Read Biblija - Pe Baltitko Romani čib (Romanes) 2019 Baltic Romani Bible Matfiejo 5 Bible Online

Matfiejo 5 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 5

¹Kiéli Isúso dykhciá manušén, Jov gijá pe bérga, i, syr besciá, sykliaibnýtka Léskire podginé ke Jov,

²i Jov otkerdia Péskire uštá i lyjá te sykliakirél len, rakirí:

³“Bahtalé isyn odolé, savé džinéna, so léngire duhoske trej Devél; léngiro sys Kralipén dro Devléskiro Rajo.

⁴Bahtalé isyn odolé, savé rovena, pal-dová so Devél podrikiréla léngiro dúho (fáno).

⁵Bahtalé isyn kovlé-ilýtka, pal-dová so phuv javéla léngiri.

⁶Bahtalé isyn odolé, konéskiro iló isyn bokhalo pal Devléskiro lav i syr paní drieván rodéla čačipén. Devél čaliakirela léngiro iló.

⁷Bahtalé isyn odolé, savé primangena bang manušénge, pal-dová so lénge javéla primanglo.

⁸Bahtalé isyn odolé, savénde isyn žužó iló, pal-dová so jone dykhéna Devlés.

⁹Bahtalé isyn odolé, savé keréna ramánjo (miro), pal-dová so javéna te kharén len ‘Devléskire čhavé.’

¹⁰Bahtalé isyn odolé, konés tradéna pal čačipén; léngiro isyn Kralipén dro Devléskiro Rajo.

¹¹Bahtalé san tumé, kiéli manušá javéna te košen tumen i te tradén, i javéna te rakirén nalačhé lavá pe tuménde pal Mánde.

¹²Javén bahtalé i radynénpe, pal-dová so baró otdyibén Devléstyr užakiréla tumen dro Bolybnáskiro Rajo: adiáke tradenas i prorokén, savé sys angíl tuménde.

¹³Tumé isyn syr lond vaš saré manušénge. Kóli ž lond našavela péskiro londypen, nisyr naštý te kerés, sob (kaj) nevéstyr lond te javél londo; léste butýr ni savó lačhipén nane, jekh so te vyčhurdes les javrí te štaven manušá ĥerénca.

¹⁴Tumé isyn syr jag vaš saré manušénge. Fóro, so isyn pe bérga pe vučipén, na moginéla te ĥaradjol.

¹⁵I kiéli zahačkirena momoly, na čhuvéna la tel pirí, a dro šandalo (podsviečniko) te svencynel jag pir saró kher.

¹⁶Adiáke mek te svencynel tumarí jag angíl manušénde, sob (kaj) jone te dykhén tumaré lačhé réndy i te slavinén Dadés tumares Bolybnaskires.

¹⁷Na duminen, so Me javdjom te otparuvav Zakóno ci prorokén, ne te keráv ke kónco/iagóro (te spolninav).

¹⁸Čačes, Me rakiráva tuménge: paka na javéla kónco (jagóro) bolybnaske i phuvjake, ni jekh tykny bukvica ni čerta bukvakiri na otlelape Zakonóstyr angíl, syr Zakóno te kerélpe.

¹⁹Adiáke, kóli vari-kon otparuvela xoc' jekh lav priphenybnastyr i sykliakiréla adiáke manušén, odová javéla naj tyknedýr dro Kralipén dro Bolybnáskiro Rajo. Ne kon kandéla i keréla pir lav, javéla naj baredýr dro Kralipén dro Bolybnáskiro Rajo.

²⁰Paldová Me rakiráva tuménge: kóli čačipén tumaró nane butedýr syr lylvaritkonengiro i Farisiejengiro čačipén, tumé nikieli na zadžána dro Kralipén dro Bolybnáskiro Rajo.

²¹Tumé šundlé, so rakirdé dro phuranó časo: ‘Na zamar (na umar), kon ža zamarela, tel séndo džála.”

²²Ne Me rakiráva tuménge: ‘Kažno, kon xoliasóla pe péskire pšaléste ni palsó, džála tel séndo. Kon ža phenéla péskire pšaléske ‘dylynó’, javéla dre dar Siniedrionostyr. I kon phenéla ‘bigodiakiro’, javéla dre dar, so džála dro liúno (ado) jagása.

²³Adiáke, kóli tu janesa péskiro dáro ke altárjo, i odój priripiresa, so tyró pšal isyn xoliamó pe Túte,

²⁴mek péskiro svénto dyibén angíl altárjo i džá, angíl ker ramánjo (miro) péskire pšalesa, tén'či džá i jan péskiro svénto dyibén.

