Read Biblija - Pe Baltitko Romani čib (Romanes) 2019 Baltic Romani Bible Zahárija 6 Bible Online

Zahárija 6 - Biblija - Pe Baltitko Romani čib (Romanes) 2019 Baltic Romani Bible bible

Zahárija 6

¹I nevéstyr (nevés) ĥazdyjom me jakhá miré i dykháva: ake, štar maribnýtka vurdená (koliesnicy) vydžánas maškír duj bérgi; ne bérgi dolé isys bérgi xarkuné (miedítka).

²Dro pérvo vurdén andré dyné grajo lolé, ne dro javír vurdén — grajo kalé.

³Dro tríto vurdén grajo parné, ne dro štárto vurdén graja syva, zoralé.

⁴I lyjom me te rakiráv, i phendjom Jangoloske, savó rakirdiá mánca: “So davá isyn, Rajo miro?”.

⁵I otphenélas Jangólo i phendiá mánge: “Davá isyn štar bolypnaskire dúhi, savé isyn otphenybnaskire angíl Raste-Devléste saré phuvjakireste.

⁶Kalé grajo odój vydžána pe rig paš-ratítko (sievierno), i parné našéna pale lénde, ne syva džána pe rig paš-dyvesýtko (južno).

⁷I zoralé vyginé i kamlé te džán, sob (kaj) te džán duredýr pir phuv; i jov phendiá: “Džán i džán pir sarí phuv”, — i jone giné pir sarí phuv.

⁸Tedy khardiá jov man i phendiá mánge: “Adiáke, dykh, savé vyginé pe paš-ratítko (sievierno) phuv, kovliakirdé Miro dúho (fáno) pe phuv paš-ratítko.”

⁹I sys Ráskire-Devléskiro lav ke me, pheny:

¹⁰“Le odoléndyr, savé javné plienóstyr, ke Xieldajo, ke Tovija i ke Iiedajo, i džá dro dová kokoró dyvés, džá dro kher Iosijáskiro-Sofonijoskire čhavéskiro, kaj jone javné Vavilonóstyr,

¹¹Le léndyr rup i suvnakáj i ker kralítka stadyká (korony) i čhuv po šeró Isusóskiro, Iosiediekoskire čhavéskiro, baré rašaskiro,

¹²i phen léske: — “Adiáke rakiréla jangoléngire-bolybnáskiro Raj Devél: ‘Ake, Murš, — lav Léskiro Otbarjakiriben, Jov barjola Péskire kornjostyr (rukhestyr) i keréla Khangirí Devléskiri.

¹³Jov keréla Khangirí Ráskire-Devléskiri i priléla sláva, i léla te bešél syr barydyró pe Péskiro trono; javéla i rašáj pe Péskiro trono, i lavengiro ramánjo (miro) javéla maškír dová i javír.

¹⁴A dolé kralitka stadyka javéna Xieliemoske i Tovijaske, Iiedajoske i Xienoske, Sofronijaskire čhavéske, vaš ripiribén dro Devléskiri Khangirí.

¹⁵Duralypnastyr javéna i khetané javirenca léna te ĥazdén Khangirí Ráskire-Devléskiri, i tumé dodžinenape, so jangoléngiro-bolybnáskiro, Raj Devél, bičhadiá man ke tumé, i davá javéla, kiéli tumé zoralés léna te kandén zan tumaré Ráskire-Devléskiri.”