Read Biblija - Pe Baltitko Romani čib (Romanes) 2019 Baltic Romani Bible Matfiejo 17 Bible Online

Matfiejo 17 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 17

¹Pir šov dyvesá lyjá Isúso Petris i Jakovós i Ianos, léskire pšalés, i lydžijá len trindžinen pe vučí bérga.

²I Jov parudyja sarésa angíl lénde. Léskiro muj lyjá te ziainel, syr kham, i Léskire uribená jačné parné syr dud (svéto).

³I, ake, sykadyne lénge Mójza Ilijasa, savé rakirdé Lésa.

⁴I Pétri zarakirdia i phendiá Isusóske: “Rajo Dévla! Syr isyn šukár aménge te javas adái. Kóli Tu kamésa, me keráva adáj trin šátry: jekh Túke, jekh Mojzáske, i jekh Ilijaske.”

⁵Kiéli jov iščo (inké) rakirdiá, ake, sviatlo óbloko čhakirdia len, i, ake, zan oblokostyr, saví rakirdiá: “Kadavá isyn Miro Drógo Čhavó, dre Savéste isyn Mirí rádyma, Les šunén.”

⁶I kiéli sykliaibnýtka šundlé davá, jone pyné pe péskire muiá i drieván strahádyne.

⁷I podgíia Isúso i čiladiá len, phení: “Uštén i na andyršan.”

⁸I syr jone ĥazdyné péskire jakhá, i na dykhné nikonés, apríč Isusóste Kokoreste.

⁹I syr jone džánas telé bergátyr, Isúso dyjá priphenybén lénge: “Ni konéske na rakirén pal davá dykhibén, paka Čhavó Manušéskiro otdžidjola.”

¹⁰I Léskire sykliaibnýtka phučné Léstyr, phení: “Sóske tedy lylvarítka rakiréna, so Ilíia bangó te javél pérvo?”

¹¹I Jov otphendiá lénge, rakirí: “Ilíia, čačes, javéla angledýr i keréla saró.

¹²Ne Me rakiráva tuménge, so Ilíia uže javdiá, i jone na ĥalyné les, i kerdé lésa dová, so sys pir iló. I adiáke Čhavó Manušéskiro javéla te stradynel léndyr.”

¹³Tedy sykliaibnýtka ĥalyné, so Jov phendiá lénge pal Ianoste Boldeipnariste.

¹⁴I kiéli jone javné ke manušá, jekh léndyr podgíia ke Jov, i pyjá pe čangá angíl Léste,

¹⁵i phendiá: “Rajo Dévla! Potangine miré čhavés, jov bengvaljol pe nevó čhon, i fujes léske; pal-dová so jov častes čhurdelape dre jag i častes dro paní.

¹⁶I me jandjom les ke Tyré sykliaibnýtka, ne jone na mogindlé les te vysastiakiren.”

¹⁷Isúso phendiá dro otphenybén: “Tumé san napatiaibnaskiro i pharé-manušéngiro ródo, kicý Me te javav tuménca? Kicý Me javáva te vyrikirav tumen? Janén les adarík.”

¹⁸I Isúso priphendiá zoralés rakloreske, i gijá javrí léstyr nálačho dúho (fáno), i jekhátyr terné-beršengiro jaciá sastó.

¹⁹Tén'ci podginé jekh sykliaibnýtka ke Isúso i phendlé: “Sóske ame na mogindiam te tradas javrí les?”

²⁰I rakiréla Jov lénge: “Pal-dová so tumaró patiaibén isyn nazoralo; paldová, čačes, Me rakiráva tuménge: kóli javéla tumaró patiaibén syr garčyčno ziárka, tedy phenéna bergake ‘te džal odothýr adarík ‘i džála; i tumé moginénas saró.

²¹Kadavá tradelape javrí jekhe mangipnasa i postosa.”

²²Kiéli jone džánas khetané dre Galiliéia, Isúso phendiá lénge: “Čhavó Manušéskiro javéla zdyno dre manušéngire vastá;

²³i jone zamarena Les; i pe tríto dyvés Jov otdžidjola.” I jone jačné drieván smentna (skučna).

²⁴I kiéli jone javné dro Kapiernaumo, podginé ke Pétri skedyibnarja pe didrahmy i phendlé: “Tumaro Sykliakiribnáskiro pleskirela vaš Khangirí myto?” Jov rakiréla: “Čačó.”

²⁵I kiéli jov gijá dro kher, Isúso angíl phendiá léske, rakirí: “So tu duminesa, Simonie? Králja pe phuv, konéstyr léna myto (taksa): péskire manušéndyr ci čužonendyr?”

²⁶Pétri ž rakiréla Léske: “Čužonendyr.” Isúso phendiá léske: “Tedy péskire manušá na pleskirena.

²⁷Ne, sob (kaj) lénge te na kerás fuipén pal kadavá primiéro (sykaibén), džá pe mórjo (derjáv), začhurde vendka, i pervoné mačheste, savó poperlape, otker léskiro muj i lathesa odój statiro; tyrde les javrí i de lénge pal péste i pal Mánde.”