Read Biblija - Pe Baltitko Romani čib (Romanes) 2019 Baltic Romani Bible Matfiejo 11 Bible Online

Matfiejo 11 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 11

¹I sys adiáke: kiéli končyndia Isúso te del uphenybená dešudujenge Péskire sykliaibnytkonénge, Jov gijá krig odothýr te sykliakirél i te phenél lav dre léngire (Galilejakire) fórja.

²Ne kiéli Iáno šundiá dro štaribén pal Isusoskiri butý, jov bičhadiá lav péskire sykliaibnytkonénca

³te phenél Léske: “Tu san Kodová, Savéske trej te javél, ci javirés aménge te užakiras?”

⁴I otphendiá lénge Isúso, rakirí “Džán i piriphenen Ianoske, so tumé dykhné i šundlé.

⁵Kororé manušá dykhéna nevéstyr i langale psiréna; prokazytka jačéna žužé, i kašuke manušá šunéna, mulé otdžidjona, i bogenge phenélape bahtalý zan (zvies');

⁶bahtaló sys kodová, kon na xasiakiréla patiaibén dre Mánde.

⁷A kiéli jone giné péske, Isúso lyjá te rakirél manušénge pal Ianoste: “So psirdé tumé te dykhén pe čhučí phuv? Syr triščynytko kašt (drévo) trinskirlape balvaliatyr?

⁸So tumé psirdé odorík te dykhén? Manušés, savó sys uridó dre šukár ídia? Nad; manušá, savé uridé dre šukár ídia, dživéna dre kralitka felatiniá (kolová).

⁹Ne, so ž tumé psirdé te dykhén? Prorokós? Čačó, Me rakiráva tuménge: jov isyn baredýr prorokostyr:

¹⁰davá isyn kodová, pal savéste isyn čhindló: ‘Ake, Me bičhaváva Miré vykedyné Manušés angíl Túte, Savó keréla drom Tyró angíl Túte.’

¹¹Čačes, Me rakiráva tuménge: nane baredýr Ianóstyr Boldeipnaristyr maškír odolénde, savén džuvliá bijanena, ne naj tyknedýr dro Bolybnáskiro Rajo isyn baredýr Ianóstyr.

¹²Ianoskire Boldeipnariskire dyveséndyr ke/žýko kakaná Kralipén dro Bolybnáskiro Rajo zorjása lélape, narta (uporna) manušá léna les zorjása.

¹³Pal-dová so saré proróki i Zakóno angilphenenas angíl Ianoste.

¹⁴I kóli tumé zakamena te prilén les, Iáno isyn sýrby Ilíia, savéske treindiá te javél.

¹⁵Konéste isyn kaná, mek te šunél.

¹⁶So Me te phenáv, savé kadalé manušá isyn? Jone isyn sýrby čhavoré, savé isyn bešté pašýl targi i kiéli déna gódla maškír péste,

¹⁷to jone rakiréna: ‘Ame bašadiam tuménge pe svirol'ka, tumé na khelde; ame bagandiam roibnytka giliá, a tumé na rundle.’

¹⁸I Iáno javdiá, na xála, na p'jela, i jone rakiréna: ‘Léste isyn nálačho dúho (fáno).’

¹⁹Javdiá i Čhavó Manušéskiro, xála, i p'jela, i jone rakiréna: ‘Davá isyn manúš, savéske isyn pir iló te xal, te p'jel, isyn drúgo (mal) mytoskire skedyibnar'jenge i grehengirenge.’ Ne Devléskiro god'varipen sykavéla péskiro čačipén manušéngire rendénca (dielenca), savé priléna davá čačipén.”

²⁰Tén'ci Jov lyjá te ladžakirel fórja, dre savé Jov kerdiá butýr javirendyr Péskire dívy, pal-dová so jone na riskirdé péskiro džiibén ke Devél:

²¹“Bida túke, Xorazino! Bida túke, Vifsaida! Pal-dová so, kóli dasavé dívy, so sys kerdé dre tuménde, te javén kerdé dre Tíro i Sidono, jone ĥará riskirenas péskiro džiibén ke Devél dro uribén balytkone gonestyr i dro pieplo.

²²Ne Me phenáva tuménge, so javéla lokhedýr dro sendoskiro dyvés Tiroske i Sidonoske, syr javéla tuménge.

²³I tu, Kapiernaumo, ke bolybén ĥazdesape? Dro liúno (ado) tu javésa čhurdynó telé: pal-dová so, kóli dasavé dívy te javén kerdé dro Sodómo, syr dre túte, jov jačelaspe ke adadyvés.

²⁴Me rakiráva tuménge, so javéla lokhedýr dro sendoskire dyvés Sodomoske, syr túke.”

²⁵Dro do-pac' časo, kiéli Isúso otphenélas lénge, phendiá Jov duredýr: “Me slavinava Tut, Dádo, Raj Devél Bolybnáskiro i phuvjákiro, so Tu ĥaradian davá god'varendyr i baré-godiakirendyr, i otkerdian davá bijatorenge;

²⁶Čačó, Dádo, pal-dová so sys adiáke, syr Túke treindiá.

²⁷Saró džinybén pal Péste Dad Miro dyjá Mánge, i nikón sarésa na džinéla Čhavés apríč Dadéste i nikón na džinéla Dadés apríč Čhavéste, i Jov vykedéla odolés, konéske Čhavó kaméla te otkerel Dadés.

²⁸Javén ke me saré, savé khinyne pharé butiátyr i pharipnastyr, — i Me dáva otkhinyben tuménge.

²⁹Len pe péste pharipén Miré džiibnáskiro i sykljon Mándyr, pal-dová so Me som kovlé-ilytko i kanduno, i tumé lathéna otkhinyben vaš tumaró iló;

³⁰pal-dová so Miro džiibnáskiro pharipén lokhes te lydžán.”