Read Biblija - Pe Baltitko Romani čib (Romanes) 2019 Baltic Romani Bible Matfiejo 24 Bible Online

Matfiejo 24 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 24

¹I kiéli Isúso vygijá Khangirjátyr i kedelaspe te džal Péske, podginé ke Jov Léskire sykliaibnýtka, sob (kaj) te sykavén Léske saró keriben Khangirjákiro.

²Jov rakiréla lénge adiáke: “Dykhéna davá saró? Čačes, Me rakiráva tuménge: na jačélape adáj ni jekh bar pe bar, savó te na javél phagirdó.”

³I kiéli Jov sys beštó pe Olivítko bérga, podginé Léskire sykliaibnýtka ke Jov jekhdžine i phučné: “Phen aménge, kiéli davá saró javéla, i saví ĥiertýk (znamiénijo) javéla angíl, syr Tu javésa i vaš svetoskiro kónco (jagóro)?”

⁴I otphendiá Isúso i phendiá lénge: “Rakhénpe, sob (kaj) nikón te na xohavél tumen.

⁵Pal-dová, so but javéna Miré lavésa, rakirí: ‘Me som Xristóso,’ i xohavena but manušén.

⁶I tumé javéna te šunén pal maribén i rakiribena pal maribena. Dykhén, na strahadjon; saró davá trej te javél, ne davá iščo (inké) na kónco (na jagóro).

⁷Pal-dová so ĥazdénape manušá pe manušénde i kralipén pe kralipén, i bokha javéna, i meribnytka fránsy i phuv javéla te trinskirelpe pir štéty.

⁸Saró kadavá javéla angíl sýrby dukhá, dre savó nevó svéto bijandjola.

⁹Tedy javéna te zden tumen pe mén'ki i muliakirena tumen, i javéna te na sykavén patýv tuménge pal Miro lav.

¹⁰I but tuméndyr mekéna te patián, i javéna te zden jekh jekhés, i javéna te na sykavén patýv jekh jekhéske;

¹¹i javéna but xohané proróki i xohavena but manušén;

¹²i pal-dová so javéla butýr čoripén, but manušá mekéna te sykavén patýv jekh jekhéske.

¹³Ne kon vyrikiréla saró ke kónco (ke jagóro), kodová zrakhélape.

¹⁴I javéla te phenelpe bahtalý zan (zvies') pal Devléskiro Kralipén pir saró svéto syr dophenybén vaš saré nácyi; i tedy javéla kónco (jagóro)!

¹⁵Paldavá, kiéli tumé dykhéna golotyniakiro džungalypén (brytkima), savó javéla te terdjol pe svénto štéto, so rakirdiá proróko Danijéljo, (kon ginéla, mek te ĥaljol),

¹⁶tedy kodolé, savé isyn dre Judéia, mek te našén dre bérgi;

¹⁷i kon isyn pe kherítko stréha (čhakín), mek te na džal telé te lel vari-so kheréskire mištypnástyr,

¹⁸i kon isyn pe félda, mek te na risjol pale te lel péskiro uribén.

¹⁹Mén'ki javéna tedy perale džuvlienge, i džuvlienge, savé čaravena kolynesa tykné bijatén dre dolé dyvesá.

²⁰Mangénpe Devléske, sob (kaj) te na javél trej te našén ivanta(tes)kiro (zimakiro) ci savatoné (subotoné):

²¹pal-dová so tedy javéla dasaví bibáht, saví na sys svetóskire anglypnástyr, i so butýr na javéla nijékhvar;

²²I kóli dalé dyvesá te na javénas krotkedyr, nikón džidendyr na zrakhelaspe; ne vaš manušénge, savén Devél vykedyjá, javéna krotkedyr dalé dyvesá.

²³Tén'ci, kóli vari-kon phenéla tuménge: ‘Ake, isyn Xristóso’ ci ‘odój’, na patián.

²⁴Pal-dová so javéna xohané xristosy, xohané proróki i jone sykavéna baré ĥiertyká i keréna dívy, sob (kaj) te xohaven až kodolén, savén Devél vykedyjá, kóli saštý javéla.

²⁵Ake, Me tuménge angilphendjom.

