Read Biblija - Pe Baltitko Romani čib (Romanes) 2019 Baltic Romani Bible Matfiejo 22 Bible Online

Matfiejo 22 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 22

¹I otphenélas lénge Isúso i rakirdiá sykaibnenca:

²“Kralipén dro Bolybnáskiro Rajo isyn sýrby králi, savó kerdiá bjav péskire čhavéske,

³i bičhadiá péskire dynar'jén te kharén odolén, savén khardé pe bjav: i jone na kamlé te javén.

⁴Nevéstyr jov bičhadiá javire dynar'jén, rakirí: ‘Phenén odolénge, savén khardé: ake me kerdjom xabén; guruva i thule kherítka murdalá začhindlé, i saró isyn kerdó, javén pe bjav.’

⁵Ne jone na prilyné léskire lavá dre godý, giné, kon pe félda, kon te kofarinel;

⁶i sys adasavé, savé uhtyldé léskire dynar'jén, ladžakirdé len i muliakirdé,.

⁷I kiéli králi šundiá pal davá, drieván xoliásyja, i jov bičhadiá péskire xaladén i jone muliakirdé kadalé zamaribnar'jen i xačkirdé telé fóro.

⁸Tén'ci jov phendiá dynar'jénge: ‘Bjavitko skamínd isyn skedynó, ne savén khardé, na sys mol;

⁹džán že pe trušulytka dromá, kaj dromá zdžanape, i kicý manušén tumé lathéna, adákicy kharén pe bjav.’

¹⁰I giné péske odolé dynárja pe baré dromá i skedyné sarén, konés lathné: i čoren i lačhen; i bjavitko kher sys pherdó manušénca, savé bešenas pašýl.

¹¹Ne kiéli králi gijá andré, kaj manušá sys bešté, jov dykhciá jekhe manušés, savó na sys uridó, syr trej pe bjav,

¹²i jov phendiá léske: ‘More? Syr tu gíian adarík dro uribén, so isyn na vaš bjav?’ I jov sys štyl.

¹³Tén'ci králi phendiá dynar'jénge: ‘Phanden léske vastá i ĥerá, i čhurdén les javrí dro ciamlypén (kalypen), odój javéla roibén i dandengiri skriežyma.’

¹⁴Pal-dová so isyn but, savén khardé, ne isyn nábut, savén vykedyné.”

¹⁵Tén'ci Farisiéi giné i dorakirdepe, syr te uhtylén Les dro lav.

¹⁶I jone bičhadé ke Jov péskire sykliaibnytkonén khetané Irodianenca te phučén Léstyr: “Sykliakiribnáskiro! Ame džinása, so Tu san čačunó i sykliakiresa pal drom ke Devléskiro čačipén, na dykhí pe manušéskiro štéto maškír javire manušénde, i Tu na daresa nikonestyr, so Tu na dykhésa pe léskiro štéto maškír manušénde;

¹⁷tedy phen aménge, syr Tu duminesa: ci isyn pir Zakóno te pleskiras namirja (podat') kiesarjoske ci nad?”

¹⁸Ne Isúso džindiá léngiri dujemuitkima i phendiá: “Sóske tumé Man kaména te propatiakiren, dujemuitka?

¹⁹Sykavén Mánge ĥasprin (kapieika), savjása tumé pleskirena namirja (podat')!” I jone jandlé Léske dinarijo.

²⁰I Jov rakiréla lénge: “Konéskiro muj i lav isyn vyčhindlé adái?”

²¹Jone phendlé: “Kiesarjoskiro.” Tedy Jov rakiréla lénge: “Otdén že kiesarjoskiro Kiesarjoske, a Devléskiro Devléske.”

²²I kiéli jone šundlé davá, dynepe divoske i giné krig Léstyr.

²³Dro dová-pac' dyvés podginé ke Jov Sadukiei, savé rakiréna, so nane otdžidyipen meribnástyr, i phučné Léstyr,

²⁴rakirí: “Sykliakiribnáskiro! Mójza (Moisiejo) phendiá: ‘Kóli manúš meréla, i na sys léste čhavorén, mek léskiro pšal te lel léskire romniá paloróm, sob (kaj) te riskirél pale mulé-pšaleskiro ródo.’

²⁵Ake, sys aménde eftá pšála: phuredýr pšal syr lyjape, myjá bi čhavorengiro i mekciá jov peskirjá romniá péskire pšaléske;

²⁶i adiáke sys javiresa, tritonesa ke eftáto.

²⁷Pal lénde sarénde i myjá džuvlý.

²⁸Syr javéla otdžidyipen meribnástyr, konéskiri romný joj iavéla eftandyr? Pal-dová so joj sys paloróm pal sarénde.”

²⁹Ne Isúso otphendiá i phendiá lénge: “Tumé denape dukhá, pal-dová so na džinéna ni Svénto Čhinybén, ni zor Devléskiri.

³⁰Pal-dová so, syr javéla otdžidyipen meribnástyr, na javéna te lenpe i te vydžán paloróm, a javéna syr Jangóly dro Bolybnáskiro Rajo.

³¹Ne pal otdžidyipen meribnástyr, naúšto tumé na gindlé, so Devél phendiá tuménge:

³²‘Me som Avramoskiro Devél, i Isakóskiro Devél, i Jakovóskiro Devél’? Jov isyn Devél džidé-manušéngiro, a na mulengiro.”

³³I kiéli manušá šundlé davá, jone divindlépe pe Léskiro sykliakiribén.

³⁴I kiéli Farisiéi šundlé, so Jov začhudia Sadukiejen te javén štyl, skedynépe pašýl Léste.

³⁵I jekh léndyr, Zakonoskiro sykliakiribnari, phuciá Léstyr, sob (kaj) te propatiakiren Les:

³⁶“Sykliakiribnáskiro, savó isyn naj baredýr priphenybén dro Zakóno?”

³⁷I Jov phendiá léske: “Rikir syr Drógima Ras-Devlés tyrés saré ilésa peskiresa i saré tyré duhósa, i saré tyré godiása.”

³⁸Davá isyn naj baredýr i pérvo priphenybén.

³⁹Javír isyn dasavo syr pérvo: ‘Sykáv patýv péskire pašatuné manušéske syr kokoró péske.’

⁴⁰Pe kadalé duj priphenybená rikirélape saró Zakóno i prorokengiro sykliakiribén.”

⁴¹I kiéli Farisiéi skedynépe, Isúso phuciá léndyr:

⁴²phení: “So tumé duminéna pal Xristosóste? Konéskiro Čhavó isyn Jov?” Jone rakiréna Léske: “Davidóskiro.”

⁴³Jov rakiréla lénge: “Syr tedy Davído, syr léske uphendia Dúho (Fáno), khardiá Les’ Rajo Dévla’, rakirí:

⁴⁴‘Phendia Raj Devél Ráske-Devléske miréske: ‘Beš pir čačó vast Mándyr, angíl, syr Me čhuváva vergén tel ĥerá Tyré?’

⁴⁵Kóli tedy Davído khardiá Les ‘Rajo Dévla’, syr ža Jov isyn čhavó léskiro?”

⁴⁶I nikón na mogindiá te otphenel Léske ni lav, i dolé dyveséstyr nikoneste butýr na sys muršypen te phučel Léstyr butýr.