Read Biblija - Pe Baltitko Romani čib (Romanes) 2019 Baltic Romani Bible Marko 11 Bible Online

Marko 11 - Biblija - Pe Baltitko Romani čib (Romanes) 2019 Baltic Romani Bible bible

Marko 11

¹Kiéli Isúso sykliaibnytkonénca podginé pašyledýr ke Jerusalimo ke gavá Vifagija i Vifanija, savé sys pe Olivitkone — bergákiro sklono, Isúso bičhadiá dujén Péskire sykliaibnytkonendyr,

²i phendiá lénge: “Džán dro gav, savó isyn angíl tuménde, i kiéli tumé odorík zadžána, tumé dykhéna priphandle ternin'kone osljonkos (miegarorís), pe savéste nikón na sys beštó. Otphanden les i janén adarík.

³Kóli kon phučela tuméndyr, so tumé keréna, phenén léske: ‘Osljonko trej Ráske-Devléske’, i ‘So Jov syg riskiréla les pale.’”

⁴Sykliaibnýtka giné, i lathné osljonkos, savó sys priphandlo javrí pašýl kherítko pórta i otphandle les.

⁵Vari-savé manušá, savé sys terdé odój, rakirdé lénge: “So tumé keréna? Palsó tumé otphandena osljonkos?”

⁶Sykliaibnýtka otphendlé lénge adiáke, syr phendiá Isúso, i manušá mekné len te džán.

⁷I jone jandlé osljonkos ke Isúso i čhudé upré pe léste péskire uribená, i Jov besciá pe léste.

⁸I but manušá čhuvénas péskiro uribén pir drom, javír čhurdenas pe drom zelena randiá, savé jone sčhindle feldendyr.

⁹I manušá, savé giné angíl i palál Isusóste, dénas gódla radymása: — “Asanna! Bahtiakirdó, Savó džála vaš lav Devléskiro!

¹⁰Bahtiakirdó, Savó džála dro Kralipén Dadéskire amareskiro Davidóskiro! — “Asanna dre upratunende!”

¹¹I kiéli Jov javdiá dro Jerusalimo, zagijá dre Khangirí; obdykhcia pašýl Péste saró i vygijá. Syr sys uže koríg (poznes), to Jov gijá dešudujé sykliaibnytkonénca dre Vifanija.

¹²I pe javír dyvés, kiéli jone vyginé Vifanijatyr, Isúso bokhalyja;

¹³i Jov dykhciá durál inžyritko kašt (drévo), savó sys čhakirdo patrienca (listenca) i podgíia pašyledýr te dykhél, ci isyn pe léste barjakirdé (plódy). Ne barjakirdé pe kašt na sys, jekh patria, pal-dová, so časo vaš múri na javdiá.

¹⁴I phendiá Jov pe davá kašt: “Mek nikón te na xal barjakirdó tútyr nijékhvar.” I sykliaibnýtka Léskire šundlé davá.

¹⁵I javné jone dro Jerusalimo. I Jov zagijá dre Khangirí i lyjá te tradel javrí odolén, savé biknenas i kinenas dre Khangirí; i Jov obriskirdia odolengire skaminda, savé paruvenas lové i prilavki odolengire, savé biknenas golumben:

¹⁶i Jov na délas vólia te lydžán nisó tovarostyr (arcikulendyr) pirdál Khangirí;

¹⁷i Jov sykliakirdiá i phendiá lénge: “Saré manuše javéna te kharén Miro kher ‘Mangipnytko kher’ vaš saré nácyi, syr isyn čhindló?’ A tumé kerdé léstyr rozmaribnar'jengiri kirčyma.”

¹⁸I rašángire barydyrá i lylvarítka šundlé davá i rodenas, syr te muliakirén Les; pal-dová so jone darándyne Léstyr, pal-dová so saré manušá divindlépe pe Léskiro sykliakiribén.

¹⁹I kiéli javdiá bel'vél', Isúso sykliaibnytkonénca giné foróstyr.

²⁰Tasiárles (ránes) pe javír dyvés, syr jone džánas pašýl, jone dykhné, so inžyro zašutija ke phuv.

²¹Pétri priripirdia i phendiá Léske: “Ravvi! Dykh, inžyro zašutija, savó Tu prokostian!”

²²I Isúso phendiá lénge: “Patián dre Devléste!”

²³Čačes rakiráva tuménge: “Kóli kon priphenela daliake bergake: ‘Ĥazdepe i čhurdepe dro paní’ i, kóli tumé na javéna te kuninenpe dro tumaró iló, i javéna te patián, so javéla dová, so jov rakiréla, tedy Devél spolninela vaš adalé manušéske.

²⁴Paldavá Me rakiráva tuménge: saró, pal so tumé mangénape i mangena, patián, so tumé doresné (dolyne), i javéla dynó tuménge.

²⁵I kóli tumé mangénape, tedy primangen sarénge, pe konéste rikiréna xolý, sob (kaj) i tuménge tumaró Dad, Savó isyn dro Bolybnáskiro Rajo, te otmekél tumaré gréhi.”[3]

²⁷Isúso sykliaibnytkonénca javné nevéstyr dro Jerusalimo. I kiéli Isúso sys dre Khangirí, ke Jov podginé rašángire barydyrá, lylvarítka i godephuré.

²⁸I jačné te rakirén Léske: “Save zorjása Tu kerésa saró davá? I kon dyjá Túke dasaví zor te kerés davá?”

²⁹Isúso ž phendiá Lénge: “Me phučava tuméndyr jekh lav i otphenen Mánge, i tedy Me phenáva tuménge, savé zorjása Me keráva saró davá.

³⁰Ianoskiro boldeipen isyn bolybnástyr ci manušéndyr? Otphenen Mánge.”

³¹Jone rakirdé maškír péste: ‘Kóli phenása, so bolybnástyr’, Jov tedy phučela: ‘Sóske tumé na patiandyné Léske?’

³²Ne kóli ame phenása: ‘Manušéndyr’ — jone darándyne manušéndyr, savé sys odój, pal-dová so saré gindlé Ianos pal Devléskire prorokoste.

³³I jone phendlé Isusóske dro otphenybén: “Na džinása.” I Isúso phendiá lénge: “I Me na phenáva tuménge, savé zorjása Me keráva davá.”