Read Biblija - Pe Baltitko Romani čib (Romanes) 2019 Baltic Romani Bible Matfiejo 12 Bible Online

Matfiejo 12 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 12

¹Dro dová-pac' časo džálas Isúso savatoné (subotoné) pirdál féldy, so sys počhude ziarkasa; Léskire sykliaibnýtka bokhalyne i lyné te kušen kolosy i te xan.

²Ne kiéli Farisiéi dykhné davá, to phendlé Léske: “Dykh, Tyré sykliaibnýtka keréna dová, so naštý te kerén savatoné (subotoné).”

³I Jov phendiá lénge: “Na gindlé tumé, so Davído kerdiá, kiéli jov bokhalyja i manušá, savé sys lésa?

⁴Syr jov zagijá dro Devléskiro Kher, i jov i manušá léskire xané svencyndlo maró, savó naštý sys te xan ni léske, ni manušénge, savé sys lésa, ne jekhe rašange?

⁵Naúšto na gindlé tumé dro Zakóno, so rašaja magirena savatytko (subotytko) Zakóno dre Khangirí i jačénape bi bangipnaskiro?

⁶Ne Me phenáva tuménge: kadavá, so isyn adái, isyn butedýr Khangirjátyr.

⁷Ne kóli tumé džinenas, so davá značynéla: ‘Kovle-ilýtkima trej mánge, a na dáro’, tedy tumé na bangiakirenas manušén, savénde nane bang.

⁸Pal-dová so Manušéskiro Čhavó isyn xuláj i pe sávato.”

⁹I pirigii pe javír štéto, Isúso javdiá dre léngiri sinagoga.

¹⁰I, ake, sys manúš šuké vastésa. I phučné Léstyr, sob (kaj) te bangiakiren Les: “Ci saštý (možna) te sastiakires savatoné (subotoné)?”

¹¹Jov phendiá lénge adiáke: “Kóli vari-konéste tuméndyr peréla jekhori bakri dre xoraly ĥanbín (jama) savatoné (subotoné), naúšto adavá manúš na uhtyléla la i na tyrdela javrí la?

¹²Pe kicý manúš isyn drogedyr bakriatyr? Saštý te kerén lačhipén savatoné (subotoné)!”

¹³Tedy rakiréla manušéske: “Vytyrde péskiro vast!” I jov vytyrdyja vast, i vast jaciá sastó, syr javír.

¹⁴Ne Farisiéi giné javrí, jačné te zrakirenpe pe Léste, syr te muliakirén Les.

¹⁵Ne syr Isúso ĥalyjá pal dová, Jov gijá péske odothýr. I but manušá giné Lésa, i Jov vysastiakirdiá len sarén,

¹⁶i priphendiá šylales lénge te na rakirén javirénge pal Léste;

¹⁷sob (kaj) te spolninélpe dová, so Devél phendiá pirdál prorokoste Isajoste, savó rakiréla:

¹⁸“Ake, isyn, Miro dynári, Konés Me vykedyjom, Miro Drógo, dre Savéste isyn Mirí rádyma; Me dáva Léske zor Miré Duhoskiri (Fanoskiri), i Jov phenéla Najudénge pal čačunó séndo.

¹⁹Jov na zakošelape, na zadela gódla, i nikón na javéla te šunél zan (glos) Léskiri javrí;

²⁰Na phagiréla telé čar, so isyn nadphagirdy, i na murdiakirela jagitko čibori, savjátyr jekh thuv (dymo) džála, paka čačipén pirizorjakirela saró.

²¹I Léskire lavéske saré nácyi javéna te patián.”

²²Tén'ci jandlé ke Jov kororé i kašuke manušés nalačhé duhósa i Jov vysastiakirdiá les adiáke, so kororó i kašuko lyjá te rakirél i te dykhél.

²³I divindlépe saré manušá i rakirdé: “Naúšto davá isyn Davidóskiro Čhavó?”

²⁴Ne kiéli Farisiéi šundlé davá, jone phendlé: “Kadavá manúš tradéla nalačhé dúhi jekhe Viel'zevuloskire zorjása, savó isyn xuláj pe nalačhé dúhi.”

²⁵Ne Isúso džindiá, so jone dumindle i phendiá lénge: “Kažno kralipén, kaj nane jekhipén andrál, javéla syr čhučí phuv, i kažno fóro ci kher, kaj nane jekhipén andrál, na javéla te terdjol.

²⁶I kóli nálačho vytradela nalačhés, tedy nane léste jekhipén andrál, syr léskiro kralipén javéla te terdjol?

²⁷I kóli Me tradava javrí nalačhé dúhi Viel'zevulosa, tedy savé zorjása tumaré čhavé tradéna? Paldavá jone javéna sendárja tuménge, so tumé rakiréna načačipén.

