Read Biblija - Pe Baltitko Romani čib (Romanes) 2019 Baltic Romani Bible Matfiejo 25 Bible Online

Matfiejo 25 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 25

¹Tedy Kralipén dro Bolybnáskiro Rajo javéla sýrby deš patyvalé terné džuvliá, savé lyné ksilytka lampy i giné angle te streninen (te pirilen) Ternes.

²Pandž léndyr sys god'varé, pandž sys dylynin'ka.

³Dylynin'ka ža lyné péskire lampy, ne na lyné ksil pésa;

⁴Ne god'varé lyné ksil dre khoré khetané lampenca.

⁵Ne syr Ternó na javélas ĥará (dlúges), saré jone dyné lindra (zadriemindle) i zasutne.

⁶Ne dre paš rat sys godlyma: ‘Ĥáda, Ternó, džán javrí te streninen!’

⁷Tén'ci saré patyvalé džuvliá uštine i podpravindle péskire lampy.

⁸Dylynin'ka ž phendlé god'varenge: ‘Den aménge nábut ksil tumaró, pal-dová so amaré lampy murdjona syg.’

⁹Ne god'varé otphendlé, rakirí: ‘Nad, sob (kaj) te na uhtylel (nádosi) ksil aménde i tuménde. Džán fedýr ke bikiibnarja te kinen péske!’

¹⁰I paka jone psirenas te kinen, javdiá Ternó, i kodolé, savé isyn skedyné, zaginé lésa khetané pe bjav; i vudará zaphandlepe.

¹¹Korigedýr (pozžedýr) javénas javír patyvalé džuvliá, savé jačnépe, rakirí: ‘Rajo Dévla! Psirav (otphande) aménge:

¹²ne Jov otphenéla lavénca: ‘Čačes, Me rakiráva tuménge, Me na džinóm tumen.’

¹³Paldavá javén pe stréga, na soven, syr tumé na džinéna ni dyvés, ni mardó (štúnda).”

¹⁴I Kralipén dro Bolybnáskiro Rajo javéla sýrby manúš, savó tradelas krig, i savó khardiá péskire pishar'jén i zdyja lénge pe patýv péskiro mištypén.

¹⁵I jekhéske jov dyjá pandž talánty, javireske duj, iščo (inké) jekhéske jekh, kažnonéske pir léskiri zor, i tradyjá kheréstyr.

¹⁶I gijá jekhátyr kodová, savó doresciá pandž talánty i kofarindia lénca i zakerdia iščo (inké) pandž talánty.

¹⁷Adiáke-pac' kodová, savó doresciá duj talánty, zakerdia iščo (inké) duj talánty.

¹⁸Ne kodová, savó doresciá jekh, gijá i zaĥanadia dre phuv i garadia léskire xuláskire lové.

¹⁹I pir but dyvesá, javélas xuláj kadalé pishar'jengiro i trebinela léndyr otphenybén pal lové.

²⁰I podgíia pishári, kon doresciá pandž talánty, jandiá javír pandž talánty, i phendiá: ‘Rajo, tu mánge dopatiandyjan pandž talánty; ake, javír pandž talánty, so me zakerdjom!’

²¹Léskiro xuláj phendiá léske: ‘Mištó, tu san lačhó i patiaibnýtko pishári, tu sánas patiaibnýtko nabaré lovenca; me dopatiava túke baré lové; jav i rádynpe khetané tyré xulása!’

²²Podgíia i pishári, kon doresciá duj talánty i phendiá: ‘Rajo, tu mánge dopatiandyjan duj talánty: ake, javír duj talánty, so me zakerdjom.

²³Léskiro xuláj phendiá léske: “Mištó, tu san lačhó i patiaibnýtko pishári, tu sánas patiaibnýtko nabaré lovenca; me dopatiava túke baré lové: jav i rádynpe khetané tyré xulása.”

²⁴Podgíia i pishári, kon doresciá jekh talanto i phendiá: ‘Rajo, me džináv, so tu san pharó manúš: sčhinesa odój, kaj na čhudián dre phuv, i skedesa odój, kaj na rosčhudian,

²⁵i paldová me poddarandyjom i garadjom talanto dre phuv; ake, tyré lové.’

