Read Biblija - Pe Baltitko Romani čib (Romanes) 2019 Baltic Romani Bible Marko 1 Bible Online

Marko 1 - Biblija - Pe Baltitko Romani čib (Romanes) 2019 Baltic Romani Bible bible

Marko 1

¹Davá isyn Jevangielijakiro anglypén (načalo) Isusóskiro Xristosóskiro, Devléskire Čhavéskiro.

²Syr isyn čhindló dre Isajoskire-prorokoskiri lylvarí: “Ake, Me bičhaváva Miré vykedyné manušés angíl Túte, savó keréla drom Túke:

³Ake, isyn zan, saví déla gódla pe čhučí (pusto) phuv: ‘Kerén drom Ráske-Devléske, čhuvén Léske mamúj (roŭno) drom.’”

⁴Iáno Boldeipnari javdiá pe čhučí phuv, sykliakiri len te riskirén péskiro džiibén ke Devél vaš dová, sob (kaj) Jov te otmekél gréhi angíl boldeipen.

⁵I džánas ke jov but manušá Judejákire phuvjátyr i Jerusalimóstyr, jone priĥaljonas péskire gréhi, i jov boldia len dre reka (len') Iordáno.

⁶Iáno sys uridó dro uribén vierbliudytkone balendyr, pe léste sys trusciál (vokrug) trušúl cypitko kustýk, jov xaja saranča i avgín (meda) vešytkone berliniendyr (pčolendyr).

⁷Dre léskire-phenybnaskiro lav jov rakirdiá: “Pal mánde džála Odová, Kon isyn zoraledýr mándyr, me na som mol až te rosphandav simirja Léskire ĥeritkonendyr.

⁸Me bolava tumen paniésa, a Jov javéla te bolel tumen Sventoné Duhósa.”

⁹I sys adiáke dre dolé dyvesá: javdiá Isúso Galilejakire Nazarietostyr, i boldia Les Iáno dre reka (len') Iordáno.

¹⁰I jekhátyr (srázu), syr Isúso vydžálas paniéstyr, Iáno dykhciá, syr otčhakirdiape bolybén, i Dúho (Fáno), savó džálas telé pe Léste syr golumbo;

¹¹i zan rozdyjape bolybnástyr: “Tu san Miro drógo Čhavó! Dre Túte isyn Mirí bari rádyma!”

¹²I jekhátyr Dúho (Fáno) lydžijá Les pe čhučí phuv.

¹³I sys Jov štardešá dyvesá pe čhučí phuv, Les propatiakirelas nálačho; Jov sys riskiribnáskire murdalénca (zvierienca) i Jangóly dynarinénas (služynénas) Léske.

¹⁴Paló dová, syr Iáno sys zakedyno, javdiá Isúso dre Galiliéia, rospheni lav pal Jevangielijakiro bahtalypén pal Devléste,

¹⁵i rakirdiá: “Podgíia časo (cýro) i Devléskiro Kralipén javdiá pašyledýr; riskirén péskiro džiibén ke Devél i patián dre Jevángielija.”

¹⁶I syr Jov gijá pašýl Galilejakiro mórjo (derjáv), dykhciá Simonos i léskire pšalés Jendris; jone sys mačharja (mačhibnarja) i dro davá časo jone čhurdenas khudia (sieti) dro mórjo (derjáv).

¹⁷I phendiá lénge Isúso: “Džán pal Mánde, Me keráva tuméndyr manušéngire staribnar'jen.”

¹⁸I jone jekhátyr (srázu) jačkirdé khudia i giné pal Léste.

¹⁹Progii nábut duredýr, Jov dykhciá Jakovós i Ianos, čhavén Zieviediejoskiren, jone sys bešté dre bárka (lodka) i kerénas khudia;

²⁰Jov jekhátyr khardiá len; i jone giné Lésa, jačkiri dre bárka péskire Dadés Zaviediejos i butiarnen.

²¹I kiéli jone javné dro Kapiernaumo, Isúso jekhátyr (srázu), dro pérvo sávato (subóta), gijá dre sinagoga te sykliakirél.

