Read Biblija - Pe Baltitko Romani čib (Romanes) 2019 Baltic Romani Bible Zahárija 9 Bible Online

Zahárija 9 - Biblija - Pe Baltitko Romani čib (Romanes) 2019 Baltic Romani Bible bible

Zahárija 9

¹Angilphenybén Ráskire-Devléskiro pe phuv Xadrah, pe Damásko jov adiáke-pac' (tež) jačélape; pal-dová so jakh Ráskire-Devléskiri isyn pe saré manušénde, syr i pe saré Izrailjoskire, —

²I pe Jemafo, savó isyn pašýl léste, pe Tíro i Sidono, pal-dová so jov isyn drieván godó.

³I kerdiá péske Tíro vučardý (bašnia), skedyjá rup, syr práho, i suvnakái, syr mel javrí pe gása.

⁴Ake, Raj Devél keréla les čororesa i xasiakiréla zor léskiri dro mórjo (derjáv), a kokoró jov javéla xasiakirdo jagása.

⁵Syr dykhéla la da Askalono i léla te darel, i Gaza adiáke-pac' léla te trinskirelpe, i Ekrono; pal-dová so na vykerlape e nadiéia léskiri: na javéla králi dre Gaza, ne Askalono jačéla bi manušéngiro.

⁶“Čužo nacyja léla te dživél ke Azoto, i Me xasiakiráva phut'kirdé Filistimlianen.

⁷Me vytyrdava rat léskire móstyr i džungalypén léskire dandendyr, i jov perela tel zor Devléske amareske, i javéla syr barengiro dre Juda, ne Jekrono javéla, syr Jevusiejo.

⁸I Me čhuváva lod (stáno) pašýl Kher Miro muial xaladénde, muial odolénde, so psirén angle i pale, i na javéla butýr adáj te psirél vérgo; pal-dová so akaná Miré jakhénca Me láva te dykháv pe davá.

⁹Rádynpe zoralés bahtiatyr, Sionóskiri čhaj, de gódla radymátyr, Jerusalimóskiri čhaj: ake, králi tyró javéla ke tu, čačipnáskiro i zrakhibnaskiro, kovlé-ilytko, uklisto pe oslicate i pe terné osloste, saveskiri daj psirdiá telo ĥámo.

¹⁰Tén'ci Me xasiakiráva maribnýtka vurdená dro Jefriémo i gren dro Jerusalimo, Me xasiakiráva maribnýtko lúko; i Jov phenéla pal ramánjo manušénge, i Léskiro kralipén javéla morjostyr (derjavestyr) ke mórjo (derjáv), i rekátyr (leniátyr) ke/žýko phuvjákiro jagóro (ke kónco).

¹¹Akaná pal túte — vaš rat miré phenybnaskiro zavietostyr Me mekava pe vólia tyré starde manušén dalé xoripnastyr, dro savó nane paní.

¹²Risjon ke tvárdyma (diz) tumé, starde manušále, savénde isyn iščo (inké) nadiéia! Dová, pal so akaná rakiráva, Me otpleskirava túke (duj móly).

¹³Pal-dová so Me syr lúko nadtyrdava Péske Judas i pherdiakirava lúko Jefriemosa, i ĥazdáva čhavén tyrén, Sióne, pe čhupnar'iande, Ionija, i Me keráva tútyr maribnýtko kurtála zoralé-manušeskiri.

¹⁴I javéla uprál lénde Raj Devél, i syr bliskavica vurniala javrí maribnýtko bust (striela) Léskiri, i zagriminela Raj Devél dro rógo (truba) i sykadjola maškír paš-dyvesýtko (južno) riskiribnaskiri balvál.

¹⁵Raj Devél jangoléngire-bolybnáskiro, léla te zaterdjol pal lénde, i jone léna te xasiakirén i te štakiren bará, savé čhurdenpe, jone léna te p'jen i te den gódla sýrby moliátyr (vinostyr) i pherdjona tahtaja (čašy) vaš svénta dyibená, syr altarjoskire véngly.

¹⁶I zrakhéla len Raj Devél, léngiro Devél dro dová dyvés, syr bakrén Péskire ĥurtostyr; pal-dová so syr kuč bará pe kralítko stadyk (koróna), jone javéna te ziainen pe Léskiri phuv.

¹⁷O, syr baró isyn Léskiro lačhipén i savó isyn šukaripén, gožyma Léskiri! Maro rosphandela čib terné manušénge, i mol (vino) — tyrne džuvlienge!