²⁵Ker ‘ramánjo’ (miro) péskire manušésa sygedýr, paka tu iščo (inké) san pe drom lésa, sob (kaj) manúš te na otdél tut sendariske, a sendári te na otdél tut dynaríske, i odová te na čhurdel tut dro štaribén.

²⁶Čačes, Me rakiráva túke: tu na vydžasa odothýr, paka otdesa ke naj tyknedýr ĥasprin’

²⁷Tumé šundlé, syr sys phendló dro ĥaratuno časo: ‘Na ker biladžaipén.’

²⁸Ne Me rakiráva tuménge, so kažno, kon dykhéla pe džuvliáte nalačhé kamibnasa, odová uže keréla biladžaipén dro péskiro iló.

²⁹Kóli ž čačí jakh zlydžala tut ke grého, rískir la javrí i vyčhurde; pal-dová so fedýr vaš túke te našaves jekh jakh, syr saró te džal dro liúno (ado).

³⁰Kóli ž čačó vast lydžála tut ke grého, otčingir les i vyčhurde; pal-dová so fedýr vaš túke te našaves jekh vast, syr saré masá te džán dro liúno.

³¹Adiáke-pac' sys phendló: ‘Kóli vari-kon rozdžalape péskire romniása, mek te del láke lyl pal rozgiiben.’

³²Ne, Me rakiráva tuménge: ‘Kon mekéla péskire romniá apríč syr pal napatiaibnytko bang, odová jačélape bangó, kóli joj keréla biladžaipén; a kon léla pal péste džuvliá, saví isyn rozlydžiny romesa, odová sýrby kokoró isyn bangó dro napatiaiben.

³³Iščo šundlé tumé, so sys phendló dro ĥaratuno časo: ‘Na sovlahá, kóli tu na san tvardo; ne ker pir sovlahá péskire angíl Devléste!

³⁴Ne Me rakiráva tuménge: ‘Na sovlahá sarésa; ni bolybnasa, pal-dová so jov isyn Devléskiro priestolo;

³⁵ni phuvjása, pal-dová so joj isyn štéto tel Léskire ĥerá, ni Jerusalimosa, pal-dová so jov isyn fóro baré Kralískiro;

³⁶na sovlahá péskire šerésa, pal-dová so ni jekh bal na moginésa te kerés ni parnesa, ni kalesa.

³⁷Mek te javél tumaró lav ‘ny, ny’, ‘nad, nad’, a so upredyr daléstyr, dová isyn nalačhestyr.’

³⁸Tumé šundlé, so sys phendló: ‘Jakh pal jakh, i dand pal dand.’

³⁹Ne Me rakiráva tuménge: na ker fuipén pale odoléske, kon kerdiá fuipén túke; ne kon pekavela tut dre tyrí čačí (pravo) čam (ščoka), tén'či rískir ke jov javír.

⁴⁰Ne kon zakaméla te sendinelpe túsa i te lel tútyr gad, otdé léske i upratuno uribén.

⁴¹Ne kon začhuvela tut te džal lésa jekh versta, džá lésa duj.

⁴²Kon mangéla tútyr, de, i na otrisjov odoléstyr, kon kaméla te zalel tútyr.

⁴³Tumé šundlé, so sys phendló: ‘Sykáv patýv péskire pašatuné manušéske i na sykáv patýv péskire vergénge.’

⁴⁴Ne Me phenáva tuménge: sykavén patýv péskire vergénge, i mangénpe Devléske pal odolénde, savé košena tumen, kerén lačhipén odolénge, savé drieván na kaména tumen i mangénpe Devléske pal odolénde, savé našukar otlydžanape ke tumé i tradéna tumen;

⁴⁵sob (kaj) tumé moginénas te javén ‘čhavé Bolybnáskire Dadéskire’, i Jov začhuvela Péskiro Kham te svencynel pe lačhé i nalačhé manušénde, i bičhavéla bryšýnd pe odolénde, kon keréla lačhipén i kon keréla fuipén.

⁴⁶Paldová, kóli tumé sykavéna patýv odolénge, savénge tumé san dróga, savó otdyibén Devléstyr javéla tuménge? I mytoskire skedyibnarja keréna adiáke.

⁴⁷Ne kóli tumé déna ‘dobridim’ péskire pšalénge, so dasavo tumé keréna? Až Náiudy keréna adiáke.

⁴⁸Paldová javén bidošakire, syr bidošakiro isyn tumaró Bolybnáskiro Dad.