²²Léskiro rakiribén divindia manušén, Jov sykliakirdiá len adiáke, syr Léste sys baró pravo, ne na adiáke, syr lylvarítka (knížniki).

²³Dre sinagoga sys manúš, dre savéste sys nálačho dúho (fáno), i jekhátyr (srázu) jov dyjá gódla:

²⁴“So Túke trej améndyr, Isúsie Nazarietostyr? Tu javdián te xasiakires amen? Me džinóm (džináv), kon Tu adasavó san, Tu san Svénto Devléskiro!”

²⁵“Štyljov, — zorjása priphendiá Isúso, — “vydža léstyr!”

²⁶Nálačho dúho (fáno) trinskirdia zoralés manušés i godlása vygijá léstyr.

²⁷I saré strahádyne i phučenas jekh jekhestyr: “So da dasavo isyn? Nevó sykliakiribén i dasavé zorjása! Jov až priphenela nalačhé duhenge (fanenge) i dolé kandéna Les!”

²⁸Sýges pal Léste rozgijápe zan (zvies') pir sarí Galiliéia.

²⁹I jekhátyr (srázu), vygii sinagogatyr, jone javné dro kher Simonoskiro i Jendriskiro, Jakovosa i Ianosa.

³⁰Simonoskiri sasuj sys nasvaly i pašty, láte sys baró xačkiribén, i jekhátyr Isusóske phendlé pal láte.

³¹Jov podgíia ke joi, lyjá la pal vast, pomogindia te ĥazdelpe; xačkiribén lákiro progijá, i joj lyjá te dynarinél lénge.

³²Bel'velié, syr zagijá kham, ke Isúso lyné te janén nasvalen i odolén, konéste sys nálačho dúho (fáno);

³³i saró fóro skedyjape pašýl vudár.

³⁴Dro dová dyvés Isúso sastiakirdia drieván but samone pharé nasvalypnendyr i Jov tradelas javri nalačhé dúhi, i priphenelas Jov lénge te na rakirén, pal-dová so jone džindlé, so Jov sys Xristóso.

³⁵Pe javír zlóko (ránko), uštyi angíl dyvés, Isúso gijá odorík, kaj nikonés nane, i mangdiápe Devléske odój.

³⁶Símono že i javír, kon sys Lésa, lyné Les te rodén,

³⁷I lathné Les i lyné te rakirén Léske: “Saré Tut rodéna!”

³⁸Jov lénge rakiréla: “Javén, džása dre pašatuné gavá, sob (kaj) Mánge i odój te phenáv lav. Me ž i javdjom vaš dová.”

³⁹I Jov phenelas lav pal Devléste dre sinagogi pir sarí Galiliéia, i tradelas javrí nalačhé dúhi (fany).

⁴⁰Ke Isúso javéla manúš, savó sys nasvaló prokazasa: jov pyjá pe čangá angíl Léste, i mangdiá: “Vysastiakir Man, kóli Túke isyn pir iló.”

⁴¹Isusóske jaciá tango (žalko) les: “Mánge isyn pir iló, jav sastó”, — phendiá Jov, protyrdyi vast, i čiladiá les.

⁴²I jekhátyr, sarí dukh gijá krig léstyr i jov jaciá sastó.

⁴³Isúso adáj že jekhátyr (srázu) otbičhadia les, paló dová, syr priphendiá šylales Léske,

⁴⁴i rakiréla Léske: “Nikonéske pal davá na rosphen; ne džá; sykáv pes rašáske, i jan svénto dyibén pal sastiakiriben, syr davá trej pir Mojzáskiro Zakóno, davá javéla tyró dophenybén manušénge.”

⁴⁵Ne jov, vygii, jekhátyr lyjá te rosphenel sarénge pal péskiro sastiakiriben, pal-dová uže Isusóske sys naštý te sykadjol dro fóro, i Jov jačelaspe pe dová štéto, kaj nikonés na sys pal foritko kustýk (granica), i manušá skedenaspe ke Jov saré šteténdyr.