Read Biblija - Pe Baltitko Romani čib (Romanes) 2019 Baltic Romani Bible Matfiejo 27 Bible Online

Matfiejo 27 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 27

¹Kiéli jaciá dyvés, pe zlóko, saré rašángire barydyrá i theméskire godephuré, zrakirdepe pe Isusóste, sob (kaj) te muliakirén Les;

²I, kiéli phandle Les, lydžiné Les i zdyne Pilatoske, theméskire barydyreskireske (pravitieljoske).

³Tedy Juda, kon zdyja Les, dykhí, so Isusós sendindle, priĥalyja péskiri bang i dyjá pale trijánda rupuvé lové rašángire barydyrénge i godephurenge,

⁴phení: “Me kerdjom grého, pal-dová so zdyjom Manušés, Savéste isyn bibangipnaskiro rat.” Ne jone phendlé: “So aménge? Davá isyn tyró réndo.”

⁵I jov čhurdyjá rupuvé lové dre Khangirí, gijá javrí i ubladyja.

⁶Ne rašángire barydyrá ĥazdyné rupuvé lové i phendlé “Naštý te čhuvas len dre Khangirjákiri piralý (tyknori), pal-dová so davá isyn ratvalé lové.”

⁷I zrakirdepe i kindle pe dalé lové félda piritkonestyr (goršečnikostyr), sob (kaj) te garaven čužoné manušén.

⁸Paldová i kharlape daja félda ‘Ratvaly félda’ ke adadyvesatuno dyvés.

⁹Tedy kerdiápe kodová, so phendiá proróko Jeriemiéjo: “I jone lyné trijánda rupuvé lové, timín Jekheskiri, Savéske dyné timín Izrailjoskire čhavé,

¹⁰i dyné dalé lové pal piritkoneskiri félda, syr Devél priphendiá Mánge.”

¹¹Ne Isúso sys terdó angíl Pilatoste, theméskire barydyreste; i phuciá Léstyr: “Tu san Judéngiro Králi?” I phendiá Isúso: “Adiáke, syr tu phendián.”

¹²I kiéli bangiakirenas Les rašángire barydyrá i godephuré, Jov na phendiá nisó.

¹³Tedy phendiá Léske Piláto: “Tu na šunesa, syr but jone pe Túte dophenena?”

¹⁴I Jov na otphendiá Léske ni jekh lav, paldavá themeskiro barydyró drieván zdivindiape.

¹⁵Ne pe svénko themeskiro barydyró prisyklyja te otmekél jekhe manušés štaribnastyr pir manušéngiro vykedyben, kon sys pir iló lénge.

¹⁶Tedy sys lénde slavútno štaribnari pir lav Varava.

¹⁷Paldavá, kiéli skedynépe khetané, Piláto phendiá lénge: “Konés tumé kaména, sob (kaj) me te otmekav tuménge: Varavas ci Isusós, savés kharna Xristóso?”

¹⁸Pal-dová so jov džindiá, so jone zdyne Les zevlynypnastyr.

¹⁹Kiéli Piláto sys beštó pe sendariskiro štéto, léskiri romný bičhadiá léske lav, phení: “Na ker nisó Kadaleske Patiaibnytkone Manušéske; me but piridživdjom dro sunó (suné) pal Léste.”

²⁰Ne rašángire barydyrá i godephuré patiakirde manušén, sob (kaj) te mangén Varavas, ne te muliakirén Isusós.

²¹Tedy barydyró phuciá léndyr, phení: “Konés kaména tumé dujendyr te otmekav me?” Jone phendlé: “Varavas.”

²²Rakiréla lénge Piláto: “So mánge to keráv Isusósa, Saves kharéna Xristóso?” I jone phendlé: “Te primaren Les pe trušúl.”

²³Ne jov phendiá: “Savó ž čoripén Jov kerdiá?” Ne jone dénas gódla butýr: “Te primaren Les pe trušúl!”

²⁴I kiéli Piláto dykhciá, so nisó na pomoginela, ne, xaj, šumo godlenca ke búnto ĥazdélape, jov lyjá paní i vymordia vastá angíl manušénde, rakirí: “Me na som bangó pal adalé Manušéskiro rat, tumé ž dykhén!”

²⁵Ne saré otphendlé: “Mek te javél davá bangipen pal Léskiro rat pe aménde i amaré čhavorende!”

²⁶Tén'ci jov otmekciá lénge Varavas, ne Isusós paló dová, syr Les mardé čupniasa, zdyja pe trušúl te primaren.

²⁷Tén'ci theméskire-barydyreskire xaladé lyné Isusós dre prietorija, khardé khetané pherdó xaladéngiro polko,

²⁸i rosčhude Les i uridé pe Léste tjomnone-loló plaščo,

²⁹i kiéli skhude viánka phusadytkone xrustostyr syr koróna, uridé Léske pe šeró, čhudé Léske triščynytko destó dro čačó (pravo) vast, i terdjonas pe čangá angíl Léste, prosanas Les, phení: “Jav džidó, Králi Judéngiro!”

³⁰I čungardenas pe Léste, i lyné destó i mardé lésa Les pir šeró.

³¹I korigedýr (pozžedýr), syr jone sandlepe xoliames (zdiekindlepe pe Léste), jone zlyne Léstyr loló plaščo, uridé pe Léste Léskiro uribén, i lydžiné pe trušúl te primaren.

³²I syr jone džánas, odothýr strenindle manušés Kirinejatyr, savés khardé Símono; i začhude les te lydžál Xristosóskiro trušúl.

³³I kiéli jone javné pe štéto, savó kharlape ‘Ĥolgofa’, so značynéla: ‘Čeriepnytko štéto,’

³⁴jone dyné Léske te p'jel mol (vino) khetané želučosa i korigedýr, syr Jov koštyndia, Jov na kamdiá te p'jel butýr.

