Read Biblija - Pe Baltitko Romani čib (Romanes) 2019 Baltic Romani Bible Zahárija 8 Bible Online

Zahárija 8 - Biblija - Pe Baltitko Romani čib (Romanes) 2019 Baltic Romani Bible bible

Zahárija 8

¹I sys lav jangoléngire-bolybnáskiro, Ráskire-Devléskiro:

²“Adiáke rakiréla jangoléngire-bolybnáskiro Raj Devél: ‘Rosholiasyjom Me pe Sióno baré xolynása, i baré xoliása xoliasyjom Me pe léste’.

³Adiáke rakiréla Raj Devél: ‘Obrisjovava Me ke Sióno i Me láva te dživáv dro Jerusalimo, i léla te kharelpe Jerusalimo ‘čačipnáskiro fóro’, i bérga jangoléngire-bolybnáskire Ráskire-Devléskiri — Sventymakiri Bérga.’

⁴Adiáke rakiréla jangoléngire-bolybnáskiro, Raj Devél: ‘Nevéstyr phuré i phurja léna te bešén pe vulícy (gásy) dro Jerusalimo, kažno kaštoresa dro vast pir dová, so baré beršá lénge.

⁵I vulícy (gásy) dalé foróskire javéna pherdé terné-baršengirenca i terné-beršengir'ienca, savé léna te broinen pe léskire gásy.

⁶Adiáke rakiréla jangoléngire-bolybnáskiro Raj Devél: ‘Kóli davá vaš narodo, savó jaciápe, sykadjola divno dre dyvesá dalé, tedy naušto davá isyn divno i vaš Mánge?’ — rakiréla Raj Devél, jangoléngire-bolybnáskiro.

⁷Adiáke rakiréla jangoléngire-bolybnáskiro Raj Devél: ‘Ake, Me vyrakhava Miré manušén vastokoskire rigátyr i rigátyr, kaj peréla kham;

⁸Me janáva pale len, i jone léna te dživén ke Jerusalimo, i javéna Miré manušá (manušénca), i Me javáva léngiro Devél, pir patiaibén i dro čačipén.’

⁹Adiáke rakiréla jangoléngire-bolybnáskiro Raj Devél: ‘Zoraliakiren tumé vastá tumaré, kon šunéla akaná lavá dalé prorokéngire vuštendyr, savé sys pašýl, syr sys kerdó Kher (Khangirí) jangoléngire-bolybnáskiro Ráskire-Devléskiro, sob (kaj) te ĥazdelpe Khangirí.

¹⁰Pal-dová so angledýr odolé dyveséndyr na sys pleskiriben vaš manušéske, na sys pleskiriben vaš butý guruvengiri, ni odoléske, kon javéla, ni kodoléske, kon džála, na sys ramánjo (miro) vergéndyr; i domekavas Me, sob (kaj) kažno manúš te javél vérgo javireske.

¹¹I kaná vaš Miré manušénge, savé jačnépe, Me na som adasavó, syr sómas ĥaredyr,’ — rakiréla Devél, jangoléngire-bolybnáskiro.

¹²Pal-dová so sieindlo giv javéla te del pribaripen, vinagradýtko xrústo déla péskire muricy, ne phuv déla, so joj barjakirdia, i bolybén déla pahlyn (rosa) péskiri: i saró davá Me dáva adákicy manušénge, savé jačénape.

¹³I javéla: syr tumé, Judáskiro kher i Izrailjoskiro kher, sánas prokošle, maškír Najudytkoné nácyi, adiáke Me zrakháva tumen, i tumé javéna vaš javirénge bahtalé; na andyršan, mek te javén tumaré vastá zoralé!”

¹⁴Pal-dová so adiáke rakiréla, jangoléngire-bolybnáskiro Raj Devél: “Syr Me dyjom godý Péske te sendiakirav pharés tumen, kiéli tumaré dadá xoliakirenas Man, — rakiréla Raj Devél, — i Me na otphendjompe adalestyr,

¹⁵adiáke nevéstyr zadumindjom Me dre dalé dyvesá te keráv lačhipén Jerusalimoske i Judáskire kheréske; na andyršan!

¹⁶Ake, butiá, savé tumé san bangé te kerén: phenén čačipén jekh jekhéske, piró čačipén i ramánjo (miro) sendiakiren ke pórta tumarí.

¹⁷Nikón tuméndyr, mek te na rikirél dro iló péskiro xolý pe semencende peskirende, na kerén xohany sovél; pal-dová so saró davá Me bidykhava,’ — rakiréla Raj Devél.

¹⁸I sys ke me lav jangoléngire-bolybnáskire, Ráskire-Devléskiro:

¹⁹Adiáke rakiréla jangoléngire-bolybnáskiro Raj Devél: Posto dro štárto čhon i posto dro pándžto čhon, i posto dro eftáto čhon i dro déšto, mek te javél vaš kher Judáskiro radymakiro i bahtaló svénko; féni tumé san bangé te rikirén čačipén i ramánjo.’

²⁰Adiáke rakiréla jangoléngire-bolybnáskiro Raj Devél: “Iščo (inké) javéna te javén javír manušá i džiibnáskire buté for'jéndyr;

²¹I javéna manušá jekhe foróstyr ke manušá javire foróstyr i phenéna: “Javén te mangaspe angíl Raste-Devléste i te rodas jangoléngire-bolybnáskire Ras-Devlés”; i kažno phenéla: “džáva i me.”

²²I javéna but nácyi i zoralé narody, sob (kaj) te lathén Ras-Devlés, jangoléngire-bolybnaskires, dro Jerusalimo i te mangenpe patier'iasa angíl muj Raste-Devléste.

²³Adiáke rakiréla jangoléngire-bolybnáskiro Raj Devél: “Javéla dre dolé dyvesá, so dešdžine javire-čib'jengire Najudytkoné nacyiéndyr, lenape pal jagóro (pal pódia) pe ídi Judaskiri i phenéna: ‘Ame džása túsa, pal-dová so ame šundiám, so tuménca isyn Devél.’”