²⁶Paldová, kóli jone phenéna tuménge: ‘Áke, Jov isyn pe čhučé prahi’, na džán javrí; kóli jone phenéna: ‘Áke, Jov isyn dro andratuný štúba’, na patián.

²⁷Pal-dová so, syr bliskavica džála vastokóstyr i jasnedyr javéla ke zapado, adiáke javéla Čhavó.

²⁸Kaj javéla trúpo, odój skedénape orly (kidy).

²⁹I jekhátyr (srázu) paló daja pharí bída dre dolé dyvesá kham murdjola, čhon na javéla te svencynel, i čergeniá peréna bolybnástyr, i bolybnáskire zorja javéna triinskirde

³⁰I tedy sykadjola ĥiertýk pe bolybén, saví déla manušénge džinybén, so javéla Čhavó Manušéskiro, i tén'či saré manušýtka ródy javéna to rovén pharés i dykhéna Čhavés Manušeskires, Savó javéla te džal telé dre óbloki baré zorjása i jarkone Devléskire slavása.

³¹I bičhavéla Jov Péskire Jangolen baré rogosa (trubasa), i skedéla khetané, konés Jov vykedyjá, štaré rigéndyr i jekhe bolybnytkone jagoróstyr (krajostyr) ke javír.

³²Sykljon sykaibén (primiéro) inžyritkone kaštéstyr: kiéli léskire randiá (vétki) jačénape kovlé i mekéna patria (listy), džinén, so syg javéla lynaj.

³³Adiáke-pac' i tumé, syr javéna te dykhén, so saró davá kerélape, džinén, so Jov isyn nádur, pašýl vudará.

³⁴Čačes, Me rakiráva tuménge: na prodžála davá manušýtko ródo angíl dová, syr saró davá kerélape.

³⁵Bolybén i phuv prodžána, a lavá Miré na prodžána.

³⁶Ne nikón na džinéla ni dyvés, ni mardó, kiéli saró davá javéla, ni bolybnáskire Jangóly, ni Čhavó, a jekh Dad džinéla.

³⁷I, syr sys dre dolé dyvesá, kiéli sys Nojo, adiáke-pac' javéla Čhavó Manušéskiro.

³⁸Paldavá so, syr angíl potopo manušá xané i piné, lynepe i džánas paloróm angíl dová dyvés, dro savó Nojo zagijá dro kovčego,

³⁹i na ĥaljonas, paka jaciá patopo i na lydžyja pésa len sarén, adiáke-pac' javéla Čhavó Manušéskiro.

⁴⁰Tedy javéna duj manušá pe félda: jekhés Raj Devél léla, javirés jačkiréla,

⁴¹ci duj džuvliá, so mielinena žernovone barénca (beledinienca): jekha Raj Devél léla, javirja jačkiréla.

⁴²Rakhénpe, pal-dová so na džinéna, kiéli javéla tumaró Raj Devél.

⁴³Tumé ž džinén davá, so, kóli kheréskiro xuláj džinelas, kiéli ratý javéla čor, jov na javélas sutó i na délas, sob (kaj) čor te pod'ganavelpe tel léskiro kher.

⁴⁴Paldavá javén tumé adiáke-pac' skedyné, pal-dová so Čhavó Manušéskiro javéla dre dasavo mardó (štúnda), so tumé na duminéna.

⁴⁵Kon tedy isyn patiaibnýtko i god'varó pishári, konéske léskiro xuláj dyjá zor pe léskire butiarnende, sob (kaj) te del te xal lénge dro časo, savó trej?

⁴⁶Bahtaló isyn kodová pishári, konéskiro xulái, syr javéla, lathéla, so jov keréla adiáke, syr isyn uphendló léske.

⁴⁷Čačes, Me rakiráva tuménge: jov déla léske zor pe saró léskiro mištypén.

⁴⁸Ne kóli adavá fuj pishári phenéla péske: ‘Miro raj zarikirelape’,

⁴⁹i léla te šuliakirel péskire malen-pishar'jén, i xal i te p'jel matybnar'jenca,

⁵⁰tedy javéla pishariskiro xuláj dro dová-pac' mardó (štúnda), pal savó jov na džinéla,

⁵¹i rosčingirela xuláj les pe paš i déla léske dasavo taláno, syr dujémuitkonenge: odój javéla roibén i dandengiri skriežyma.