Read Biblija - Pe Baltitko Romani čib (Romanes) 2019 Baltic Romani Bible Marko 14 Bible Online

Marko 14 - Biblija - Pe Baltitko Romani čib (Romanes) 2019 Baltic Romani Bible bible

Marko 14

¹Pir duj dyvesá javélas svénko Patradí i Apriesnokengiro; rašángire barydyrá i lylvarítka dykhné rakhibnýtkes, syr te uhtylén Isusós frentymasa i te muliakirén Les.

²“Ne pe svénko Patradí davá naštý te kerás nisyr, — rakirdé jone maškír péste, — manušá moginéna te ĥazdén búnto.”

³Kiéli Isúso sys dre Vifanija, Jov sys beštó pal skamínd dro kher ke Símono Prokazytkoneskiro, i dro kher zagijá džuvlý alibastrytkone khoresa (žbanosa) kučoné makhibnasa, savó sys kerdó čačuné nardanostyr. Joj rozmardiá khoró i lyjá te čhuvél pe šeró Isusóske.

⁴Vari-savé sykliaibnýtka xoliasyne, rakirí: “Palsó dasavo makhibnaskiro xasiakiriben!

⁵Naúšto (uželi) sys naštý te biknel davá makhiben butýr syr pal trinšelá dinarii i te rozden lové bogenge.” I jone rakirdé xoliása láke.

⁶Ne Isúso phendiá: “Mekén la, so tumé keréna pharó láke. Joj kerdiá lačhó réndo vaš Mánge.

⁷Bogi isyn ŭsády (sak) pašýl tuménde i tumé moginéna te dzn vast lénge, kóli tuménge isyn pir iló, a Me na javáva ŭsády (sak) tuménca.

⁸Joj kerdiá, so sys saštý dre lákiri zor, joj angledýr pomakhcia Miré masá ke garaiben.

⁹Čačes, Me rakiráva tuménge: kaj by te na javél te phenelpe lav dalé Jevangielijatyr pir saró svéto, dro ripiribén pal adaliate džuvliáte javéna te rakirén pal dová, so joj kerdiá.”

¹⁰I Juda Iskarioto, jekh dešudujendyr sykliaibnytkonendyr, gijá tedy ke rašángire barydyrá te zdel Isusós.

¹¹I kiéli jone šundlé davá, jone adiáke obradyndlepe i dyné lav te den lové léske. I jov lyjá te rodél vakancyja (slučajo), sob (kaj) te zdel Isusós.

¹²Dro pérvo ž dyvés Apriesnokengiro Svénko, kiéli čhinenas Patraditkone bakrores, sykliaibnýtka rakiréna Léske: “Kaj Túke isyn pir iló, sob (kaj) ame te džas i te kerás Túke patraditko skamínd?”

¹³Isúso bičhavéla dujén léndyr i rakiréla: “Džán dro fóro; i tumé dykhéna manušés pirjasa paniésa, džán pal léste,

¹⁴i zadžán dro kher, dro savó jov zadžála, i phenén kheritkoné xuláske: “Sykliakiribnáskiro phučela: kaj javéla štúba, sob (kaj) Me Péskire sykliaibnytkonénca te xav Patradí?”

¹⁵Jov tuménge sykavéla upratuny bari šukár štúba; odój kerén skamínd vaš aménge”.”

¹⁶Sykliaibnýtka Léskire giné, javné dro fóro; saró sys adiáke, syr phendiá lénge Isúso, i jone kerdé patraditko skamínd.

¹⁷I kiéli jaciá bel'vél', Jov javdiá dešudujé sykliaibnytkonénca.

¹⁸I kiéli jone sys bešté pal skamínd i xanas, Isúso phendiá: “Čačes, Me rakiráva tuménge: jekh tuméndyr zdela Man, savó xála Mánca.”

¹⁹Sykliaibnýtka pyné dro dúho (fáno), i lyné te phučén jekh pale jekhéste: “Čačes, davá na me, Rajo Dévla?”

²⁰“Jekh dešudujendyr”, — phendiá Isúso, — “odová, kon khetané Mánca makinela dro čaró.

²¹Čhavéske Manušeskireske prodžalape te menčynelepe, syr davá sys angíl phendló, a bída kodolé manušéske, savó zdela Čhavés Manušeskires! Fedýr javélas vaš léske te na bijandjol.”

²²Kiéli jone xanas, Isúso lyjá maró, parikirdia Devléske pal léste, phagirdiá les, dyjá lénge, rakirí: “Len, xan; ake, isyn Miré masá.”

