Read Biblija - Pe Baltitko Romani čib (Romanes) 2019 Baltic Romani Bible Zahárija 7 Bible Online

Zahárija 7 - Biblija - Pe Baltitko Romani čib (Romanes) 2019 Baltic Romani Bible bible

Zahárija 7

¹Dro štárto berš kralískiro Darijoskiro sys lav Ráskire-Devléskiro ke Zahárija, pe štárto dyvés jeniáto (bijekhéskiro déšto) čhon, Xaslievo.

²Syr Viefil'[3] bičhadiá Sariecieros i Riegiem-Mieliehos i malen pir drom (sputniken) leskiren te mangénpe Ráske-Devléske angíl muj Léskiro,

³i te phučén rašandyr, savé sys dre Khangirí, Ráskire-Devléskiri, jangoléngire-bolybnaskiri i prorokendyr, rakirí: “Ci trej mánge te rovav dro pándžto čhon i te rikirav posto, so me keravas uže but berš?”

⁴I sys ke me láva jangoléngire-bolybnáskiro Ráskire-Devléskiro:

⁵“Phen sarénge phuvjákire manušénge i rašange adiáke: ‘Kiéli tumé rikirenas posto i rovenas dro pándžto i eftáto čhon, i davá uže eftadešá berš, — ci vaš Mánge tumé rikirde posto? Ci vaš Mánge?

⁶I kiéli tumé xána, i kiéli tumé p'jena, ci na vaš péske tumé xána, ci na vaš péske tumé p'jena?

⁷Ci na ‘dasavé kokoré lavá phenelas Raj Devél angledýr pirdál ĥaratuné prorokénde, syr dro Jerusalimo sys iščo (inké) but manušá i pokojnyma, i dre pašylatune fórja, dre paš-dyvesýtko (južno) rig i pe Telatuny Phuv dživénas but manušá?’”

⁸I sys lav Ráskire-Devléskiro ke Zahárija:

⁹“Adiáke rakirélas Raj Devél jangoléngire-bolybnáskiro: ‘Kerén séndo čačipnytko i sykavén láska i (žalima) kažno vaš péskire pšaléske;

¹⁰Pivlién (udoven), pirotén (siroten), čužones i čorores te na pritasaven i te na rikirén xolý jekh pe javiréste dro iló tumaró.”

¹¹Ne jone na kamlé te kandén, otrisine Mándyr, i kaná péskire ottyrdyne, sob (kaj) te na šunén.

¹²I iló péskiro zakerde baresa, sob (kaj) te na šunén Zakóno i lavá, savé bičhavelas jangoléngire-bolybnáskiro Raj Devél, Duhósa Peskiresa pirdál ĥaratuné prorokénde; vaš dová i doresciá len bari xolý jangoléngire-bolybnáskire Rástyr-Devléstyr.

¹³I sys: syr Jov obrisjolas, a jone na šunenas, adiáke i jone obrisjonas, a Me na šunavas,” — rakiréla jangoléngire-bolybnáskiro Raj-Devél.

¹⁴I Me rosčhurdyjom len riskiribnáskire balvaliasa pir saré manušénde, savén jone na džindlé. I daja phuv čhučija bi léngiro, so nikón na psirdiá pirdál láte ni angle, ni pale, i jone kerdé dalé bahtalé rigátyr čhučí phuv.”