²⁶I otphendiá léske xulái: ‘Tu san bibahtaló i kirne-maséngiro pishári; tu džindian, so me sčhinava, kaj na čhudjom dre phuv, i skedáva, kaj na rosčhudjom?

²⁷Paldová treindiá túke te des miro rup tel kófo kofar'jenge, i syr me risijom, me doresavas péskiro kofosa.

²⁸Paldavá len léstyr talanto i den kodoléske, konéste isyn deš talánty:

²⁹pal-dová so kažnonéske, savéste isyn, javéla butýr dynó, i léste javéla butýr, syr trej; ne kodolestyr, savéste nane, lélape léstyr dová, so isyn léste.

³⁰I čhurdén javrí zlydnia pisharís dro ciamlypén javriestyr; odój javéla roibén i dandengiri skriežyma’

³¹I kiéli javéla Čhavó Manušéskiro kralitkone slavása i saré Léskire Jangolenca, tedy Jov bešéla pe Léskiro slavútno trono;

³²i angíl Léste skedénape saré nácyi, i Jov čhuvéla dre rigá jekhe javirendyr, syr čhupnári (pastuho) čhuvéla dre rigá bakrén buzniendyr,

³³i Jov čhuvéla bakrén pir čačí rig, buznien pir zérvo (liévo) rig.

³⁴Tedy phenéla Králi odolénge, savé isyn pir čačí rig Léstyr: ‘Javén tumé, savén Miro Dad bahtiakirdiá, javén i prilén Kralipén dro Bolybnáskiro Rajo, savó Jov skedyjá tuménge angíl, syr Jov sozdyjá svéto.

³⁵Pal-dová so, kiéli Me sómas bokhalo, i tumé čaliakirde Man; kamdjom te pjáv i tumé dyné te pjáv, Me sómas čúžo manúš, i tumé prilyné Man,

³⁶Me sómas bi uribnaskiro i tumé uridé Man; sómas nasvaló i tumé zaginé ke Me, sómas beštó i tumé javné te dykhenpe Mánca.’

³⁷Tedy patiaibnytka otphenena Léske, phení: ‘Rajo Dévla, kiéli ame dykhciam, so Tu sánas bokhalo, i čaradiam? Ci, syr Túte sys trébima te p'jes, i dyjam te p'jes?

³⁸I kiéli ž dykhciam, so Tu sánas čúžo manúš, tedy ž prilyjam tut? Ci bi uribnaskiro, i uridiam že Tut?

³⁹I kiéli ž dykhciam, so Tu sánas nasvaló, ci dro štaribén i javdiám že te dykhaspe Túsa?’

⁴⁰I otphenéla lénge Králi: ‘Čačes, rakiráva tuménge: ‘Dová, so tumé kerdé davá Miré pšalénge, savénde nane dasaví zor, tumé, xaj, kerdé Mánge.’

⁴¹Tén'ci Jov phenéla kodolénge, savé isyn pe zérvo (liévo) vast Léstyr: ‘Džán krig Mándyr, prokošne, dre jag viéčno, so isyn skedyny vaš nalačheske i léskire Jangolenge:

⁴²pal-dová, kiéli Me sómas bokhalo, i tumé na čarade Man, trebindia mánge te pjáv, i tumé na dyné te pjáv;

⁴³Me sómas čúžo manúš i tumé na prilyné Man, Sómas bi uribnaskiro, i tumé na uridé Man, Sómas nasvaló i dro štaribén i tumé na javné te dykhenpe Mánca.’

⁴⁴Tedy otphenena i jone: ‘Rajo Dévla, kiéli ame dykhciam Tut, so Tu sánas bokhalo, ci syr túte sys trébima te p'jes, ci Tu sánas čúžo manúš, ci bi uribnaskiro, ci nasvaló ci dro štaribén i na dyjam vast Túke?’

⁴⁵Tedy Jov otphenéla lénge, phení: ‘Čačes, Me rakiráva tuménge: ‘Syr tumé na kerdé davá Miré pšalénge, savénde nane dasaví zor, tumé na kerdé i Mánge.’

⁴⁶I jone džána péske dre viéčna mén'ki, a patiaibnytka džána péske dro džiibén viéčno.”