Read Biblija - Pe Baltitko Romani čib (Romanes) 2019 Baltic Romani Bible Matfiejo 10 Bible Online

Matfiejo 10 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 10

¹I kiéli Isúso khardiá dešudujen sykliaibnytkonén ke Pe, Jov dyjá lénge zor pe nalačhé dúhi, sob (kaj) te tradén javrí len manušéndyr i sastiakiren kažno nasvalypen i dukh.

²Ake, dešudujengire — Apostolengire lavá: pérvo Símono, savés khardé Pétri, i Jendri (Andriejo), pšal léskiro, Zaviediejoskiro Jakovo, i Iáno, pšal léskiro.

³Filipo i Varfalamiejo; Tamašo i Matfiejo, mytoskiro skedyibnari, Alfiejoskiro Jakovo i Fadiejo,

⁴Símono Kananito i Juda Iskarioto, savó zdyja Les.

⁵Isúso bičhadiá adalen dešudujen i dyjá lénge stroga uphenybená: “Na zadžán dre štéty, kaj Náiudy dživéna, na zadžán dro Samaritianengiro fóro;

⁶a džán fedýr ke manušá Izrailjoskire kheréstyr, savé isyn xasiakirdé syr bakré.

⁷I kiéli tumé zadžána, phenén lav pal Devléste, rakirí: ‘Javdiá pašyledýr Kralipén dro Bolybnáskiro Rajo, Savésa xulainela Devél.’

⁸Sastiakiren nasvalen, žužakiren prokazytkonen, otdžidžiakiren mulen, tradén javrí nalačhé dúhi (fany); bi lovengiro doresné, bi lovengiro otdén.

⁹Na len pésa ni suvnakái, ni rup, ni xarkóma (mied') dre kisyka pe kustýk,

¹⁰ni sakva (sumka) pe drom, ni duj ĥáda, ni ĥeritka, ni destó. Pal-dová so butiarno isyn mol te xal.

¹¹I dro vari-savó fóro ci gav tumé te na zadžán, udžinén, kon isyn patyvalo manúš dro davá fóro, i jačénpe odój angíl, syr te džán.

¹²I syr zadžána dro kher, phenén ‘ramánjo’ (miro) manušéske, rakirí: ‘Te javél ramánjo tumaré kheréske’;

¹³i kóli tumen lačhés priléna dro davá kher, mek ramánjo (miro), so tumé mangné Devléstyr, te jačélpe dro kher; kóli nad, mek tumaró lav mangipnasa Devléske te risjol pale ke tumé.

¹⁴Ne kon na priléla tumen i na šunéla lav tumaró, triinskiren pylo tumaré ĥerendyr, syr javéna te džán javrí kheréstyr ci foróstyr.

¹⁵Čačes, Me rakiráva tuménge: lokhedýr javéla manušénge Sodomostyr i Gomorátyr dro dyvés, kiéli Devél javéla te sendinel, syr kadalé foroske.

¹⁶Ake, Me bičhaváva tumen syr bakrén maškír ruvende; javén god'varé syr sapa, i bibangipnaskire syr golumby.

¹⁷Ne rakhénpe manušéndyr: pal-dová so javéna te zden tumen pe séndo, i javéna te marén tumen čupniasa dre léngire sinagogi;

¹⁸i tyrdena tumen ke theméskire barydyrá i ke králja pal Miro lav, sob (kaj) te dophenen pal Mánde lénge i Najudénge.

¹⁹Ne syr jone zdena tumen, na piridživen, syr i so te phenén tuménge: pal-dová so javéla dynó tuménge, so te phenén dre dová-pac' mardó (štúnda);

²⁰pal-dová so davá na tumé javéna te rakirén, ne tumaró Bolybnáskire-Dadéskiro Dúho (Fáno) javéla te rakirél dre tuménde.

²¹I pšal zdela pšalés pe meribén, i dad péskire čhavés; i čhavé ĥazdénape pe dadende i muliakirena len.

