Read Biblija - Pe Baltitko Romani čib (Romanes) 2019 Baltic Romani Bible Matfiejo 26 Bible Online

Matfiejo 26 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 26

¹I sys adiáke: kiéli končyndia Isúso dalé lavá, Jov phendiá Péskire sykliaibnytkonénge:

²“Tumé džinéna, so javéla Patradí pir duj dyvesá i Čhavó Manušéskiro javéla zdyno pe primariben pe trušúl.”

³Tedy skedynépe rašángire barydyrá i godephuré dre rašángire barydyreskiri gréda (dvóro), savés khardé Kaiáfa,

⁴i khetané zrakirdepe te uhtylén Isusós frotymasa, i te muliakirén Les;

⁵ne jone rakirénas: “Naštý davá te kerás dro svénko, sob (kaj) te na ĥazdén manušá šumo godlenca.”

⁶Kiéli ž Isúso sys dre Vifanija dro kher Simonoskiro Prokazytkoneskiro,

⁷to podgíia ke Jov džuvlý, savjate sys alavastrytko khoró kučipnaskire mirósa i joj čhuvelas Léske pe šeró, syr Jov sys beštó pašýl skamínd.

⁸Ne kiéli sykliaibnýtka dykhné davá, jone xoliasyne, phení: “Vaš so davá te xasiakirél?

⁹Naúšto sys naštý te biknen davá pal baré lové i te rozden lové bogenge.”

¹⁰Ne Isúso džindiá, so jone rakirénas, i phendiá lénge: “Sóske tumé keréna pharó adalé džuvliáke? Joj kerdiá lačhó réndo (diélo) vaš Mánge.

¹¹Paldová so bógi ŭsády (sak) isyn pašýl tuménde, ne Me na javáva ŭsády (sak) tuménca.

¹²Pal-dová so, kóli joj čhudiá davá miro pe masá Miré, joj kerdiá davá vaš Miro garaiben.

¹³Čačes, Me rakiráva tuménge: kaj by te na javél te phenelpe bahtalý zvies' pir saró svéto, javéla phendló pal dová, so joj kerdiá, syr ripiribén pal láte.”

¹⁴Tén'ci jekh dešudujendyr, savés khardé Juda Iskarioto, gijá ke rašángire barydyrá,

¹⁵i phendiá: “So tumé dénas mánge, kóli me zdava Les tuménge?” I jone vypleskirde léske trijánda rupune saste.

¹⁶I kodolé dyveséstyr Juda lyjá te rodél vakancyja (slučajo), sob (kaj) te zdel Les.

¹⁷Dro pérvo ž dyvés apriesnokengiro svénko giné sykliaibnýtka ke Isúso, rakirí: “Kaj Tu kamésa, sob (kaj) ame te kerás Túke Patraditko xabén?”

¹⁸Jov ža phendiá: “Džán dro fóro ke manúš i phenén léske: ‘Sykliakiribnáskiro rakiréla: Miro časo podgíia, Túte Me svenkinava Patradí Miré sykliaibnytkonénca.’”

¹⁹I sykliaibnýtka kerdé, syr Isúso priphendiá lénge, i kerdé Patradí.

²⁰Kiéli javdiá bel'vél', Isúso besciá pal skamínd Péskire dešudujé sykliabnytkonenca.

²¹I kiéli jone xanas, Jov phendiá: “Čačes, Me rakiráva tuménge: Jekh tuméndyr zdela Man.”

²²I jone pyné dro dúho (fáno), i lyné te rakirén Léske jekh pal jekhéste: “Čačes, davá na me, Rajo Dévla?”

²³Jov ža otphendiá: “Kon čhudiá vast Mánca dro čaró, kodová zdela Man.

²⁴Čačes, Čhavó Manušéskiro džála, syr isyn čhindló pal Léste, ne bída kodolé manušéske, savó zdela Čhavés Manušeskires; fedýr javélas vaš léske te na bijandjol.”

²⁵I Juda, savó zdelas Les, otphendiá: “Ci davá na me, Ravvi?” Jov phendiá Léske: “Tu ž phendián!”

²⁶I kiéli jone xanas, Isúso lyjá maró i bahtiakirdiá les i rosphagirdiá les i, syr dyjá sykliaibnytkonénge, phendiá: “Len, xan, davá isyn Miré masá.”

²⁷I kiéli Jov lyjá tahtáj (čaša) i phendiá parikiriben Devléske, Jov dyjá Les sykliaibnytkonénge, phení: “P'jen Léstyr saré.

