Read Biblija - Pe Baltitko Romani čib (Romanes) 2019 Baltic Romani Bible Malahiia 2 Bible Online

Malahiia 2 - Biblija - Pe Baltitko Romani čib (Romanes) 2019 Baltic Romani Bible bible

Malahiia 2

¹“I akaná, rašajale, davá priphenybén isyn tuménge.

²Kóli tumé na javéna te šunén, i kóli tumé na priléna ilésa, sob (kaj) te barjakirén Miro lav,” — rakiréla jangoléngire-bolybnáskiro Raj Devél, — tedy Me bičhaváva prokošybena (armania) pe tuménde, i Me keráva prokošybena (armania) pe tumaró bahtiakiribén: čačó, Me akaná kerdjom prokošybén (arman), pal-dová, so tumé na priléna ilésa Miro lav.

³Ake, Me otlava psikó tuméndyr [štyliakirava tumaró ródo-ju.o.], i Me rosčhurdava ĥnejo pe tumaré muiá, ĥnejo tumaré svenkendyr; i tumen lydžána krig khetané ĥnejosa.

⁴I tumé tedy javéna te džinén, so Me bičhadjom davá priphenybén tuménge, sob (kaj) Miro Zavieto Lievijosa/te rikirelpe (te zrakhelpe) duredýr”, — phendiá jangoléngire-bolybnáskiro Raj Devél.

⁵“Miro Zavieto lésa sys vaš džiibén i ramánjo, i Me dyjom davá zavieto léske, sob (kaj) jov te poddarel Mándyr, i sob (kaj) jov te rikirél xor patýv angíl Miro lav.

⁶Te javél Zakóno čačipnáskiro, pe léskiri čib, i sob (kaj) te na lathén načačipnaskire lavá pe léskire uštá, ne sob (kaj) jov te psirél pir Miro lav dro ramánjo i rovnone (vortone) dromésa, i, sob (kaj) jov te riskirél buten dre rig grehéndyr.

⁷Pal-dová so rašaskire uštenge trej te prirakhen džinybén, sob (kaj) manušá te rodén džinybén pal Devléste léskire uštendyr; pal-dová so jov isyn zvies'/zaniá — janybnaskiro (viestniko), jangoléngire-bolybnáskire Rástyr-Devléstyr.

⁸Ne tumé durine (otginé) droméstyr; tumé kerdé adiáke, so but manušá dynepe dukhá pir Zakóno, tumé otlydžinepe bipatyvakires Lievijoskire Zavietosa”, — rakiréla jangoléngire-bolybnáskiro Raj Devél.

⁹“Paldavá Me adiáke kerdjom tumen nakutiakirde (priezriennone) i džungalé manušénca angíl saré manušénde, adiáke syr tumé na rakhne Miré dromá, i tumé prilenas manušéngiri rig dro Zakóno Devléskiro.”

¹⁰Ci nane Jekh Dad tuménde? Ci na Jekh Devél sozdyjá amen? Sóske da ame kerása nahratyma (jačasa syr napatiaibnytka jekh proti jekhéste), kiéli ame magirasa zavieto dadéngiro?

¹¹Juda kerdiá nahrates (napatiaibnytkes), i džungalé réndy (diély) kerénape dro Izrailjo i Jerusalimo: O Juda kerdiá bipatyv Ráskire-Devléskire sventoné štetoske, savó les prityrdyja, kiéli jov lyjá džuvliá péske rodóstyr, savó keréla patýv čužoné devloreske.

¹²Mek te xasiakirél Raj Devél manušén Jakovóskire šatrendyr, kon keréla davá: odolés, savó isyn pe stréga (kon sykliakiréla davá, i odolés, savó sykljola léstyr); i kodolés, kon janéla svénto dyibén jangoléngire-bolybnáskire Ráske-Devléske.

¹³I so iščo (inké) tumé keréna: tumé učhakirena Ráskire-Devléskiro altárjo jasvénca, rovi i dyi gódla, pal-dová so Jov butýr na kutiakirela svénto dyibén, i na priléla janybén laskasa tumaré vasténdyr.

¹⁴Ne tumé rakiréna: “Pal so?” Davá isyn paldová, so o Raj Devél isys jakhítko (svidietieljo) maškír túte i romniáte tyré ternypnastyr, konés tu jačkirdian bipatyvakires; ne joj isyn tyrí malny (podruga) džiibnáskire-dromeskiri, joj isyn tyrí romný pir zakóno.

¹⁵Ci na sozdyjá Devél tut i tyré romniá syr jekh, savénde isyn jekh dúho? Sóske že jekh? Jov kamdiá, sob (kaj) léste te javél ródo Devlikane čhavéndyr. Paldavá rikirén tumaró dúho, i mek nijékh te na kerél napatiaibnytkes romniása péskire ternypnastyr.

¹⁶“Pal-dová so Me naštý te dykháv pe rozlydžaiben [kóli tu na kamésa la, to otmek-r.s.],’ — rakiréla Raj Devél, Devél Izrailjoskiro,” — ‘pal-dová so kadasavó manúš učhakiréla pes nahratymasa syr idiasa, paldavá rikirén tumaró dúho, sob (kaj) tumé te na kerén napatiaibnytkes.

¹⁷Tumé khiniakirde [holiakirena-r.s.] ke xolý Ras-Devlés tumaré lavénca, kiéli phučena tumé: “Sósa ame khiniakirdiam Les?” Ake, kiéli tumé rakiréna: “Kažno (sváko), kon keréla bibáht (xolý), isyn lačhó vaš Ráske-Devléske, i Jov drieván radynélape léndyr,” cji, “Kaj isyn čačipnáskiro Devél?”