Read Biblija - Pe Baltitko Romani čib (Romanes) 2019 Baltic Romani Bible Matfiejo 13 Bible Online

Matfiejo 13 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 13

¹Dro dová-pac' dyvés Isúso gijá javrí kheréstyr i sys beštó pašýl mórjo (derjáv).

²I skedynépe pašýl Léste but manušá, paldavá jov gijá andré bárka i sys beštó, a saré manušá sys terdé pe brégo.

³I rakirdiá lénge but sykliaibnytkone primierenca, rakirí: “Ake, sieinybnaskiro gijá javrí te čhuvél ziárka dre phuv:

⁴i, syr jov sieindia, vari-savé ziárki pyné pašýl drom, i privurniandyne čirikliá i shane len;

⁵ne javír ž pyné pe baruné štéty, kaj na sys but phuv, i jekhátyr (srázu) giné upré, pal-dová so phuv na sys xor,

⁶a syr uštyjá kham, šut'kirdia len; pal-dová so, syr na sys lénde kórni (rukhá), jone zašutine;

⁷ne javír pyné dre xrústy suv'jenca, i vybarija čar i zamardiá len;

⁸i javír pyné pe lačhí phuv, i dyné pribaripen dre šel móly, javír dre šovdešá, i javír dre trijánda.

⁹Konéste isyn kaná, mek te šunél.”

¹⁰Tén'ci sykliaibnýtka giné pašyledýr i phendlé Léske: “Sóske Tu rakirésa lénca primierienca (sykaibnenca)?”

¹¹I Jov otphenélas lénge: “Tuménge isyn dynó te džinén garadó čačipén pal Kralipén dro Bolybnáskiro Rajo, a lénge na dynó;

¹²kodoléske, savéste isyn, javéla dynó i javéla léste but but, a konéste nane, kodolestyr lélape krig kodová nábut, so isyn léste.

¹³Paldavá Me rakiráva lénca primierenca (sykaibén), pal-dová so, syr jone dykhí, na dykhéna, i šuny, na šunéna, i na ĥaljona;

¹⁴i spolninelape pe lénde angilphenybén Isajoskiro, savó rakiréla: ‘Javéna te šunén kanenca, i na ĥaljona; te dykhén jakhénca, i na dykhéna;

¹⁵pal-dová so adalé manušéngiro iló kaštalyja, i jone šunéna fujes péskire kanenca i jakhá péskire zakerde, sob (kaj) te na dykhén jakhénca, i te na šunén kanenca, i te na ĥaljon ilésa, i te na risjon ke Me, sob (kaj) Me te vysastiakirav len.’

¹⁶Tumaré ž jakhá isyn bahtalé, so dykhéna, i kaná tumaré, so šunéna,

¹⁷Čačes, Me rakiráva tuménge: but proróki i čačuné manušá kamlé drieván te dykhén dová, so tumé dykhéna, i na dykhné, i te šunén dová, so tumé šunéna, i na šundlé.

¹⁸Paldavá šunén, pal so isyn kadavá sykaibén (primiéro) pal sieinybnaskireste.

¹⁹Kiéli vari-kon, kon šunéla lav pal Devléskiro Kralipén, i na ĥaljola, tedy javéla nálačho i čorela léskire iléstyr kodová, so sys počhudo: kadasavó manúš isyn sýrby ziárka, saví sys čhudý pašýl drom.

²⁰Ne savé sys čhudé pe baruné štéty, sykavéna manušés, savó šunéla lav, priléla les jekhátyr (srázu) dro iló radymása;

²¹ne syr davá lav na zadžála xor dro iló i patiaibén isyn krotko, tedy, kiéli javéna mén'ki i tradypen pal lav, jekhátyr jov mekéla te patial.

²²Ne savé sys čhudé dre dylyny čar, sykavéna kodolés, savó šunéla lav, ne viekoskiri sujéta, tyrdypén ke barvalypén pirizorjakirena dro léngiro iló, i jov jačéla bi barjakirdeskiro.

²³Ne savé sys čhudé pe lačhí phuv, sykavéna manušés, savó šunéla lav i ĥaljola les, jone déna barjakirdeskiro (plodoskiro) i pribaripen jekh dre šel móly, javír dre šovdešá, ne javír dre trijánda móly.”

²⁴Javír sykliaibnýtko sykaibén rosphendiá Isúso manušénge, rakirí: “Kralipén dro Bolybnáskiro Rajo isyn sýrby manúš, savó čhudiá lačhí ziárka pe péskiri félda.

²⁵Kiéli manušá sys suté, javdiá vérgo i čhudiá dylyny čar maškír giv i gijá krig.

²⁶Ne kiéli lačhí ziárka ŭzgija i dyjá pribaripen, dylyny čar adiáke-pac' sykadyjá.

²⁷I xuláskire pishárja javné i phendlé léske: ‘Rajo, tu ž čhudián lačhí ziárka pe félda? Katýr lyjape dylyny čar?’

²⁸I jov otphendiá lénge: ‘Vérgo manúš kerdiá davá.’ Léskire pishárja rakirna léske: ‘Kóli kamésa, ame džása i vykedasa len javrí.’

²⁹Jov rakírla: ‘Nad, sob (kaj) te na vyriskiren khetané dylyné čarjasa giv, syr tumé javéna te vyriskiren javrí dylyny čar.

