Read Biblija - Pe Baltitko Romani čib (Romanes) 2019 Baltic Romani Bible Matfiejo 1 Bible Online

Matfiejo 1 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 1

¹Lylvarí (kniga) pal Isusóskiro Xristosóskiro ródo, Davidóskire Čhavéskiro, Avramoskire Čhavéskiro.

²Avrámo sys Isakóskiro dad, Isako sys Jakovóskiro dad, Jakovo sys dad Judáske i léskire pšalénge;

³Juda sys Fariesóskiro[1] i Zaróskiro dad (léngiri daj sys Támar'); Fariéso sys Esromóskiro dad, Esrómo sys Aramóskiro dad;

⁴Arámo sys Aminadavóskiro dad, Aminadávo sys Naasonóskiro dad, Naasóno sys Salmonóskiro dad;

⁵Salmóno sys Vaozóskiro dad (Vaozóskiri daj sys Raháv), Vaózo sys Avidóskiro dad (Avidóskiri daj sys Ruf'); Avido sys Jesiejoskiro dad,

⁶Jesiejo sys kralískire — Davidóskiro Dad; Davído sys Solomonóskiro dad (Solomonóskiri daj sys Urijáskiri romný);

⁷Solomóno sys Rovoamóskiro dad, Rovoámo sys Avijákiro dad, Avijá sys Asáskiro dad;

⁸Asá sys Iosafatóskiro dad, Iosafáto sys Ioramóskiro dad, Iorámo sys Ozíiaskiro dad;

⁹Ozíia sys Iofamóskiro dad, Iofámo sys Ahazóskiro dad, Aházo sys Jezekijáskiro dad;

¹⁰Jezekíia sys Manasijáskiro dad, Manásija sys Amonóskiro dad, Amono sys Iosijáskiro dad;

¹¹Iosija sys Iokimoskiro dad, Iokimo sys dad Jehonijaske i léskire pšalénge angíl dová, syr Judén lydžiné dro pliéno (pe zor) te dživén ke Vavilóno.

¹²Paló davá, syr len lydžiné dro Vavilóno, Jehonija sys Salafiiloskiro dad; Salafiilo sys Zorovavieljoskiro dad;

¹³Zorovavieljo sys Aviudoskiro dad, Aviudo sys Jeliakimoskiro dad, Jeliakimo sys Azoroskiro dad;

¹⁴Azoro sys Sadokoskiro dad, Sadoko sys Ahimoskiro dad, Ahimo sys Jeliudoskiro dad;

¹⁵Jeliudo sys Jelieazaroskiro dad, Jelieazaro sys Matfanoskiro dad, Matfano sys Jakovóskiro dad;

¹⁶Jakovo sys Iosifoskiro (Jozaskiro) dad, savó sys Marijakiro rom, saví bijandiá Isusós, Savéske lav dyné Xristóso.

¹⁷Adiáke sys dešuštar ródy Avramostyr angíl Davidóste; Davidostyr angíl dová, syr Judén lydžiné dro Vavilóno isyn dešuštar ródy; i dolé dyveséndyr, syr Judén lydžiné dro Vavilóno angíl Xristosóskiro bijanypén isyn dešuštar ródy.

¹⁸Adiáke, syr Isúso Xristóso[2] bijándyja: paló (poslie) dorakiribén te lenpe, syr Léskire dáke Marijake treindiá te vydžál paloróm pal Jozaste, ne angíl, syr lénge te zdžanpe (te lenpe), vygijá, so Joj sys pharí Sventoné Duhóstyr (Fanostyr).

¹⁹A Joza (Iosifo), rom Lákiro, sys patyvalo manúš i na kamdiá te ladžakirel La, i kamdiá čorahanés te otmekél La.

²⁰Ne syr jov podumindia davá, Devléskiro Jangólo javdiá ke jov dre suné i phendiá: “Joze, Davidóskiro čhavó, na andyrša te priles Maríia syr romniá, pal-dová so Kodová, Saves joj bijanéla, isyn Sventoné Duhóstyr (Fanostyr);

²¹joj bijanéla Čhavés, tu désa Léske lav Isúso, pal-dová so Jov zrakhéla Péskire manušén grehéndyr.”

²²Ne saró davá sys, sob (kaj) te kerélpe dová, so Devél phendiá pir prorokoste:

²³“Ake, patyvalý terný džuvlý javéla pharí, i bijanéla Čhavés, i Léskiro lav javéla Emanuilo” (so značynéla: “Devél isyn aménca”).

²⁴Kiéli Joza uštyjá soibnastyr, jov kerdiá, syr Devléskiro Jangólo priphendiá léske; jov prilyjá romniá peskirjá,

²⁵i jov na džindiá La syr romniá, angíl dová, syr Joj bijandiá Čhavés; i jov dyjá lav Léske Isúso.