ake, javné duj džuvliá, balvál phurdelas dre léngire phaká (kryly), i phaká lénde — syr phaká boc(t)ianoskire; i ĥazdyné jone efa i lydžiné la maškír phuv i bolybén.

¹⁰I phendjom me Jangoloske, savó rakirdiá mánca: “Kaj lydžána jone daja efa?”

¹¹Tén'ci phendiá jov mánge: “Sob (kaj) te kerén vaš láke kher pe phuv Senaar, i, kiéli saró javéla kerdó, tedy joj čhuvélape odój pe péskiro fundámiento.”