²⁸Ne kóli Me tradava javrí nalačhé dúhi Devléskire Duhósa (Fanosa), tedy Devléskiro Kralipén javdiá ke tumé.

²⁹I syr vari-kon moginéla te zadžál dre zoralé-manušéskiro kher i te čorel léskiro mištypén, kóli angíl jov na sphandela zoralé xulás. I tedy jov zalela saró léskire kheréstyr.

³⁰Kon isyn na Mánca, odová isyn pe Mánde, i kon na skedéla Mánca, odová rosčhurdela.

³¹Paldová Me phenáva tuménge: kažno grého i teliakiriben pe Devléste javéna otmekne manušéske, ne kaliakiriben pe Dúho (Fáno) na javéla otmekno ni dro davá viéko, ni dro viéko, savó javéla.

³²I kóli vari-kon phenéla lav pe Čhavéste Manušeskireste, léske grého javéla otmekno, ne kodová, savó phenéla lav pe Svénto Dúho (Fáno), léskiro grého na javéla otmekno ni dro davá viéko, ni dro viéko, savó javéla.

³³Kóli kašt (drévo) isyn lačhó, lačhó isyn barjakirdó (plódo) léstyr; kóli kašt isyn dylynó, dylynó isyn barjakirdó léstyr, pal-dová so kašt ĥaljosa pir léskire barjakirdé.

³⁴Tumé san sapitko ródo! Syr tumé moginéna te rakirén lačhipén, kóli tumé san nalačhé? Pal-dová so, so isyn dro iló pherdó, dová uštá rakiréna.

³⁵Lačhó manúš lydžála péske lačhipén lačhé piraliatyr; čoro manúš lydžála čoré piraliatyr čoripén.

³⁶Ne Me phenáva tuménge, so kažno manúš déla otphenybén pal kažno čhučó lav dro sendoskiro dyvés:

³⁷pal-dová so pir tyré lavá Devél phenéla pal tyró nabangipen i pir tyré lavá tyró bangipen.”

³⁸Tedy otphendlé Léske vari-savé lylvaritkonendyr i Farisiejendyr, phení: “Sykliakiribnáskiro, ame kamasa te dykhas Tútyr ĥiertýk (znamiénijo).”

³⁹Ne Jov otphendiá lénge, rakirí: “Ake, isyn pes'cjono i napatiaibnytko ródo, savó rodéla ĥiertýk; na javéla tuménge ĥiertýk apríč Ionaskire ĥiertykatyr.

⁴⁰Adiáke, syr Iona sys dro kitoskiro per trin dyvesá, adiáke-pac' javéla Čhavó Manušéskiro dro phuvjákiro xoripén trin dyvesá i trin ratia.

⁴¹Manušá Ninievijatyr ĥazdénape pe séndo kadalé manušénca i dophenena pe lénde, pal-dová so jone risiné péskire grehéndyr ke Devél, kiéli o Iona phenelas, i, ake, adáj isyn Jekh, Savó isyn butýr Ionastyr.

⁴²Králica Paš-Dyvesytkone (Jugoskire) Rigakiri ĥazdélape pe séndo manušénca dalé rodóstyr i dophenéla pe lénde: pal-dová so joj iavélas phuvjákire jagoróstyr (krajostyr) te šunél Solomonóskiro god'varipen, i, adáj isyn Jekh, Savó isyn baredýr Solomonostyr.

⁴³Kiéli nálačho dúho (fáno) džála javrí manušéstyr, tedy jov psiréla pir bipanieskire štéty, rodéla štéto te otkhinjol i na lathéla.

⁴⁴Tén'ci dúho rakiréla: ‘Risjováva me dro miro kher, katýr me javdjom’; i kiéli jov javéla, lathéla, so kher isyn na zalyno, vyšulado i ukedyno.

⁴⁵To tén'či jov džála i léla pésa eftá javír dúhi, so isyn fujedýr léstyr, i jone zadžána i dživéna odój, i jačélape vaš adalé manušéske fujedýr, syr sys angíl davá. Adiáke javéla kadalé nalačhé manušénca.”

⁴⁶Kiéli Jov rakirdiá manušénge, ake, daj Léskiri i pšála Léskire sys terdé dre rig manušéndyr, i lénge treindiá te rakirén Lésa.

⁴⁷I vari-kon phendiá Léske: “Ake, Daj Tyrí i pšála Tyré javné i isyn terdé dre rig, i lénge trej Túsa.”

⁴⁸I Jov otphendiá odoléske, kon rakirdiá: “Kon isyn Mirí Daj, i kon isyn pšála Miré?”

⁴⁹I sykadiá Péskire vastésa pe Péskire syklytkonende, phení: “Ake, isyn daj Mirí i pšála Miré.

⁵⁰Pal-dová so, kon keréla saró pir Miré Dadéskiri vólia, Savó isyn dro Bolybnáskiro Rajo, kodová isyn Mánge pšal i phen i daj.”