Read Biblija - Pe Baltitko Romani čib (Romanes) 2019 Baltic Romani Bible Matfiejo 4 Bible Online

Matfiejo 4 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 4

¹Tén'ci lydžijá Dúho (Fáno) Isusós pe čhučí phuv, sob (kaj) te propatiakirel Les nálačho.

²I kiéli Jov postindia štardešá dyvesá i štardešá ratia, Jov zakamdiá te xal.

³I nálačho podgíia ke Jov i phendiá: “Kóli Tu san Devléskiro Čhavó, phen, sob (kaj) dalé bará te jačen marésa.”

⁴Ne Jov otphendiá léske: “Isyn čhindló: ‘Na marésa jekhésa dživéla manúš, a kažnoné lavésa, so džála javrí Devléskire uštendyr’”

⁵Tén'ci léla Les nálačho dro svénto fóro i čhuvéla Les pe Khangirjákiri stréha (čhakín),

⁶i rakírla Léske: “Kóli Tu san Devléskiro Čhavó, uhty Kokoró telé; pal-dová so isyn čhindló: “Jov déla priphenybén Jangolenge Peskirenge pal Túte i pe vastá jone lydžána Tut, sob (kaj) Tu te na obštavespe (te na obstempinespe) pir bar ĥerjasa Peskirjasa.”

⁷Isúso phendiá léske: “Isyn adiáke-pac' čhindló: ‘Na propatiakir Ras-Devlés, Devlés péskires.’”

⁸Nevéstyr léla Les nálačho pe drieván vučy bérga i sykavéla Léske saré svetóskire kralipená i léngire baripena,

⁹i rakírla Léske: “Saró me dáva Túke, kóli peresa i pokloninesape mánge.”

¹⁰Tén'ci rakiréla léske Isúso: “Džá Mándyr, nálačho, isyn čhindló: ‘Devléske tyréske kloninpe i Léske jekhéske dynarin.’”

¹¹Tén'ci mekéla Les nálačho, i ake, Jangóly javné i dynarindlé Léske.

¹²Syr šundiá Isúso, so Ianos lyné, to durija dre Galiliéia;

¹³i gii Nazarietostyr, javdiá i jaciá te dživél ke Kapiernaumo pašýl mórjo (derjáv), pe štéty Zavulonoskire i Niefalimoskire,

¹⁴sob (kaj) te spolninélpe dová, so phendiá proróko Isajo:

¹⁵“Phuv Zavulonoskiri i phuv Nafalimoskiri, so isyn pe drom pašýl mórjo (derjáv), pale Iordáno, Najudengiri Galiliéia,

¹⁶ake, manušá, savé sys bešté dro kalypén, dykhné baró dud (svéto); i pe odolénde, savé isyn sýrby mulé, — pal-dová so jone dživéna bi Devléskiro, zasvencyndia dud.”

¹⁷Dalé časostyr Isúso lyjá te rakirél: “Riskirén péskiro džiibén ke Devél, pal-dová so javdiá pašyledýr Kralipén dro Bolybnáskiro Rajo.”

¹⁸Gii pašýl Galilejakiro mórjo (derjáv), Jov dykhciá duje pšalén, Simonos, savés khardé Pétri, i Jendris (Andriejos), léskire pšalés, savé začhurdenas khudia (sietki) dro mórjo (derjáv), pal-dová so jone sys mačhibnarja.

¹⁹I Jov rakiréla lénge: “Javén Mánca, i Me keráva tuméndyr manušéngire mačhibnar'jen”

²⁰I jone jekhátyr (srázu) mekné péskire khudia i giné pal Léste.

²¹I otgii odothýr duredýr, Jov dykhciá duje pšalén, Jakovós čhavés Zaviediejoskires i Ioanos, pšalés leskires, savé sys dre bárka (lodka) léngire dadésa Zaviediejosa, savé kerénas péskire khudia: i Jov khardiá len Pésa;

²²i jone jekhátyr mekné bárka i péskire dadés i giné Lésa.

²³I Isúso psirelas pir sarí Galiliéia, sykliakiri manušén pal Devléste dre léngire sinagogi i phení bahtalý zan (zvies') pal Kralipén i sastiakiri kažno nasvalypen i dukh dre manušénde.

²⁴I gijá mavlýn (malva) pal Léste pir sarí Sirija: i janénas ke Jov sarén manušén, savé sys nasvale i men'čindlepe nalačhé Duhóstyr i čhonytkone nasvalypnastyr, praličostyr, i Jov sastiakirdia len.

²⁵I giné pal Léste but manušá Galilejatyr, Dešufor'jendyr (Diesiatigradijatyr), Jerusalimóstyr, Judejátyr i pal Iordanostyr.