Read Biblija - Pe Baltitko Romani čib (Romanes) 2019 Baltic Romani Bible Marko 10 Bible Online

Marko 10 - Biblija - Pe Baltitko Romani čib (Romanes) 2019 Baltic Romani Bible bible

Marko 10

¹I uštyi, Isúso gijá krig dolé šteténdyr, i javdiá pal Iordáno dre Judéia; i nevéstyr ke Isúso skedynépe manušá, i Jov sykliakirdiá len pir Péskiro sykliaiben.

²I javné ke Jov Farisiéi te propatiakiren Les, i phučné Léstyr: “Phen aménge, ci saštý (možna) muršeske te mekel péskire romniá?”

³I Jov otphendiá lénge i phendiá: “So Mójza (Moisiejo) priphendiá tuménge?”

⁴I jone phendlé: “Mójza délas vólia muršeske te čhinel lyl pal rozgiiben i te mekel la.”

⁵Ne Isúso phendiá lénge: “Jov čhindiá davá priphenybén pal tumaré xoliamé ile.

⁶A dro anglypén (načalo), syr Devél sozdelas svéto, Jov sozdyjá muršés i džuvliá.

⁷Paldavá mekéla manúš péskire dadés i da, i jov javéla te dživél péskire romniása;

⁸i javéna jone syr jekh loč (plot'); pal-dová so jone isyn kakaná na duj, a jekh loč.

⁹Pal-dová so Devél čhudiá khetané, mek adavá manúš te na rozmarel.”

¹⁰I dro kher sykliaibnýtka nevéstyr phučné Léstyr pal davá.

¹¹I phendiá Jov lénge: “Kóli kon mekéla péskire romniá i léla javirja, odová keréla biladžaipén pervoné romniake;

¹²i kóli joj kokori rozdžalape péskire romesa i vydžála paloróm pal javiréste, tedy joj keréla biladžaipén.”

¹³I jone janénas ke Isúso tykné bijatén, sob (kaj) Jov te čilavel len; a sykliaibnýtka košle len [na domekenas-r.s.]

¹⁴Ne kiéli Isúso dykhciá davá, Jov xoliásyja i phendiá: “Mekén čhavorén ke Me; i na terdjon pe drom lénde, pal-dová so Kralipén dro Bolybnáskiro Rajo javéla léngiro.

¹⁵Čačes, rakiráva tuménge: kon na priléla Kralipén dro Devléskiro Rajo, adiáke syr davá bijáto, odová na zadžála dro Kralipén.’”

¹⁶I Jov oblyja bijatén, čhudiá upré vastá pe lénde, i bahtiakirdiá len.

¹⁷Ne kiéli Isúso vydžálas dro drom, ke Jov podprastandyja manúš, pyjá pe čangá angíl Léste i phuciá: “Drógo Sykliakiribnáskiro! So mánge te keráv, sob (kaj) te doresav paš dro viéčno džiibén?”

¹⁸“Palsó tu kharesa man ‘Drógo?’” — phendiá Isúso. ‘Drógo isyn jekh Devél.

¹⁹Tu džinésa priphenybená: ‘Na zamar, na ker biladžaipén, na čor, na sovlahá xohanés (pefromi), na xohav, kutiakir dadés i da.’”

²⁰“Sykliakiribnáskiro, — otphendiá i phendiá pe davá manúš, — saró davá me zrakhcjom čhavoripnastyr.”

²¹Isúso laskasa podykhciá pe léste i rakiréla: “Túke jekh na uhtýlla (nádosi): džá, rozbikin saró péskiro barvalypén, i rozde lové čororenge, tedy túte javéla kučipén pe bolybén; tén'či jav, džá pal Mánde.”

²²Manúš jaciá smentno (skučno) dalé lavéndyr, i gijá dre rig pharé minasa: pal-dová, so Jov sys drieván barvaló.

²³Isúso lydžijá trusciál i phendiá Péskire sykliaibnytkonénge: “Syr pharó javéla barvaleske te zadžál dro Kralipén dro Devléskiro Rajo.”

²⁴Sykliaibnýtka strahádyne Léskire lavéndyr, a Isúso nevéstyr otphendiá lénge, rakirí: “Čhavorale! Syr isyn pharó te zadžán dro Kralipén dro Devléskiro Rajo odolénge, kon patiála zoralés dro barvalypén.

²⁵Davá lokhedýr vierbliudoske te prodžal pir suvjakiro kan, syr barvaleske te zadžál dro Kralipén dro Devléskiro Kralipén.”

²⁶Sykliaibnýtka iščo (inké) butýr divindlépe i lyné te phučén jekh jekhestyr: “Kon da moginéla tedy te zrakhelpe?”

²⁷Isúso podykhciá pe lénde i phendiá: “Manušénge davá naštý apríč Devléste. Devléske saró saštý.”

²⁸Pétri tedy lyjá te rakirél Léske: “Ame saró jačkirdiam i gijam pal Túte.”

