Read Biblija - Pe Baltitko Romani čib (Romanes) 2019 Baltic Romani Bible Marko 15 Bible Online

Marko 15 - Biblija - Pe Baltitko Romani čib (Romanes) 2019 Baltic Romani Bible bible

Marko 15

¹I jekhátyr (srázu) pe zlóko, syr jaciá dyvés, rašángire barydyrá godephurenca i lylvaritkonenca i saró Siniedriono pirirakirde davá réndo, phandle Isusós i lydžiné Les ke Piláto.

²Piláto phuciá Léstyr: “Tu san Králi Judéngiro?” Isúso otphendiá, — “adiáke, syr tu rakirésa.”

³Rašángire barydyrá bangiakirenas zoralés Isusós.

⁴Piláto nevéstyr phuciá Léstyr: “Sóske Tu nisó na otphenesa? Ne, šun, syr but bangipena jone rakiréna pe Túte?”

⁵Ne Isúso usajékh nisó pe davá na phendiá, i davá drieván divindia Pilatos.

⁶Pe svénko Piláto otmekelas jekhe manušés štaribnastyr (bešybnastyr) pir manušéngiro mangipén.

⁷Dro štaribén dro dová časo sys beštó Varava javire manušénca, savé ĥazdyné búnto i zamardé manušés.

⁸I manušá giné upré i lyné te mangén Pilatos pal davá, so jov saró mólo kerélas vaš lénge.

⁹I Piláto otphendiá lénge, rakirí: “Kóli tuménge isyn pir iló, to me otmekáva tuménge Kralís Judengires?

¹⁰Piláto ž džindiá, so rašaja zdyne Isusós léske zevlynypnastyr.

¹¹Ne rašángire barydyrá podrakirde manušén te mangén Pilatostyr te otmekél lénge fedýr Varavas.

¹²Ne Piláto nevéstyr otphendiá lénge: “So ž Mánge te keráv Adalesa, Konés tumé kharéna “Králi Judéngiro?”

¹³“Primar Les pe trušúl!”, — zadyne gódla nevéstyr jone.

¹⁴Ne Piláto phendiá lénge: “Savó ž čoripén Jov kerdiá?” A jone iščo (inké) zoraledýr dyné gódla: “Primar Les pe trušúl!”

¹⁵Piláto ž vaš dová, sob (kaj) te kerél manušénge pir iló, otmekciá Varavas, a Isusós otdyjá te marén čupniasa, tén'či te primaren pe trušúl.

¹⁶Haladé lydžiné Isusós dre prietorija i khardé khetané pherdó xaladéngiro polko.

¹⁷Jone uridé Les dre purpurno mantija, skhude phusadytkone ciernovnikostyr viánka i uridé pe Léskiro šeró.

¹⁸I jone lyné te den gódla: “Jav džidó, Králjo Judéngiro!”

¹⁹Jone mardé Les trascinitkone destesa pir šeró i čungardyne pe Léste, perenas pe čangá angíl Léste i kloninenaspe.

²⁰I kiéli jone vysandle xoliames Les, jone zlyne Léstyr purpurno mantija, uridé Les dro Léskiro uribén, i lydžiné Les pe trušúl te primaren.

²¹I jone začhude vari-savé Simonos Kirijaninos, Rufoskire i Lieksandroskire dadés, savó džálas feldatyr, te lydžál Léskiro trušúl.

²²I jone jandlé Isusós pe štéto, savó kharélape “Golgofa”, so značynéla “Čeriepo.”

²³Jone dénas Léske te p'jel mol (vino), zmiešyndly mirósa, ne Jov otphendiape.

²⁴Kiéli jone primarde Les pe trušúl, jone roskerde (rosčhude) uribén Léskiro maškír péste pir žriébijo, konéske so te lel.

²⁵Sys tríto mardó (štúnda), kiéli jone primarde Les.