²³I kiéli Jov lyjá tahtáj (čaša), phendiá parikiriben Devléske, dyjá lénge i jone saré piné léstyr.

²⁴“Ake, isyn Miro rat zavietóskiro, savó pročhudo pal butende”, — phendiá Jov lénge.

²⁵“Čačes, Me rakiráva tuménge: Me na javáva te pjáv butýr aplodo vinagradoskire xrustostyr angíl dová dyvés, kiéli Me javáva te pjáv neví mol (vino) dro Devléskiro Kralipén.”

²⁶I kiéli jone zbagandle šardytko gilý Devléske, tedy giné pe Olivítko Bérga.

²⁷“Saré tumé Mándyr otperena”, — rakiréla lénge Isúso, — paldavá isyn čhindló: ‘Me xasiakiráva Čhupnaris i rosprastanape bakriá;’

²⁸ne paló davá, kiéli Me otdžidjovava, Me sygedýr tuméndyr javáva dre Galiliéia.’”

²⁹Ne Pétri ža phendiá Léske: “I kóli saré Tútyr otperena-me nikieli davá na keráva.”

³⁰Tedy rakiréla Léske Isúso: “Čačes, Me rakiráva Túke, so adadyvés bel'veliakiro, angíl dová, syr bašno probagala duj móly, tu trin móly otphenesape Mándyr.”

³¹A Pétri iščo (inké) butýr patiakirelas: “I kóli mánge javéla trej te merav Túsa, me na otphenavape Tútyr.” I saré sykliaibnýtka rakirdé dová-pac'.

³²I jone javné pe štéto, savó kharélape Giefsimanija i Isúso phendiá sykliaibnytkonénge: “Bešén kadaj, paka Me džáva te mangavpe Devléske.”

³³I lyjá Jov pésa Petris, Jakovós i Ianos, i obuhtyldia Les bari dar i smentnyma.

³⁴“Miro iló isyn pherdó meribnytkone darása”, — rakiréla Jov lénge, — “iavén adái, i rakhénpe [na soven-r.s.].”

³⁵I Jov otgijá nábut angíl, i pyjá mósa pe phuv, mangdiápe Devléske, sob (kaj), kóli saštý (možna), te prodžal (nakhel) dre rig Léstyr davá mardó (štúnda);

³⁶i Jov rakirdiá: “Avva, Dádo! Tu saró moginésa. Lýdža davá tahtáj (čaša) dre rig Mándyr; a mek te na javél adiáke, syr Mánge isyn pir iló, a syr isyn Túke pir iló.”

³⁷I Isúso javéla pale i lathéla, so jone isyn suté, i rakiréla Petriske: “Simonie, tu san sutó? Naúšto tu na mogindian jekh mardó te rakhespe [te na soves-r.s.]?

³⁸Rakhénpe (na soven) i mangénpe Devléske, sob (kaj) te na poddenpe dro propatakiriben; dúho (fáno) isyn sastó, a masá isyn bizorjákire.”

³⁹Isúso gijá i iščo (inké) mólo mangdiápe Devléske dolé-pac' mangipnasa (patierjasa).

⁴⁰I nevéstyr Jov risijá i lathiá, so jone sys suté, pal-dová so léngire jakhá sys začhakirde i jone na džindlé, so Léske te otphenen.

⁴¹Risii ke jone dro tríto mólo, Jov phendiá lénge: “Tumé usá san suté i otkhinjona. Uhtýlla (dósi)! Mardó javdiá: dykhén, Čhavés Manušeskires zdena dre grehitkoné-manušéngire vastá.

⁴²Uštén, džása! Ake, uže sarésa pašýl isyn kodová, kon zdela Man!”

⁴³I paka Jov iščo (inké) rakirdiá, javélas Juda, jekh dešudujendyr, i sys lésa but manušá kurtalenca i kilenca, savén bičhadé rašángire barydyrá, lylvarítka i godephuré.

⁴⁴Zdyibnari dorakirdiape lénca pal špéra (znako): “Kadavá, Konés me čamudava, isyn Jov; zakeden Les i lydžán tel rakhiben.”

⁴⁵I jekhátyr podgíia jov ke Isúso, rakirí: “Dobridim, Ravvi!” I čamudia Les.

⁴⁶I jone čhudé vastá pe Léste i uhtyldé Les.

⁴⁷Jekh manušéndyr, savó sys terdó adái, vyuhtyldia kurtála péskiri i čingirdia lása rašángire barydyreskire pisharís i otčingirdia léske kan.