²⁸Pal-dová so davá isyn Miro Rat zavietóskiro, savó isyn pročhudo pal butende vaš grehengiro otmekiben.

²⁹I Me phenáva tuménge: Me na javáva dalé dyveséstyr butýr te pjáv aplodo dalé vinagradytkone xrustostyr ke/žýko dová dyvés, kiéli Me javáva te pjáv tuménca neví mol (vino) dre Miré-Dadéskiro Kralipén’”

³⁰I kiéli jony bagandle šardytko gilý Devléske, to tedy giné pe Olivítko (Jelieonoskiri) bérga.

³¹Tén'ci rakiréla lénge Isúso: “Saré tumé Man mekéna dre daja rat. Pal-dová so isyn čhindló: ‘Me xasiakiráva Čhupnaris i rosprastanape bakré;’

³²ne paló davá, kiéli Me otdžidjovava, Me sygedýr tuméndyr javáva dre Galiliéia.”

³³Ne Pétri otphendiá Léske dasavé lavénca: “Kóli i saré tumé mekéna Tut, me nikieli davá na keráva.”

³⁴Phendia léske Isúso: “Čačes, Me rakiráva túke: adadyvés bel'veliakiro, angíl dová, syr bašno probagala, tu trin móly otphenesape Mándyr.”

³⁵Rakiréla Léske Pétri: “I kóli Mánge javéla trej te merav Túsa, me na otphenavape Tútyr.” Adiáke-pac' phendlé i javír sykliaibnýtka.

³⁶Tén'ci džálas Isúso lénca pe štéto, so khardé Giefsimanija, i rakirélas Péskire sykliaibnytkonénge: “Bešén kadaj, angíl dová, syr Me džáva te mangavpe Devléske odój.”

³⁷I lyjá Jov Pésa Petris i dujén čhavén Zaviediejoskiren, i obuhtyldia Les bari túga i traš (dar).

³⁸Tedy Jov rakiréla lénge: “Miro iló isyn pherdó meribnytkone tugasa (skorbiasa), javén adáj Mánca, na soven.”

³⁹I Jov odgija nábut angíl, pyjá mósa pe phuv, mangdiápe Devléske i rakirdiá: “Dádo Míro, kóli saštý, mek prodžal davá tahtáj dre rig Mándyr; ne na adiáke, syr Mánge trej, a syr Túke trej.”

⁴⁰I javélas Jov ke sykliaibnýtka i lathelas, so jone sys suté, i rakirélas Petriske: “Naúšto na mogindlé tumé i jekh mardó (štúnda) te rakhénpe, te javén Mánca?

⁴¹Rakhénpe i mangénpe Devléske, sob (kaj) tumé te na poperen dro propatiakiriben; dúho (fáno) isyn sastó, ne loč (plot') isyn bizorjakiri.”

⁴²Nevéstyr javír mólo, Jov odgija dre rig i mangdiápe Devléske dasavé lavénca: “Dádo Miro, kóli saštý, sob (kaj) davá tahtáj te prodžal dre rig Mándyr, paka Me na vypjava les, mek te kerélpe vólia Tyrí!”

⁴³I nevéstyr Jov risijá pale i lathiá, so jone sys suté, pal-dová so léngire jakhá sys začhakirde.

⁴⁴I Jov mekciá len nevéstyr i gijá krig, i mangdiápe Devléske tríto mólo, phení dasavo-pac' lav.

⁴⁵Tén'ci Jov javélas ke Péskire sykliaibnýtka i rakirélas lénge: “Tumé usá san suté i otkhinjona? Ake, mardó (štúnda) podgíia i Čhavés Manušeskires zdena dre grehengire vastá.

⁴⁶Uštén, džása, ake, uže sarésa isyn pašýl kodová, kon zdela Man.”

⁴⁷I syr Jov iščo (inké) rakirdiá, ake, Juda podgíia, jekh dešudujendyr sykliaibnytkonendyr, i sys lésa but manušá kurtalenca i kilenca, rašángire barydyrendyr i godephurendyr.

⁴⁸Zdyibnari dyjá lénge špéra (znako); phení: “Kadavá, Konés me čamudava, isyn Jov: zakeden Les.”

⁴⁹I jekhátyr podgíia jov ke Isúso i phendiá: “Dobridim, Ravvi!” I čamudia Les.

⁵⁰Isúso že phendiá Léske: “More, ake, vaš so tu san adái!” Tedy jone giné pašyledýr, čhudé vastá pe Léste i uhtyldé Les.

⁵¹I, ake, jekh, savó sys Isusósa, dyjape vastésa i vytyrdyja kurtála péskiri, i čingirdia lása pisharís, rašángire barydyreskires, i otčingirdia léske kan.

