Read Biblija - Pe Baltitko Romani čib (Romanes) 2019 Baltic Romani Bible Matfiejo 8 Bible Online

Matfiejo 8 - Biblija - Pe Baltitko Romani čib (Romanes) 2019 Baltic Romani Bible bible

Matfiejo 8

¹I kiéli Jov gijá telé bergátyr, but manušá giné pal Léste.

²I ake, prokazytko manúš podgíia i pyjá pe čangá angíl Léste, rakirí: “Rajo Dévla, kóli Túke isyn pir iló, vysastia'kir man”

³Isúso protyrdyjá vast, čiladiá (čypindia) les i phendiá: “Pir iló isyn, tu kakaná san žužó (čysto).” I adáj že jov sys vysastiakirdo prokazatyr.

⁴I rakírla léske Isúso: “Dykh že; ni konéske na rákir, ne džá, sykáv pes rašáske, jan dáro, so priphendiá Mójza, syr dophenybén manušénge.”

⁵Syr Jov gijá dro Kapiernaumo, podgíia ke Jov šelengire-xaladytko barydyró i mangdiá Les te pomoginel,

⁶i phendiá: “Rajo Dévla miro dynári (sluga), isyn paštó rozmardo praličosa kheré i drieván men'čynelape dukhendyr.”

⁷Isúso rakiréla léske: “Me javáva i vysastiakirava les.”

⁸Ne šelengiro otphendiá: “Rajo Dévla, me na som mol, sob (kaj) Tu te zadžas dro miro kher, ne Tu jekh phen lav i javéla miro dynári nevéstyr sastó.

⁹I me adiáke-pac' som manúš, pe konéste isyn barydyrá, mánde isyn xaladé, savé kandéna man, i me phenáva jekhéske: ‘Džá’, i džála; i javireske: ‘Jav’, i javéla, i kadaleske dynaríske miréske: ‘Ker davá’, i keréla.”

¹⁰I syr Isúso šundiá davá, divindiape i phendiá manušénge, savé giné pal Léste: “Čačes, Me phenáva tuménge: Me na lathjom dasavo patiaibén i dro Izrailjo.

¹¹Me phenáva tuménge, so but javír javéna vastokóstyr i zapadostyr (pal-paniendyr) i bešena pal skamínd Avraamosa, Isakosa i Jakovosa dro Kralipén dro Bolybnáskiro Rajo,

¹²ne manušén, savén vykedyné vaš Kralipén, Devél tradéla javrí dre kalypén; odój javéla roibén i dandengiri skriežyma”

¹³I phendiá Isúso šelengireske: “Džá, pal tyró patiaibén javéla túke kerdó” I dynári vysastija dre kodová-pac' mardó (štúnda).

¹⁴I javdiá Isúso dro Petriskiro kher, i dykhciá, so léskiri sasuj sys pašty xačkiribnasa:

¹⁵i Jov čiladiá lákiro vast, i xačkiribén jačkirdiá la, i joj uštyjá i dynarindiá lénge.

¹⁶Kiéli javdiá bel'vél', janénas ke Jov buté manušén, savénde sys nálačho dúho (fáno), i Jov tradyjá javrí dúhi (fany) laveskire zorjása, i Jov vysastiakirdiá sarén, savé sys nasvale;

¹⁷sob (kaj) te kerélpe dová, so phendiá proróko Isajo: “Jov lyjá pe Péste amaró bizorjakiriben i lydžijá saré amaré nasvalypena.”

¹⁸Kiéli Isúso dykhciá but manušén pašýl Péste, Jov priphendiá Péskire sykliaibnytkonénge te džán pe javír brégo.

¹⁹I podgíia ke Jov jekh lylvarítko i phendiá: “Sykliakiribnáskiro (Učytieljo)! Me džáva Túsa, karik i Tu džása.”

²⁰I rakiréla léske Isúso: “Lokhniende (lisende) isyn nory, bolybnáskire čirikliende isyn gniázdy (kúfy), a Manušéskire Čhavéske nane kaj šeró te čhuvél.”

²¹Ne javír phendiá Léske: “Rajo Dévla, mek man angíl te garavav miré dadés.”

²²Ne Isúso rakiréla léske: “Jav Mánca; mek mulé te garaven péskire mulen.”

²³Kiéli gijá Isúso andré bárka, but Léskire sykliaibnýtka giné pal Léste

²⁴i, ake, ĥazdyjápe baró štormo adiáke, so bárka začhuvelaspe valnenca; ne Jov sys sutó.

²⁵Ke Jov podginé sykliaibnýtka, džangade Les, rakirí: “Rajo Dévla, zrákh, ame tasadjovasa.”

²⁶I Jov rakiréla lénge: “Sóske tumé san darandytka, tumé san manušá nabaré patiaibnása!” Tén'ci uštyi, Jov priphendiá balvaliake i morjoske, i kerdiápe baró štylypen.

²⁷I manušá divindlépe i rakirdé: “Kon adavá Manúš isyn, so až balvál i mórjo (derjáv) Les kandéna?”

²⁸I kiéli Jov javdiá pe javír brégo pe Gadarinoskiri phuv, pirilyne Les duj manušá nalačhé duhenca (fanenca), savé džánas javrí maĥilytkone pieščerendyr (ĥiebarendyr) dasavé xoliamé, so nikón na moginelas te džal pir dová drom.

²⁹I, ake, jone dénas gódla, rakirí: “So Túke trej améndyr, Čhavó Devléskiro? Javdian Tu adarík angíl uphendló mardó (štúnda) te men'čynes amen?”

³⁰Sys ĥurto balyčen, savé xanas čar nádur léndyr.

³¹I nalačhé dúhi (fany) mangenas Les: “Kóli Tu tradesas javrí amen, bičháv amen dro ĥurto balyčengiro”

³²I Jov phendiá lénge: “Džán.” I jone mekné manušén i zaginé dre balyčende, i, ake, saró ĥurto balyčengiro čhurdyjape bregoskire krutymatyr dro mórjo (derjáv) i jone tasadyne dro paní.

³³Čhupnárja (pastúhi) balyčengire našné, i javné dro fóro, i rosphendlé saró, i pal manušénde nalačhé duhenca.

³⁴I, ake, saró fóro vygijá te pirilel Isusós, i, syr dykhné Les, mangné Les te durjol léngire phuvjátyr.