⁴⁸Isúso otphendiá lénge: “Syr pe rozmaribnariste tumé vyginé kurtalenca i kilenca te len Man?

⁴⁹Me kažno dyvés sómas beštó tuménca i sykliakirdjom dre Khangirí i tumé na lyné Man; ne mek te spolninélpe Čhinybén.”

⁵⁰I saré sykliaibnýtka mekné Les i našné krig.

⁵¹A jekh ternó manúš sataki džálas pal Léste: pe léste sys jekh cérga pe psiké i jone uhtyldé les.

⁵²Ne jov vyriskirdiape léndyr krig i nascia odothýr nango (dre jekh cérga).

⁵³I jandlé Isusós ke pérvo rašángiro barydyró: i skedynépe saré rašángire barydyrá, godephuré i lylvarítka.

⁵⁴I Pétri džálas durál pal Léste duripnastyr ke pervoné-rašángire barydyreskiri gréda (dvóro); i jov besciá slugénca (dynar'jénca) i tatjolas pašýl jag.

⁵⁵Rašaja i saró Siniedriono rodyne dophenybén pe Isusóste, sob (kaj) te muliakirén Les, ne jone na mogindlé nisó te lathén.

⁵⁶But jakhítka (svidietieli) rakirdé xohanés pe Léste, ne léngiro dophenybén na zdžalaspe dro čačipén.

⁵⁷I vari-savé uštenas i dophenenas xohanés pe Léste, rakirí:

⁵⁸“Ame šundiám, syr Jov rakirdiá: ‘Me rosphagirava daja Khangirí, saví kerdé manušá, i pale trin dyvesá ĥazdáva javír khangirí bi manušéngire vastengiro?’”

⁵⁹Ne i dasavo léngiro dophenybén na zdžalaspe dro čačipén.

⁶⁰Tén'ci pérvo rašángiro barydyró uštyjá i phuciá Isusóstyr: “Tu so na otphenesa nisó? So adalé manušá dophenena pe Túte!”

⁶¹Ne Isúso sys štyl. Pérvo rašángiro barydyró nevéstyr phuciá Léstyr: “Ci, čačó, Tu san Xristóso, Čhavó Bahtiakirde Devléskiro?”

⁶²“Me som”, — otphendiá Isúso, — i tumé dykhéna Čhavés Manušeskires, syr Jov javéla te bešél pir čačó vast zorjátyr, kiéli Jov javéla pe bolybnáskire óbloki.”

⁶³Tedy pérvo rašángiro barydyró roskuscia péskire uribená i phendiá: “Save aménge iščo (inké) akaná trej jakhítka?

⁶⁴Tumé ž šundlé teliakiriben pe Devléste? So tumé pe davá phenéna?” Saré priĥalyne, so Isúso sys bangó, sob (kaj) te muliakirén Les.

⁶⁵Tén'ci vari-savé lyné te čungarden pe Léste; Isusóske zaphandle jakhá, lyné te marén pir šeró burnykenca (ladoškenca) i rakirdé: “Uĥaljov!”; i slúgi (dynárja) mardé Les pir muj.

⁶⁶Kiéli Pétri sys telál pe gréda (pe dvóro), podgíia pašyledýr jekh pervoné-rašángire barydyreskire dynaricendyr.

⁶⁷Joj dykhciá Petris, syr jov tatjolas pašýl jag, rakhibnýtkes dykhciá pe léste i phendiá: “Tu ža sánas adalesa Isusósa Nazarietostyr?”

⁶⁸Ne Jov otphendiape: “Me sarésa na džinóm (na džináv), pal so tu rakirésa”, — phendiá jov i gijá javrí ke pórta; i bašno probagandia.

⁶⁹Džuvlý-dynárica nevéstyr lyjá te rakirél manušénge, savé sys terdé: “Kadavá isyn jekh léndyr.”

⁷⁰Ne Pétri nevéstyr otphendiape. Nábut korigedýr (pozžedýr) manušá, savé sys terdé odój, phendlé Petriske: “Ne, usajékh, tu ž san léndyr, tu ž adia-pac' san Galilejanino.”

⁷¹Pétri lyjá te košel pes, i te sovlahal: “Nad, me na džinóm kadalé Manušés, pal Savéste tumé rakiréna.”

⁷²Ake, tedy bašno probagandia javír mólo, i Pétri priripirdia Isusóskire lavá: “Angledýr, syr probagala bašno duj móly, tu trin móly otphenesape Mándyr.” I jov lyjá te rovel.