⁵²Ne rakiréla léske Isúso: “Čhuv pale péskiri kurtála pe lákiro štéto; pal-dová so, kon léla kurtála, kurtalátyr xasjola.

⁵³Na duminesa tu, so Me na moginavas te mangav Mires, Dadés, i Jov na délas Mánge dešudúj Jangoléngire liegiony?

⁵⁴Syr tedy spolninelaspe Svénto Čhinybén, so davá trej te javél?”

⁵⁵Dre dová-pac' mardó (štúnda) Isúso phendiá manušénge: “Syr pe rozmaribnariste tumé vyginé kurtalenca i kilenca te len Man? Me kažno dyvés sómas beštó tuménca i sykliakirdjom dre Khangirí, i tumé na lenas Man.

⁵⁶Ne davá saró kerdiápe, sob (kaj) te kerenpe ke kónco/iagóro (te spolninenpe) prorokéngire lavá dro Svénto Čhinybén.”

⁵⁷I kodolé, savé lyné Isusós, jandlé Les ke Kaiáfa, pérvo rašángiro barydyró, kaj skedynépe lylvarítka i godephuré.

⁵⁸Pétri ž džálas pal Léste duripnastyr ke pérvo rašangireskiri gréda (dvóro), i syr zagijá andré, sys beštó javire stregar'jenca, sob (kaj) te dykhél kónco (jagóro).

⁵⁹Rašaja i saró Siniedriono saré manušénca rodyne xohanó dophenybén pe Isusóste, sob (kaj) te muliakirén Les.

⁶⁰I na lathné nisó, na dykhí, so but xohané jakhítka (svidietieli) javénas angíl Siniedriono. Ne korigedýr (pozžedýr) podginé duj,

⁶¹i phendlé: “Kadavá manúš phendiá: ‘Me mogináva te rosphagirav Devléskiri naj bari Khangirí, i te ĥazdav la nevéstyr pal trin dyvesá.’”

⁶²I uštyjá pérvo rašángiro barydyró i phendiá: “Tu nisó na otphenesa? So da dasavo isyn, so jone dophenena pe Túte?”

⁶³Ne Isúso sys štyl. I pérvo rašáj phendiá Léske: “Zasovlahava Tut Devlésa Džidesa: phen aménge, ci Tu san Xristóso, Čhavó Devléskiro?”

⁶⁴Isúso phendiá Léske: “Adiáke, syr Tu phendián; ne Me phenáva tuménge: Adadyvesatune dyveséstyr tumé dykhéna Čhavés Manušéskire, Savó javéla te bešél pe óbloki bolybnáskire pir čačí (pravo) rig Devléskire Zorjakiri.”

⁶⁵Tedy pérvo rašáj roskuscia péskire uribená, i phendiá: “Jov teliakirdia Devlés. Saví aménge iščo (inké) trébima te dophenen? Tumé šundlé ž teliakiriben pe Devléste.

⁶⁶So tumé duminéna?” Jone ž otphendlé: “Isyn bangó, sob (kaj) te muliakirén Les.”

⁶⁷Tedy čungardyne Léske dro muj, i mardé Les; javír pekavenas Les pir muj,

⁶⁸rakirí: “Uĥaljov syr proróko, Xristóso, kon pekadiá Tut?”

⁶⁹Pétri ž sys beštó javriestyr dre gréda, i podgíia ke jov jekh dynárica (služanka) i phendiá: “I tu sánas Isusósa Galilejaninosa.”

⁷⁰Ne jov dyjape pale angíl sarénde, rakirí: “Me na džinóm (na džináv), so tu rakirésa.”

⁷¹I kiéli jov podgíia ke pórta, les dykhciá javír dynárica, i phendiá manušénge, savé sys terdé pašýl: “Kadavá manúš sys Isusósa Nazariejosa.”

⁷²I nevéstyr jov dyjape pale sovlahasa: “Me na džinóm Kadalé Manušés.”

⁷³I nábut korigedýr podginé ke jov manušá, savé sys terdé pašýl, i phendlé Petriske: “Čačó, i tu san léndyr, pal-dová so tyró vyrakiriben sykavéla.”

⁷⁴Tedy jov lyjá te prokošel i te sovlahal: “Me na džinóm (na džináv) Kadalé Manušés” I adáj že probagandia bašno.

⁷⁵I priripirdia Pétri Isusóskiro lav; syr Jov phendiá: “Angíl, syr probagala bašno, tu trin móly otphenesape Mándyr” I gii javrí, jov rondiá kirkes.