Read Biblija - Pe Baltitko Romani čib (Romanes) 2019 Baltic Romani Bible Malahiia 1 Bible Online

Malahiia 1 - Biblija - Pe Baltitko Romani čib (Romanes) 2019 Baltic Romani Bible bible

Malahiia 1

¹Angilphenybén Ráskire Devléskiro Izrailjoske, savó piridyja o Malahiia.

²“Tumé jačné dróga Mánge”, — phendiá Raj Devél. — Ne tumé rakiréna: “Syr Tu sykadian láska amen?” “Ci na sys Isávo Jakovóskiro pšal?” — phendiá Raj Devél. “Ne Me usajékh vykedyjom Jakovós,

³ne Me lyjom te bidykhav Isavos, i Me kerdjom léskire bergendyr čhučó štéto, i Me otdyjom léskiro mištypén šakalenge pe čhučí phuv.”

⁴Kóli Edómo (Isavóskire radostyr) phenéla: “Ame sam rosphagirdé dre ruíny, ne ame nevés čhuvasa phagirdé štéty”, — adiáke phenéla jangoléngire-bolybnáskiro Raj Devél: “Jone nevés čhuvéna phagirdó, ne Me phagirava telé davá. E manušá javéna te kharén davá štéto ‘Zlydnitko Phuv,’ i pe kadalé manušénde Raj Devél ŭsády (sak) javéla dre naradyma.”

⁵I tumaré jakhá dykhéna davá, i tumé phenéna: ‘Baripén Ráskire-Devléskiro piridžala miéža Izrailjoskiri’.

⁶“O čhavó keréla patýv péskire dadéske, i o pishári léskire ráske: kóli Me som Dad, kaj ža isyn xor patýv Mánge? Kóli Me som Raj Devél, kaj ža isyn patýv Mánge?”, — rakiréla jangoléngire-bolybnáskiro Raj Devél tuménge, rašaja, savénde nane dre patýv Miro lav. Ne tumé phenéna: “Dro so ame na sykavasa patýv Tyré lavéske?”

⁷Tumé janéna došvalo (magirdó) maró pe Miro altárjo, i iščo (inké) tumé phenéna: “Dro so ame došvaliakirdiam Tut?” Dro dová, so tumé rakiréna: “Skamínd Ráskire-Devléskiro isyn bipatyvakiro.”

⁸“I kóli tumé janéna korores syr svénto dyibén, ci nane davá bibáht? I kóli tumé janéna langales i nasvales syr svénto dyibén, ci nane davá bibáht? Janén kadasavó dáro akaná tumaré thagariske (kniazjoske): ci javéla jov te radynélpe tuméndyr? Ci priléla jov tumen ilésa?”, — rakiréla jangoléngire-bolybnáskiro Raj Devél.

⁹Ne akaná me, Malahiia, mangáva tumen, sob (kaj) tumé zoralés te mangénpe Devléske, sob (kaj) te sykavél Jov láska (tangipén) tuménge. “Kóli dasavo svénto dyibén došvale murdaléndyr (žyvjolendyr) keréna tumaré vastá, tedy ci prilava Me les ilésa?”, — rakiréla jangoléngire-bolybnáskiro Raj Devél.

¹⁰“Ci isyn vari-kon maškír tuménde, sob (kaj) jov fedýr te phandel vudará, i te na roshačkiren tumé jag ivjá (naprásnes) pe Miro altárjo? Me na radynavape tuméndyr”, — rakiréla jangoléngire-bolybnáskiro Raj Devél. I Me na prilava svénto dyibén tumaré vasténdyr.

¹¹Miré lavéske javéla bari patýv maškír Najudýtka nácyi (narody), odothýr, kaj kham uštéla i ke dová štéto, kaj kham zadžála. Pe kažno štéto drogoné-smolakiro thuvipen javéla Mánge, žužó svénto dyibén; vaš dová, so Miré Lavéske javéla bari patýv maškír Najudýtka nácyi,” — rakiréla jangoléngire-bolybnáskiro Raj Devél.

¹²“Ne tumé teliakirena Man, adiáke rakirí: ‘Skamínd Ráskire-Devléskiro isyn nažužo, i nane lačhipén léstyr, léskiro xabén isyn bipatyvakiro.’

¹³Tumé iščo (inké) rakiréna: ‘Ake, kicý isyn butý!’ I tumé sungena bipatyvakires pašýl léste” — rakiréla jangoléngire-bolybnáskiro Raj Devél. “I tumé janéna čordo, langalo i nasvaló; adiáke-pac' tumé janéna i mareskiro svénto dyibén! Ci mogináva Me ilésa te prilav davá tumaré vastéstyr?”, — rakiréla Raj Devél.

¹⁴“Te xasjol xohanó manúš, konéste isyn lačhó bakro dre stada, i savó sovlahala, ne savó janéla došvale bakrés Ráske-Devléske, — pal-dová so Me som baró Králi”, — rakiréla jangoléngire-bolybnáskiro Raj Devél, — i “Miro lav trašavela Najudýtka nácyi.”