³⁵I kiéli jone primarde Les pe trušúl, jone roskerde uribén Léskiro, čhurdyi žriébijo,

³⁶I bešyndoj, rakhenas Les odój.

³⁷I jone kerdé uprál Léskire šerestyr Léskiro začhinyben, dro so Jov sys bangó: “Davá isyn Isúso, Králi Judéngiro.”

³⁸Tén'ci jone primarde pe trušúl pašýl Léste duje rozmaribnar'jen: jekhés čačé rigátyr, javirés zervone (lievone) rigátyr.

³⁹I kodolé, savé prodžanas pašýl Léste, kaliakirenas Les, kuniny šerenca;

⁴⁰i rakirí: “Tu ž kadavá san, Savó rosphagirelas Khangirí i pir trin dyvesá ĥazdesas la nevéstyr. Zrákh Kokoró Pes. Kóli Tu san Čhavó Devléskiro, džá telé trušulestyr.”

⁴¹Adiáke-pac' rašángire barydyrá, khetané lylvaritkonenca i godephurenca sandlepe xoliames Léstyr, rakirí:

⁴²“Javirén Jov zrakhelas; ne Jov na moginéla te zrakhél Pes, Jov ž králi Judéngiro: mek kakaná te džal trušulestyr, i ame javása te patias dre Léste.

⁴³Jov patiála zoralés dre Devléste, mek Devél zrakhéla Les, kóli kaméla. Pal-dová so Jov ža phendiá: ‘Me som Čhavó Devléskiro.’”

⁴⁴Adiáke-pac' i rozmaribnarja, savé sys primarde khetané Lésa, ladžakirenas Les.

⁴⁵Šovtone (dešudujtone) mardestyr (štundatyr) jaciá kalypén pir sarí phuv i rikirdiape ke/žýko jeniáto (bijekhéskiro déšto) mardó;

⁴⁶pašé ž jeniáto (bijekhéskiro déšto) mardó Isúso dyjá gódla zoralés Judytkes: “Eli, Eli, lama sabakthani?” Davá isyn Romanes: ‘Miro Dévla, Miro Dévla, sóske Tu mekcian Man?’

⁴⁷I vari-savé kodolendyr, savé sys terdé adái, kiéli jone šundlé davá, lyné te rakirén: “Adavá manúš kharéla Ilijas.”

⁴⁸I jekhátyr jekh léndyr podprastandyja, lyjá gubka, kind'kirdia la dro šutly mol, čhudiá la pe destoskiri (kašteskiri) vostrima, i podyja te p'jel Léske.

⁴⁹Ne javír phendlé: “Užakiren! Dykhasa, syr javéla Ilíia te zrakhél Les.”

⁵⁰I Isúso nevéstyr dyjá gódla zoralé zaniása i myjá.

⁵¹I, ake, šýrma dre Khangirí roskusciape pe duj pašá, upralestyr ke phuv; i phuv triinskirdiape, i baruné bérgi pharadyne;

⁵²i koplicy otphandlepe, i but manušýtka trúpy, savén Devél vykedyjá i savé myné, otdžidyne,

⁵³i vyginé koplicendyr korigedýr (pozžedýr), syr Isúso otdžidyjá, giné jone dro svénto fóro i sykadyne butenge.

⁵⁴I šelengire-xaladéngiro barydyró i xaladé, savé khetané rakhenas Isusós, syr dykhné phuvjákiro triinskriben i saró, so kerdiápe, strahádyne zoralés, rakirí: “Čačes, davá sys Čhavó Devléskiro.”

⁵⁵I but džuvliá dykhenas duripnastyr, savé džánas pal Isusóste Galilejatyr, i savé dynarindlé Léske,

⁵⁶maškír savénde sys Maríia Magdalina, i Maríia, daj Jakovoskiri i Jozaskiri, Zaviediejoskiri romný, daj léskire čhavénge.

⁵⁷Kiéli javdiá bel'vél', javdiá barvaló manúš Arimafejatyr pir lav Joza (Iosifo), savó kokoró adiáke-pac' sys Isusóskiro sykliaibnýtko.

⁵⁸Adavá manúš podgíia ke Piláto i mangdiá Isusóskiro trúpo. Tén'ci Piláto priphendiá te otdén Isusóskiro trúpo.

⁵⁹I Joza lyjá trúpo, zakrencyndia Les dro žužó (čysto) pohtan,

⁶⁰i čhudiá Les dre péskiri neví koplíca, saví jov vyčingirdia dre skála; i kiéli priradia baró bar ke zagiibén dre koplíca, gijá krig.

⁶¹I sys odój Maríia Magdalina i javír Maríia, savé sys bešté angíl koplíca.

⁶²Pe javír dyvés, savó sys sávato (subóta), skedynépe rašángire barydyrá i Farisiéi ke Piláto,

⁶³phení: “Rajo, ame ripirasa, so xohaibnari, syr sys iščo (inké) džidó, phendiá: ‘Pir trin dyvesá Me otdžidjovava.’

⁶⁴Paldavá priphen te rakhén magila ke/žýko tríto dyvés, sob (kaj) sykliaibnýtka te na čoren Les, kóli javéna i te na phenén manušénge ‘uštyjá muléndyr,’ i javéla palatunó xohaibén fujedýr Pervonestyr.”

⁶⁵Phendia lénge Piláto: “Tuménde isyn xaladé-rakhibnárja: mek jone te džán, te rakhén, syr tumé džinéna.”

⁶⁶I jone giné, i čhudé xaladén te rakhén koplíca, čhuvi čergenorí (piečat') ke bar.