²⁹Isúso phendiá: “Čačes, Me rakiráva tuménge: Nane nikonés, kon jačkirdiá kher, ci pšalén, ci phenien, ci dadés, ci da, ci čhavorén, ci féldy vaš Mánge i vaš Jevángielija,

³⁰konéste na javélas dre šel móly butýr doléstyr, so lénde isyn dro davá džiibén: kherá, pšalén, phenien, dajen, čhavorén, féldy, ne khetané sarésa i tradypena, a dro anglatunó džiibén jone doreséna (dolena) viéčno džiibén.

³¹A but anglatuné, javéna palatuné, a palatuné — anglatuné.’”

³²Jone sys dro drom ke Jerusalimo; Isúso gijá angíl sykliaibnytkonende, savé džánas dre dar, adiáke-pac' syr i manušá, savé džánas pal Léste. Jov khardiá dre rig Peskiren dešudujen sykliaibnytkonén i lyjá te rakirél lénge pal dová, so treindiá Lésa te javél:

³³“Ame džása pašyledýr ke Jerusalimo, i Čhavó Manušéskiro javéla zdyno rašángire barydyrénge i lylvaritkonenge: jone zasendinena Les pe maribén i zdena Les Najudénge;

³⁴jone javéna te sanpe xoliames, i te čungarden pe Léste, te marén Les čupniasa i muliakirena Les, ne pir trin dyvesá Jov otdžidjola.”

³⁵I džána pašyledýr ke Isúso Jakovo i Iáno, duj Zaviediejoskire čhavé, i rakiréna Léske: “Sykliakiribnáskiro, ame myslinasa dro iló, sob (kaj) Tu te kerés vaš aménge dová, pal so ame mangasa Tut.”

³⁶Jov phendiá lénge: “So isyn tuménge pir iló, sob (kaj) Me te keráv vaš tuménge?”

³⁷“De vólia aménge dro Tyró Kralipén te bešas jekhéske pir čačó i javireske pir zérvo (liévo) vast Tútyr”, — phendlé jone Léske.

³⁸“Tumé kokoré na džinéna, so tumé mangena”, — phendiá lénge Isúso. “Naúšto tumé moginéna te p'jen davá tahtái, savó Me pjava, i te bolenpe boldeipnasa, savésa Me bolavape?”

³⁹“Moginasa”, — otphendlé jone Léske. Tedy Isúso phendiá lénge: “Te p'jen tahtáj (čaša), savó Me pjava, i te bolenpe boldeipnasa, savésa Me som boldo, tumé javéna;

⁴⁰ne te dav vólia tuménge te bešén pir čačó i pir zérvo vast Mándyr, — davá isyn na dre Mirí zor; dalé štéty isyn kodolénge, konéske jone isyn prigotovindle.”

⁴¹Kiéli javír deš sykliaibnýtka šundlé pal davá, jone xoliasyne pe Jakovoste i Ianoste.

⁴²Isúso khardiá len i rakiréla: “Tumé džinéna, so kodolé, savén ginéna pal baré rande pe Najudénde, rikirna zor te xulainen pe lénde, i léngire baré raja xulainena pe lénde:

⁴³ne mek davá te na javél maškír tuménde. Odová, kon kaméla te javél naj baredýr maškír tuménde, mek te javél dynári tuménge,

⁴⁴i kon kaméla te javél pérvo maškír tuménde, mek te javél pishári sarénge.

⁴⁵Adiáke i Čhavó Manušéskiro javdiá na vaš dová, sob (kaj) Léske te dynarinén (te služynen), ne sob (kaj) Jov kokoró te dynarinél i te otdél Péskiro džiibén, syr vykinybén pal butende.”

⁴⁶I jone javné dro Jerihóno. Kiéli Isúso vydžálas Jerihonostyr Péskire sykliaibnytkonénca i buté manušénca, kororó bógo Vartimiejo, Timiejoskiro čhavó, sys beštó pašýl drom.

⁴⁷I, syr Jov šundiá, so davá sys Isúso Nazarianino, jov lyjá te del gódla: “Isúsie, Čhavó Davidóskiro! Potangine (požalin) man!”

⁴⁸I but manušá lyné te rakirén xoliása Léske, sob (kaj) jov te javél štyl, ne jov délas gódla iščo (inké) zoraledýr: “Čhavó Davidóskiro! Potangine man!”

⁴⁹Isúso terdijá i phendiá: “Kharén les.” I jone khardé korores, rakirí Léske: “Jav muršesa, uštý, Jov kharéla tut.”

⁵⁰Vartimiejo čhurdyjá krig péstyr upratuno uribén, uhtia i podgíia ke Isúso.

⁵¹“So tŭke trej, sob (kaj) Me te keráv túke?” — phuciá Isúso. Kororó phendiá Léske: “Ravvuni, sob (kaj) te otkerenpe Miré jakhá.”

⁵²“Džá, — phendiá Léske Isúso, — tyró patiaibén vysastiakirdiá tut.” Kororó adáj ža lyjá te dykhél i gijá pir drom pal Isusóste.