Read Biblija - Pe Baltitko Romani čib (Romanes) 2019 Baltic Romani Bible Matfiejo 19 Bible Online

Matfiejo 19 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 19

¹I sys adiáke: kiéli Isúso pirijaciá te rakirél dalé lavá, Jov gijá krig Galilejatyr i javdiá pe štéty Judejákire pe javír Iordanoskire — rekakiri (leniakiri) rig pe Iordáno;

²i but manušá giné pal Léste, i Jov vysastiakirdiá len.

³I podginé ke Jov Farisiéi i propatiakirenas Les i phučenas: “Ci pal kažno réndo (diélo) saštý (možna) manušéske te rozlydžalpe péskire romniasia?

⁴I Jov otphendiá, rakirí: “Naúšto na gindlé tumé, so Devél dro anglypén (načalo) svetoskiro sozdyjá len muršesa i džuvliása?

⁵I phendiá: ‘Paldavá mekéla manúš dadés i da i prijačela ke péskiri romný, i javéna jone syr jekh loč (plot');

⁶adiáke so jone uže na dujdžiné, a jekh loč? So Devél čhudiá khetané, mek manúš te na rozlydžal.”

⁷Jone rakiréna Léske: “Sóske ž Mójza priphendiá te čhinel lyl pal rozgiiben te otmekél romniá.”

⁸Jov rakiréla lénge: “Mójza dyjá vólia tuménge te otmeken romniá pal tumaré xoliamé ile; ne angíl davá adiáke na sys.

⁹Ne, Me phenáva tuménge: kóli vari-kon mekéla peskirjá romniá na pal bléndo i léla javirja, odová keréla biladžaipén.”

¹⁰Phenéna Léske sykliaibnýtka: “Ne kóli dasavo patiaibén isyn maškír romeste i romniáte, fedýr te na lespe sarésa.”

¹¹Jov ža phendiá lénge: “Na saré ĥaljona dalé lavá, ne jekh kodolé, konéske dynó;

¹²pal-dová so isyn skopcy, savé isyn dasavé dákire bijanypnastyr; ne isyn kodolé, savén manušá kerdé dasavenca; i isyn muršá, savé na lenape vaš Kralipén, Savó isyn dro Bolybnáskiro Rajo. Kon moginéla te ĥaljol, mek te ĥaljol.”

¹³Tén'ci jandlé bijatén ke Jov, sob (kaj) Jov te čhuvél vastá pe šeró lénge i te pomangelpe; ne sykliaibnýtka na mekenas len.

¹⁴Ne Isúso phendiá: “Mekén bijatén i na terdjon pe drom lénde te javén ke Me; pal-dová so Kralipén dro Bolybnáskiro Rajo javéla vaš adasavé manušénge, savé isyn syr kadalé bijaty (čhavoré)”,

¹⁵i syr Jov čhudiá vastá pe šeró lénge bahtiakiribnasa, to gijá odothýr.

¹⁶I, ake, podgíia vari-savó manúš ke Jov i phendiá: “Sykliakiribnáskiro! Savó lačhipén mánge trej te keráv, sob (kaj) te del Devél mánge viéčno džiibén?” I Jov phendiá léske:

¹⁷“Sóske tu phučesa Mándyr pal lačhipén? Jekh Devél isyn lačhó. Ne kóli túke isyn drógo viéčno džiibén Devléstyr, tedy ker pir priphenybená.”

¹⁸Jov rakiréla Léske: “Save?” I Isúso phendiá: “Na zamar (na umar), na ker biladžaipén, na čor, na de xohanó dophenybén,

¹⁹kutiakir péskire dadés i da; i sykáv patýv péskire pašatuné manušéske, syr kokoró péske.”

²⁰Rakírla Léske tyrno manúš: “Davá saró me kerdjom; so iščo (inké) na uhtýlla (nádosi) mánge?”

²¹Isúso phendiá léske: “Kóli túke isyn pir iló te javes bidošakiro, džá, bikin saró, so isyn túte, i rozde bogenge, sob (kaj) te javél túte kučipén dro Bolybnáskiro Rajo; jav’ i džá Mánca.”

²²Ne kiéli tyrno manúš šundiá davá, jov gijá krig pharipnasa pe iló, pal-dová so léste sys baró barvalypén.

²³I phendiá Isúso Péskire sykliaibnytkonénge: “Čačes, Me rakiráva tuménge: pharó javéla barvaleske te zadžál dro Kralipén dro Bolybnáskiro Rajo;

²⁴i iščo (inké) Me phenáva tuménge: lokhedýr javéla vierbliudoske te prodžal pir suvjakiro kanoro, syr barvaleske te zadžál dro Kralipén dro Bolybnáskiro Rajo.”

²⁵I kiéli sykliaibnýtka šundlé davá, jone drieván divindlépe, phení: “Kon tedy moginéla te zrakhelpe?”

²⁶I syr Isúso podykhciá pe lénde, tedy phendiá: “Manušá na moginéna kokoré te zrakhen pes; jekhe Devléste isyn zor pe saró.”

²⁷Tén'ci Pétri otphendiá i phendiá: “Gada, ame saró jačkirdiam i gijam Túsa, so javéla aménge?”

²⁸I Isúso phendiá lénge: “Čačes, Me rakiráva tuménge: tumé, savé giné Mánca dro nevó svéto, savó Devél keréla, kiéli bešéla Čhavó Manušéskiro pe slavútno priestolo, tedy bešena adiáke-pac' i tumé pe dešudúj trony, sob (kaj) te sendinén dešudúj ródy Izrailjoskire.

²⁹I kažno, kon mekciá kherá ci pšalén, ci phenien ci da, ci romniá, ci čhavorén, ci féldy vaš Miro lav, doreséla dre šel móly butýr i léske javéla dynó viéčno džiibén.

³⁰But ža anglatuné javéna palatuné, a palatuné javéna anglatuné.