Read Biblija - Pe Baltitko Romani čib (Romanes) 2019 Baltic Romani Bible Matfiejo 20 Bible Online

Matfiejo 20 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 20

¹Pal-dová so Kralipén dro Bolybnáskiro Rajo isyn sýrby felatiniakiro xulái, savó gijá javrí pe zlóko te kharel butiarnen dro péskiro vinagrádniko (drakhin).

²I kiéli jov dorakirdiape butiarnenca pir dinarijo pal dyvés, tedy jov bičhadiá len dro péskiro vinagrádniko.

³I gijá javrí jov dre tríto mardó (štúnda) i dykhciá javire manušén, savé sys terdé pe targoskiro štéto bi butiakiro;

⁴i jov phendiá lénge: ‘Džán i tumé dro miro vinagrádniko, i so, čačes, javéla mol, me pleskirava tuménge.’ I giné jone.

⁵I nevéstyr gijá javrí jov pašé šóvto i jeniáto (bijekhéskiro déšto), i kerdiá adia-pac'.

⁶I gijá javrí jov pašé dešujékh mardé (štundy), lathiá javirén, savé sys terdé bi butiakiro, i rakírla lénge: ‘So da tumé terdé saró dyvés bi butiakiro?’

⁷Jone rakirna léske: ‘Pal-dová so nikón amen na lyjá pe butý.’ Jov rakírla lénge: ‘Džán i tumé dro miro vinagrádniko, i so, čačes, javéla mol, me pleskirava tuménge.’

⁸Syr javdiá bel'vél', rakírla felatiniakiro xuláj péskire barydyréske pe vinagrádniko: ‘Khar butiarnen i pleskir lénge, le kodolén, savé javné palatuné i ke dolé, savé javné pérva.’

⁹I kodolé, savé javné pašé dešujekh mardó (štúnda), doresné kažno pir dinarijo.

¹⁰I kodolé, savé javné pe butý pérva, dumindle, so jone doreséna butýr, ne doresné adiáke-pac' pir dinarijo.

¹¹I kiéli jone doresné (dolyne), tedy lyné te rakirén xoliása tel nakh pe xulaste, rakirí:

¹²‘Kadalé, savé javné palatuné, kerdé butý jekh mardó (štúnda), i tu adákicy pleskirdian lénge, syr aménge, savé pirilydžijam pharipén i dyvesýtko xačkiribén.’

¹³Ne Jov otphendiá jekhéske léndyr: ‘More, me na keráva túke xohaibén; tu ž dorakirdianpe mánca pal dinarijo?

¹⁴Le péskiro i džá. Me ž kamám te dav adákicy palatuneske, syr túke:

¹⁵so ž naštý mánge te keráv, so isyn miro, syr me kamám? Ci jakh tyrí kaméla butýr, pal-dová so me som lačhó?’

¹⁶Adiáke javéla, so palatuné javéna anglatuné, a anglatuné javéna palatuné: paldavá so but isyn manušá, savén khardé, ne nábut vykedyné.”

¹⁷I syr Isúso skedyjape te džal dro Jerusalimo, Jov khardiá dre rig dešudujen sykliaibnytkonén i phendiá lénge pir drom:

¹⁸“Ake, ame zadžasa dro Jerusalimo, i Čhavó Manušéskiro javéla zdyno rašángire barydyrénge i lylvaritkonenge, i jone zasendinena Les pe meribén;

¹⁹i zdena Les Najudénge pe saben i maribén čupniasa i primariben pe trušúl i pe tríto dyvés Jov otdžidjola.”

²⁰Tén'ci gijá pašyledýr ke Jov Zaviediejoskire-čhavengiri daj péskire čhavénca, i klonindiape i pomangdia vari-so Léstyr.

²¹Jov ža phendiá láke: “So tu kamésa?” Joj ža rakiréla Léske: “Phen, sob (kaj) te bešén kadalé duj miré čhavé jekh pir čačó vast i javír pir zérvo vast dro Tyró Kralipén.”

²²I otphendiá láke Isúso, rakirí: “Tumé kokoré na džinéna, so tumé mangena. Tumé na moginéna te p'jen tahtáj (čaša), savó Me javáva te pjáv?” Jone rakiréna Léske: “Moginasa.”

²³Jov rakiréla lénge: “Tumé javéna te p'jen Miro tahtái, ne bešén pir čačó i zérvo vast Mándyr-davá isyn na dre Mirí zor, dalé štéty isyn kodolénge, konéske Dad Miro prigotovindia”

²⁴I kiéli javír deš sykliaibnýtka šundlé pal davá, jone zoralés xoliasyne pe dujende.

²⁵Ne Isúso khardiá len sarén ke Pe i phendiá: “Tumé džinéna, so Najudengire-theméskire barydyrá rikirna zor pe lénde, i léngire barydyrá xulainena pe lénde.

²⁶Mek te na javél adiáke maškír tuménde, ne kon kaméla te javél naj baredýr manúš maškír tuménde, mek te javél dynári (sluga) tuménge;

²⁷i kon kaméla te javél pérvo maškír tuménde; mek te javél sluga (dynári) tuménge;

²⁸adiáke syr Čhavó Manušéskiro javdiá na vaš dová, sob (kaj) Léske te dynarinél, ne sob (kaj) Jov te dynarinél i te otdél Péskiro džiibén, syr vykinybén pal butende.”

²⁹I syr jone džánas krig Jerihonostyr, but manušá džánas pal Léste.

³⁰I, ake, duj kororé manušá, savé sys bešté pašýl drom, syr šundlé, so Isúso džála pašé lénde, lyné te den gódla: “Potangine (požalin) amen, Rajo Dévla, Čhavó Davidóskiro.”

³¹Ne manušá priphendle lénge, sob (kaj) jone te javén štyl, ne jone zoraledýr dénas gódla: “Rajo Dévla, potangine amen, Čhavó Davidóskiro.”

³²Isúso terdijá, khardiá len i phendiá: “So tumé kaména, sob (kaj) Me te keráv tuménge?”

³³Jone rakiréna Léske: “Rajo Dévla, sob (kaj) te otkerenpe amaré jakhá”

³⁴I potangindia len Isúso, čiladiá léngire jakhá; i jekhátyr (srázu) jone lyné te dykhén i giné Lésa syr sykliaibnýtka.