²²I saré manušá javéna te na sykavén patýv tuménge pal lav Miro, ne kon javéla te terdjol tvardes ke kónco (ke jagóro), kodová zrakhélape.

²³I kiéli javéna te tradén tumen dro jekh fóro, našén dro javír; pal-dová so Me, čačes, rakiráva tuménge: na končynena tumé te obdžan saré fórja Izrailjoskire, syr javéla Čhavó Manušéskiro.

²⁴Sykliaibnýtko (učeniko) isyn na baredýr sykliakiribnaristyr, pishári na baredýr péskire rástyr.

²⁵Uhtýlla (dósi) vaš sykliaibnytkoneske, sob (kaj) jov te javél dasavo, syr léskiro sykliakiribnáskiro (učytieljo), i pishári dasavo, syr léskiro raj. Kóli semiakire xulás prokharde Viel'zevulo, syr butedýr nalačhé lavénca kharna xuláskire kheritkonen?’

²⁶Na andyršan kadalé manušéndyr: pal-dová so nane nisó čorahano, sob (kaj) te javél garadó, i garadó, sob (kaj) te na javél džindló.

²⁷So Me phenáva tuménge jekh pe jekh, rakirén sarénge, i so tuménge manušá phenéna pe kan, phenén pe kherítko bérga.

²⁸Na andyršan kodolendyr, savé muliakirna masá, ne savé na moginéna te muliakirén tumaró dúho (fáno); ne darén kodolendyr, savé moginéna te muliakirén i dúho (fáno) i masá dro liúno (ado).

²⁹Ci na duj špaki (vorob'i) biknenape pal jekh asarijo? I ni jekh léndyr na peréla pe phuv bi voliakiro tumaré Dadéskiro.

³⁰Tuménde až i balá pe šeró saré gindlé.

³¹Na andyršan ža: tumé san but móly kučedyr, syr kadalé but špaki.

³²Paldavá kažnones, kon priĥaljola Man i rosphenéla pal Mánde angíl manušénde, kodolés Me priĥaljovava angíl Miré Dadéste, Savó isyn dro Bolybnáskiro Rajo;

³³i vari-savéstyr, kon otphenelape Mándyr angíl manušénde, kodolestyr Me adiáke-pac' otphenavape angíl Miré Dadéste, Savó isyn dro Bolybnáskiro Rajo.

³⁴Na duminen, so Me jandjom ramánjo (miro) pe phuv; Me javdjom te janav na ‘ramánjo’, a maribén.

³⁵Pal-dová, so Me javdjom te durjakirav manušés léskire dadéstyr, i čha lákire datyr, i borja sasiatyr,

³⁶manušéskire vérgi isyn kodolé, savé isyn léskire kheréstyr.

³⁷Konéske isyn drógo léskiro dad ci butýr, syr Me, kodová isyn nálačho Mánge, i kodová, savéske isyn drógo čhavó ci čhaj butýr, syr Me, kodová isyn nálačho Mánge,

³⁸i vari-kon, kon na léla trušúl péskiro i na džála Mánca, kodová isyn nálačho Mánge,

³⁹i vari-kon, kon rakhéla péskiro džiibén, kodová xasiakiréla les; i vari-kon, kon meréla pal Mánde, doreséla viéčno džiibén.

⁴⁰I vari-kon, kon priléla tumen, xaj, Man priléla, i jov, savó priléla Man, priléla Kodolés, Savó bičhadiá Man.

⁴¹I vari-kon, kon priléla prorokós syr prorokós, kodová doreséla (dolela) otdyibén syr proróko i vari-kon, kon priléla patiaibnytkone manušés syr patiaibnytkones, kodová doreséla otdyibén syr patiaibnýtko manúš.

⁴²I vari-kon, kon déla xoc' tahtáj (čaša) šylalo paní jekhéske adalé tyknendyr syr sykliaibnytkoneske, čačes, Me rakiráva tuménge: jov na xasiakiréla péskiro otdyibén.”