³⁰Mek te barjon khetané ke sčhinyben; i dro časo, syr te sčhinen, me phenáva žniecenge: ‘Skedén angledýr dylyny čar i phanden len dre pučki, sob (kaj) te xačkirén; a giv te skedén dre Mirí šúrna.’”

³¹Javír sykliaibnýtko sykaibén rosphendiá Isúso lénge, rakirí: “Kralipén dro Bolybnáskiro Rajo isyn sýrby garčyčno ziárka, saví manúš lyjá i počhudia pe péskiri félda,

³²joj isyn tyknedýr saré ziarkendyr, ne kiéli vybarjola, jačélape baredýr saré javire xrustendyr i jačélape syr kašt, adiáke so čirikliá bolybnýtka khuvena gniázdy (kúfy) dre léskire randiá.”

³³Javír sykliaibnýtko primiéro rosphendiá lénge Isúso: “Kralipén dro Bolybnáskiro Rajo isyn sýrby droždžy (rožčyna), savé džuvlý lyjá i zamiešyndia dre viadra (nemra) jaržesa, paka saró xumer (ciasto) jaciá šutlo.”

³⁴Ake, saró Isúso phendiá manušénge primierenca (sykaibnenca); i nisó Jov na rakirdiá lénge bi primierengiro,

³⁵sob (kaj) te spolninélpe, so sys phendló pir prorokoste: “Me otkerava uštá Miré dre primiery (sykaibena); vyphenava dová, so garadó odoléstyr, syr svéto sys sozdynó.”

³⁶Tén'ci Jov mekciá manušén i gijá dro kher. I podginé ke Jov sykliaibnýtka Léskire i phendlé: “Piriphen aménge primiéro (sykaibén) pal dylyny čar pe félda.”

³⁷I Jov phendiá dro otphenybén: “Kon sieinela (čhuvéla) dre phuv lačhí ziárka isyn Čhavó Manušéskiro;

³⁸félda isyn svéto; lačhí ziárka-davá isyn čhavé Kralipnaskire, kaj xulainela Devél; dylyny čar-davá isyn čhavé nalačheskire,

³⁹vérgo, savó počhudia len-davá isyn nálačho, sčhinyben-davá značynéla viekoskiro kónco (jagóro), žniecy isyn Jangóly.

⁴⁰Paldavá, syr vykedena dylyné čarjá i shačkirena jagása, adiáke-pac' javéla dro viekoskiro kónco (jagóro):

⁴¹bičhavéla Čhavó Manušéskiro Péskire Jangolen, i skedéna Léskire Kralipnastyr saró, so zlydžala manušén ke grého, i sarén, kon keréla na pir Zakóno;

⁴²i čhurdena len dro bov jagása; odój javéla roibén i dandengiri skriežyma.

⁴³Tén'ci patiaibnytka javéna te ziainen syr kham dro léskire Dadéskiro Kralipén. Konéste isyn kaná, mek te šunél.

⁴⁴Kralipén dro Bolybnáskiro Rajo isyn sýrby drógima dro kučipén, so isyn garady pe félda, savó manúš, syr lathiá, garadia, i radymátyr džála i saró biknela, so léste isyn, i kinela kodoia félda.

⁴⁵Iščo Kralipén dro Bolybnáskiro Rajo isyn sýrby kúpco (tylgári), savó rodelas drieván goža mutinia;

⁴⁶i syr lathiá jekh kuč mutin (žemčugo), gijá i bikindia saró, so léste isyn i kindia la.

⁴⁷Iščo Kralipén dro Bolybnáskiro Rajo isyn sýrby bari khudý (sietka), so čhurdyné dro mórjo (derjáv) i saví skedyjá rázna mačhé,

⁴⁸i syr khudý sys pherdý, manušá tyrdyne javrí la pe brégo i bešné, skedyi lačhé mačhé dre pirja, a nalačhé čhurdyné javrí.

⁴⁹Adiáke-pac' javéla dro viekoskiro kónco (jagóro): džána telé Jangóly i roskedena nalačhen patiaibnytkonendyr,

⁵⁰i čhurdena len dro bov jagása; odój javéla roibén i dandengiri skriežyma.”

⁵¹“Ci ĥalyné tumé davá saró?” Jone phendlé Léske: “Adiáke, Rajo.”

⁵²i Jov phendiá lénge: “Paldavá kažno lylvarítko (knížniko), savó syklyja pal Kralipén dro Devléskiro Rajo, isyn sýrby manúš, savó isyn kheréskiro xulái, kon lydžála javrí péskire kučipnaskire piraliatyr saró nevó i phuranó.”

⁵³I isyn adiáke: kiéli končyndia Isúso dalé primiery (sykaibena), Jov gijá péske odothýr.

⁵⁴I syr Jov javdiá dro Péskiro fóro, sykliakirdiá len dre sinagoga adiáke, so jone drieván divindlépe, rakirí: “Katýr adalé manušéste isyn dasavo godypén i zoralypén?

⁵⁵Na Jov isyn skamindariskiro Čhavó? Na Léskire Da kharéna Maríia, i pšalén Leskiren Jakovo i Joza i Símono i Juda?

⁵⁶i pheniá Léskire nane saré maškír aménde? Katýr ža Léste saró davá?”

⁵⁷I na patianas Léske. Ne Isúso phendiá lénge: “Saré manušá kutiakirena prorokós, féni na dro Léskiro fóro i na dro léskiro kher”

⁵⁸I Jov na kerdiá but dívy odój, pal-dová so jone na patiandyné Léske.