Read Biblija - Pe Baltitko Romani čib (Romanes) 2019 Baltic Romani Bible Malahiia 3 Bible Online

Malahiia 3 - Biblija - Pe Baltitko Romani čib (Romanes) 2019 Baltic Romani Bible bible

Malahiia 3

¹“Ake, Me bičhaváva Miré Jangolós (zvies'-janybnaskires), i jov keréla drom angíl Mánde. O Raj Devél, Saves rodéna tumé, javéla ke Péskiri Khangirí, i Jangólo (zvies'-janybnaskiro) pe davá zavieto, Saves kaména tumé: ake, Jov džála”, — rakiréla jangoléngire-bolybnáskiro Raj Devél.

²Ne kon vyrikiréla [saštý te vyrikirel-ju.o.] davá dyvés, kiéli Jov javéla? Kon vyterdjola [saštý te vyrikirel-ju.o.], kiéli Jov sykadjola? Jov javéla sýrby jag, saví rozbilavela (rosplavinela), sýrby šutlo sapuni (ščolko), savó žužakirela rup.

³Jov bešéla sýrby spieco, savó piribilavela (piriplavinela) i žužakirela rup, i Jov žužakirela čhavén Lievijoskiren i piribilavela len syr suvnakáj i rup, sob (kaj) jone saštý te janén Ráske-Devléske svénto dyibén dro čačipén.

⁴Tén'ci svénto dyibén Judáskiro i Jerusalimoskiro javéla lačhó Ráske-Devléske, syr dre garatune beršá, syr dre beršá vagedyr (angledýr).

⁵I Me javáva pašyledýr ke tumé te sendiakirav pharés tumen; Me javáva syr sýgno dudvalo (obličytieljo) proti džinybnaskiren pir čergeniá (čaradiejen), proti biladžakuneskiren (blendar'jen), proti odolénde, kon xohanés sovlahala; proti odolénde, kon xohavela lavénca butiarnen, i proti odolénde, kon pritasavela pivlien (udoven), i piroten (siroten), i proti odolénde, kon risjola dumesa ke javire — theméskire-manušéskiro pravo, — adiáke syr jone na daréna Mándyr”, — rakiréla jangoléngire-bolybnáskiro Raj Devél.

⁶“Pal-dová so Me, Raj Devél, na parudjovava, paldavá tumé, čhavé Jakovóskire, na xasiné.

⁷Ne tumé risiné krig Miré statutendyr (ustavendyr) dolé dyveséndyr, kiéli sys tumaré dadá, i tumé na rakhne len. Risjon ke Me, i Me risjováva ke tumé”, — rakiréla jangoléngire-bolybnáskiro Raj Devél. Ne tumé rakiréna: ‘Syr aménge te risjovas?’

⁸Ci saštý manušéske te xohavél Devlés? Ne tumé ž xohavena Man! Ne tumé phučena: ‘Dro so ame xohadiam Tut?’ — Dre dešengirja i dre svénta dyibená.

⁹Pe tuménde phendlé armania (tumen prokošne), ne tumé xohade Man, tumé — sarí tumarí nacyja.

¹⁰Janén céla dešengirja dre piralý, sob (kaj) te javél xabén dro Miro kher, i sprobinen Man dalésa akaná, — rakiréla jangoléngire-bolybnáskiro Raj Devél, — ci psiravava (otkerava) Me fenštry pe bolybén i bičhaváva tuménge adákicy bahtiakiribena, sob (kaj) te na uhtylel štéto te prilén len.

¹¹I Me keráva adiáke, so kirme butýr te na xan sarésa barjakirdé (plódy), so tumarí phuv déla, i sob (kaj) vinagradýtko xrústo te na pirijačel te del múri pe félda,” — rakiréla jangoléngire-bolybnáskiro Raj Devél;

¹²I saré manušýtka nácyi javéna te kharén tumen bahtalenca, pal-dová so tumarí phuv javéla kamly, — rakiréla jangoléngire-bolybnáskiro Raj Devél.

¹³Tumé phendlé xoliamé lavá pe Mánde, — rakiréla Raj Devél, — Ne tumé phučena: So dasavo ame rakirasa pe Túte?

¹⁴Tumé ž phendlé: “‘Nane mol te dynarinás Devléske; i savó kófo (pol'za) isyn daléstyr, so ame rakhasa Léskire statutna uphenybená, i so ame psirasa tugasa (piečaliasa) angíl jangoléngire-bolybnáskire Raste-Devléste?

¹⁵I akaná ame dykhasa i rakirasa, so phut'kirdé manušá isyn bahtalé, pal-dová so odolé, kon keréla zlydnima (fuipén), dživéna fedýr dyvés dyveséstyr, i, čačó, kodolé, savé propatiakirena Devlés, jačénape džidé [bidošakire-ju.o.].’”

¹⁶Tén'ci odolén, savé darándyne Rástyr-Devléstyr i rakirdé jekh jekhéske: “Len o Raj Devél léla te šunél i pošunela; i adiáke čhindiape lylvarí ripiribnytko angíl Léste pal kodolende, kon daréla Rástyr-Devléstyr i rozlela godiása [rikiréla dro iló-r.s.] Léskiro lav.”

¹⁷Jone javéna Miré, — rakiréla jangoléngire-bolybnáskiro Raj Devél, — dro dová dyvés, syr Me keráva léndyr Miro kučipén. I Me javáva te tanginav (žalinav) len, syr o manúš tanginela Péskire čhavés, savó dynarinela léske.

¹⁸Tén'ci tumé nevéstyr rozĥaljona lačhés maškír patiaibnaskirende i fujé manušénde; maškír kadalende, kon dynarinela Devléske i odolénde, kon na dynarinela Léske.