Read Biblija - Pe Baltitko Romani čib (Romanes) 2019 Baltic Romani Bible Matfiejo 23 Bible Online

Matfiejo 23 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 23

¹Tedy Isúso phendiá manušénge i Péskire sykliaibnytkonénge:

²“Pe Mojzáskiro štéto sykliakiréna lylvarítka i Farisiéi;

³paldavá saró, so jone phenéna, kandén i kerén saró, a na kerén, syr jone keréna; pal-dová so jone na keréna dová, so jone sykliakiréna,

⁴i jone phandena khetané baré pharipena i čhuvéna len pe manušéngire psiké, a kokoré na kaména i anguštesa te den vast lénge.

⁵Ne saró, so jone keréna, — davá vaš dová, sob (kaj) len te dykhén manušá: jone buĥliakirena pharty (lienty) pe čikat i pe vast mangipnytkone lavénca i barjakirena bryndy (fal'bonki),

⁶i vykedena naj fededýr štéty pal khardé skaminda i anglatuné štéty dre sinagogi,

⁷sob (kaj) manušá te den ‘paklono’ lénge pe targitka štéty i te kharén len ‘Ravvi’;

⁸ne mek nikón te na kharel tumen ‘Ravvi’; pal-dová so aménde isyn jekh Sykliakiribnáskiro, tumé ž san pšála maškír péste.

⁹I nikonés pe phuv te na kharén ‘dadésa’, pal-dová so tuménde isyn jekh Dad, Savó isyn dro Bolybnáskiro Rajo.

¹⁰I te na kharén tut ‘sykliakiribnáskiro’; pal-dová so isyn jekh tuménde Sykliakiribnáskiro Xristóso.

¹¹I kon baredýr tuméndyr pir štéto maškír manušénde, mek te javél dynári tuménge.

¹²Ne dová, kon ĥazdéla pes, les Devél čhuvéla teledýr, a kon čhuvéla pes teledýr, kodolés Devél ĥazdéla vučedýr.

¹³Bida tuménge, dujemuitka lylvarítka i Farisiéi, savé začhakirena vudará dro Kralipén dro Bolybnáskiro Rajo angíl manušénde; pal-dová so tumé kokoré na zadžána, i tumé san terdé pe drom odolénde, savé kaména te zadžán.

¹⁴Bida tuménge, dujemuitka lylvarítka i Farisiéi, so tumé obhana pivliengire (udovengire) kherá i pefromi ĥará (dlúges) mangénape Devléske: pal davá tuménge javéla pharí kára.

¹⁵Bida tuménge, dujemuitka lylvarítka i Farisiéi, so tumé prodžána mórjo (derjáv) i phuv, sob (kaj) te riskirén jekhe manušés te patial Najudendyr: i kiéli jov priléla lav, tedy keréna léstyr kadasaves, savó dre duj móly isyn butýr mol te džal dro liúno (ado), syr tumé san.

¹⁶Bida tuménge, kororé lydžaibnáskire, savé rakiréna: ‘Kon sovlahala khangirjasa, davá isyn nisó; ne kon sovlahala khangirjákire suvnakása, kodová manúš isyn bangó te kerél pir lav.’

¹⁷Tumé san bigodiakire i kororé, so isyn kučedyr: suvnakáj ci khangirí, saví svenciakirela suvnakái?

¹⁸I, ‘kon sovlahala altarjosa nisó, ne kon sovlahala sventoné dyibnasa, kodová isyn bangó te kerél saró.’

¹⁹Tumé san kororé manušá! So ž isyn kučedyr: svénto dyibén ci altárjo, kaj svénto dyibén svenciakirelape vaš Devléske?

²⁰Paldavá, kon sovlahala altarjosa, sovlahala sarésa, so manušá čhudé pe altárjo;

²¹I kon sovlahala khangirjasa, sovlahala lása i Kodolesa, Kon dživéla dre khangirí.

²²I kon sovlahala Bolybnáskire Rajosa, sovlahala Devléskire štetosa, kaj Devél xulainela, i Lésa, Savó isyn beštó pe davá štéto.

²³Bida tuménge, dujemuitka lylvarítka i Farisiéi: pal-dová so tumé déna déšto miéra miatatyr, ukropostyr, kminostyr, ne tumé na kutiakirena dová, so butýr trej dro Zakóno: čačunó séndo i tangipén i patiaibén: davá treindiá te kerén i adiáke-pac' te na bistren pal javír.

²⁴Tumé san kororé lydžaipnarja, savé piricedinena dzyndzaris (komaros), ne nakhavena vierbliudos!

²⁵Bida tuménge, dujemuitka lylvarítka i Farisiéi: pal-dová so tumé žužakirena tahtáj (čaša) i čaró javriestyr, ne andrál jone sykavéna tumarí bokh ke čúžo mištypén i skvapnyma.

²⁶Tu san kororó Farisiejo! Angíl vyžužakir andrál tahtáj i čaró, sob (kaj) te javén žužé javriestyr.

²⁷Bida tuménge, dujemuitka lylvarítka i Farisiéi: pal-dová so tumé san syr koplicy, savé isyn parniakirde i savé isyn goža javriestyr, ne andrál jone isyn pherdé kokalenca mulé manušéndyr i saré džungalypnasa (brydkimasa).

²⁸Adiáke-pac' tumé javriestyr sykadjona syr patiaibnytka manušá manušénge, ne andrál tumé san dujemuitka i drieván grehítka.

²⁹Bida tuménge, dujemuitka lylvarítka i Farisiéi, pal-dová so keréna koplicy prorokenge i gožakirena pomniki patiaibnytkonenge,

³⁰i rakiréna: ‘Kóli ame dživasas dre amaré dadengíre dyvesá, ame na javasas malá odolénge, savé muliakirenas prorokén.’

³¹Pir daja pričyna tumé dophenena pe péste, so tumé san kodolengire čhavé, savé muliakirenas prorokén:

³²tedy končynen davá, so tumaré prapapy lyné te kerén.

³³Tumé san sapa, ródo sapitko, syr tuménge te našén sendostyr dro liúno (ado)?

³⁴Ake, paldavá Me bičhaváva ke tumé prorokén i god'varé manušén i lylvaritkonen; vari-savén léndyr tumé muliakirena i primarena pe trušúl, i javirén javéna te šuliakiren dre sinagogi i tradén štetóstyr pe štéto;

³⁵paldavá mek te ginelpe pal tuménde saró rat patiaibnytkone manušéngiro, so tumé pročhude pe phuv: Avieljoskire patiaibnytkone ratestyr ke Zaharijoskiro rat, Varahijoskire čhavéskiro, konés tumé muliakirdé, maškír Khangirí i altárjo.

³⁶Čačes, Me rakiráva tuménge: kadaj sarí kára javéla pe davá ródo.

³⁷Jerusalime! Jerusalime! Dro savó muliakirenas prorokén i šuliakirenas barénca kodolén, savén bičhadé ke tu. Kicý móly Me kamám te skedav čhavorén tyrén, syr čirikly skedéla čirikloren tel phak i tumé na kamlé!

³⁸Ake, kher tumaró mekelape čhučó (pusto) tuménge.

³⁹Paldavá Me rakiráva tuménge: tumé na javéna te dykhén Man kadalé dyveséstyr angíl dová, syr tumé phenéna: ‘Bahtiakirdó isyn Odová, Savó džála vaš Devléskiro lav.’”