²⁶Pe phal, kaj čhinena bangipen, sys čhindló: “Králi Judéngiro.”

²⁷I jone primarde pe trušúl pašýl Léste duje rozmaribnar'jen, jekhés čačé rigátyr, javirés zervone (lievone) rigátyr.[4]

²⁸

²⁹I manušá, savé prodžanas pašýl Léste, kuninenas šerenca i rakirdé nalačhé lavá: “Tu ž kadavá san, Savó rosphagirelas Khangirí i pir trin dyvesá ĥazdesas la nevéstyr!

³⁰Rakh Kokoró Pes, džá telé trušulestyr.”

³¹Adiáke-pac' rašángire barydyrá, khetané lylvaritkonenca, sandlepe xoliames Léstyr, rakirí: “Javirén Jov zrakhelas, a Jov na moginéla Kokoró Pes te zrakhél!

³²Mek davá Xristóso, Králi Judéngiro, te džal telé trušulestyr, sob (kaj) aménge te dykhas, i te upatias dre Léste.” I rozmaribnarja, savé sys primarde Isusósa, adiáke-pac' ladžakirenas Les.

³³I dro šóvto mardó (štúnda) jaciá kalypén pir sarí phuv i rikirdiape ke jeniáto (bijekhéskiro déšto) mardó (štúnda).

³⁴Dro jeniáto mardó dyvesé Isúso dyjá gódla zoralés Judytkes: “Eloi, lama savaktani?” So značynéla Romanes: “Dévla Miro, Dévla Miro, sóske Tu mekcian Man?”

³⁵I vari-savé kodolé manušéndyr, savé sys terdé adái, kiéli jone šundlé davá, lyné te rakirén: “Šunén, Jov kharéla Ilijas.”

³⁶Ne jekh léndyr podprastandyja pašyledýr, kindiakirdia gupka dro molitko uksuso, uridia la pe kašt i podyja te p'jel Isusóske; rakirí: “Užakiren. Dykhasa, syr javéla Ilíia te zlel Les.”

³⁷Isúso ž, dyjá gódla zoralés i myjá.

³⁸Šýrma dre Khangirí rozriskirdiape samone upralestyr ke phuv.

³⁹A šelengiro barydyró, savó sys terdó angíl Isusóste, šundiá Léskiri godlyma i dykhciá, syr Jov myjá, phendiá: “Adavá manúš, čačes, sys Devléskiro Čhavó!”

⁴⁰Dre rig sys terdé džuvliá i dykhenas duripnastyr: maškír lénde sys Maríia Magdalina, Maríia, daj Tyknedyreskiri Jakovoskiri i Iosijaskiri, Salomija,

⁴¹davá sys adalé džuvliá, savé džánas pal Isusóste dre Galiliéia i dynarindlé Léske; odój sys but javír džuvliá, savé javné khetané Lésa dro Jerusalimo.

⁴²I syr javdiá bel'vél', davá sys parastivín (piatnica) — davá dyvés, savó džála angíl sávato (subóta),

⁴³iavdiá Joza Arimafejatyr. Jov sys patyvalo manúš dro séndo, savó užakirdia Kralipén Devléskiro. Jov murškanés podgíia ke Piláto i mangdiá te del léske Isusóskiro trúpo.

⁴⁴Piláto zdivindiape, so Isúso uže myjá, khardiá šelengire barydyrés, phuciá léstyr: “Ci ĥará Jov myjá?”

⁴⁵Syr Piláto udžindiá šelengire baredyrestyr, tedy otdyjá trúpo Jozáske.

⁴⁶Joza kindia pohtan, zlyjá Isusóskiro trúpo; obkrencyndia Les žužé pohtanesa i čhudiá dre koplíca, vyčingirdy dre skála, i priradia bar ke zagiibén dre koplíca.

⁴⁷Maríia Magdalina i Maríia, daj Iosijaskiri, dykhné, karik Isusós čhudé.